Malaquías 3
3
1Velaí: eu envío o meu mensaxeiro,
para que limpe o camiño diante de min.
Nun momento entrará no seu santuario
o Señor a quen vós estades buscando,
o mensaxeiro da Alianza, a quen vos lle tendes amor:
vede que chega —fala o Señor dos Exércitos—.
2Quen aguantará o día da súa chegada?
Quen se manterá de pé cando El apareza?
Si, El será coma o lume do fundidor,
coma a lixivia dos que lavan.
3Sentarase coma o fundidor que refina a prata,
refinará os fillos de Leví e purificaraos;
coma a prata e coma o ouro, así serán para o Señor
os que presenten a ofrenda con xustiza.
4Entón seralle agradable ó Señor a ofrenda de Xudá e Xerusalén,
coma nos días remotos, coma nos anos antigos.
5Entón achegareime a vós para o proceso xudicial,
e serei acusador aleuto
contra os feiticeiros e contra os adúlteros,
contra os que xuran en falso
e contra os que abusan do pagamento do xornaleiro,
da viúva e do orfo, e rebaixan os dereitos do emigrante.
Pero non me teñen medo —fala o Señor dos Exércitos—.
A paga das débedas cúlticas, sinal de fidelidade e bendición
6Eu son o Señor, non cambiei,
pero vós, fillos de Xacob (do que engana) aínda non acabastes.
7Si, desde os días de vosos pais vídesvos apartando dos meus preceptos,
e non os gardades.
Volvede a min, e eu volverei a vós
—fala o Señor dos Exércitos—.
Pero vós dicides: "En que temos que volvernos?"
8Pode un home roubar a Deus? Pois vós estádesme roubando a min.
E dicides: "En que che roubamos?" "Nos décimos e nas primicias".
9Coa maldición estades sendo malditos,
pero seguides roubándome vós, o pobo enteiro.
10Traede todo o décimo á casa do tesouro.
Para que haxa comida no meu templo.
Si, poñédeme a proba —fala o Señor dos Exércitos—,
para ver se eu non vos abro as comportas do ceo,
para librar sobre vós a bendición ata que nada quede na miña man.
11Rifaríalle en favor voso ó saltón,
para que non vos destruíse o froito da terra,
e para que a viña no campo non vos quedase sen uva
—fala o Señor dos Exércitos—.
12Entón proclamaríanvos ditosos todos os pobos,
pois sodes un país de felicidade,
—fala o Señor dos Exércitos—.
O día do Señor será de triunfo e ledicia para os seus servidores
13Os vosos ditos contra min son duros —fala o Señor—.
Preguntades: "Que dixemos nós contra Ti?"
14Dicides: "É cousa inútil servir a Deus!
Que proveito quitamos de gardar os seus mandamentos,
e de camiñarmos en penitencia na presenza do Señor dos Exércitos?
15Agora nós declaramos felices os soberbios:
Si, os que cometen maldades prosperan,
poñen a proba a Deus, líbranse".
16Deste xeito falan entre eles os que respectan o Señor,
cada un co seu próximo,
pero o Señor préstalles atención e escóitaos,
pois o libro das lembranzas estase escribindo na súa presenza,
por mor dos que temen o Señor e estiman o seu Nome.
17Serán para min —fala o Señor dos Exércitos—
propiedade persoal no día en que eu actúe,
porque lles perdoarei o mesmo que un home perdoa o fillo obediente.
18Entón veredes de novo a diferenza entre o xusto e o malvado,
entre quen serve ó Señor e quen non o serve.
19Pois velaí chega o día: abrasará coma un forno,
e os soberbios e todos os que cometen a maldade serán palla.
Si, o día que chega será a vosa queima
—fala o Señor dos Exércitos—:
non vos deixará raíz nin póla.
20Brillará para vós, os que respectades o meu Nome,
un sol de xustiza, que trae saúde nas súas ás.
Vós sairedes e brincaredes coma becerros ceibos:
21esmagaredes os malvados, pois serán po baixo a planta dos vosos pés,
no día en que eu actúe —fala o Señor dos Exércitos—.
Suplementos: mirando ós tempos novos
22Lembrádevos da lei de Moisés, o meu servo,
lei que eu lle ordenei no Horeb,
preceptos e decretos para todo Israel.
23Vede: eu vouvos mandar o profeta Elías
antes de que chegue o día do Señor grande e temible:
24El fará volver o corazón dos pais cara ós fillos,
e o corazón dos fillos cara ós pais,
non sexa que eu me vexa obrigado a vir
para castigar o país co exterminio sagrado.
Currently Selected:
Malaquías 3: ABGS
Highlight
Share
Copy
Want to have your highlights saved across all your devices? Sign up or sign in
Dereitos reservados: SEPT