YouVersion Logo
Search Icon

Lucas 18

18
Mana ajayaypa Tayta Diosta mañakunapä Jesús yachatsinqan
1Imaypis mana ajayaypa Tayta Diosman mañakuyänanpämi discïpulunkunata Jesús imamanpis iwalatsiypa yachatsir 2nirqan: <<Juk markachöshi Tayta Diosta mana mantsapakuq ni runakunatapis mana respitaq juez kanä. 3Tsay markachöshi juk viüdapis täkunä. Payshi tsay juezman kutin kutin aywar ninä: <Taytay, quejakunqäta arreglaykallämay>. 4Tsaynö kutiptinpis juezqa manash cäsunätsu. Tsayshi yarpachakur shonqullanchö ninä: <Diosta mana mantsapakurpis ni runakunata mana respitarpis 5kay viüdapa demandakunqanta juklla arreglashä. Mana arreglaptïqa umäta nanatsirmi imay hörapis kutiykämunqa> >>.
6Tsaypitanam Señor Jesús nirqan: <<Mana alli juez imata ninqantapis shumaq tantiyayay. 7¿Manatsurä Tayta Diospis cäsunqa akranqan runakuna paqasta junaqta mañakuyaptin? Payqa mana shuyarätsiypam yanapanqa. 8Noqam nï: Mañakuq kaqtaqa Tayta Dios mana shuyarätsiypam yanapanqa. Peru Runapa Tsurin kay patsaman kutimur ¿pillapis Tayta Diosman yärakuykaqta tarinqatsurä?>>
Fariseuman y impuestu cobraqman Jesús iwalatsinqan
9Runa mayinta manakaqman churaq runakunapämi Jesús iwalatsiypa yachatsir nirqan: 10<<Ishkay runakunash Diosta mañakuyänanpä templuman aywayänä. Jukaqshi fariseo kanä y jukaqnash impuestu cobraq kanä. 11Tsay fariseush ichiykur Tayta Diosta mañakur ninä: <Tayta Dios, qamtam agradëcikü wakin runakunanö mana kanqäpita. Paykunaqa suwakuq, jutsasapa y adulteriu jutsa ruraqmi kayan. Noqaqa manam taqay impuestu cobraqnötsu kä. 12Noqaqa ishkay kutim cada semänachö ayunä. Tsaynöllam llapan gänanqäpita imaypis templuman diezmüta apä>.
13<<Peru impuestu cobraq kaqshi sïqa karullachö ichiykur ciëluman rikayllapis rikanätsu. Tsaypa rantinqa pasaypa llakikurshi pëchunta takarrä ninä: <Tayta Dios, kuyapaykallämay. Noqaqa jutsasapam kallä>.
14<<Noqam nï: Impuestu cobraq runam jutsanpita perdonashqana wayinman kutirqan. Peru fariseutaqa Tayta Dios manam perdonarqantsu. Allish tukuqkunam penqakuyman churashqa kayanqa. Peru llänu shonqu kaqkunam sïqa alliman churashqa kayanqa>>.
Wamrakunapä Jesús mañakunqan
Mateo 19.13-15; Marcos 10.13-16
15Tsaypitanam wamrakunata Jesús kaqman apayarqan umankunata yataykur Tayta Diosta mañakunanpä. Tsayta rikarmi discïpulunkuna michäyarqan. 16Jesúsnam wamrakunata qayaskir discïpulunkunata nirqan: <<Wamrakunata apayämunanta ama michäyaytsu. Wamranö kaqkunapämi Tayta Diospa mandakuynin kaykan. 17Rasunpam nï: Pipis Tayta Diospa mandakuyninta wamranö mana chaskirqa manam paypa mandakuyninman yaykunqatsu>>.
Rïcu runa ajatarä salvakunanpä kanqan
Mateo 19.16-30; Marcos 10.17-31
18Juk mandakuq runam Jesústa nirqan: <<Rabí, alli runam kanki. ¿Imatatä ruräman mana ushakaq kawayta tarinäpä?>>
19Jesúsnam nirqan: <<¿Imanirtä alli runa kanqäta nimanki? Tayta Diosllam alliqa. 20Musyankim mandamientukuna ninqanta: <Ama adulteriu jutsata rurankitsu.#Éxo. 20.14; Deut. 5.18. Ama runa mayikita wanutsinkitsu.#Éxo. 20.13; Deut. 5.17. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. Mamaykita y papänikita alli rikanki#Éxo. 20.12; Deut. 5.16.> >>.
21Tsaynö niptinnam tsay runa nirqan: <<Tsaykunataqa wamra kanqäpitam llapanta cumplirqü>>.
22Jesúsnam nirqan: <<Jukrämi cumplinaykipä faltan. Llapan imaykaykikunatapis rantikuskir tsay qellayta pobrikunata qaray. Tsaynö ruraptikiqa ciëluchömi riquëzayki kanqa. Tsaypita qatimay>>.
23Tsaynö niptin pasaypa rïcu karmi tsay runa llakikurqan. 24Llakishqa kaykaqta rikaykurnam Jesús nirqan: <<¡Alläpa ajam rïcu runakuna Tayta Diospa mandakuyninman yaykuyänanpä! 25Rïcu runa Tayta Diospa mandakuyninman yaykunqanpitaqa mas fäcilmi camëllupis awjapa uchkunpa päsanman>>.
26Tsayta wiyaqkunanam Jesústa tapuyarqan: <<Tsaynö kaptinqa ¿pirä salvakunqa?>>
27Jesúsnam nirqan: <<Runakunapä aja karpis Tayta Diospäqa manam ajatsu>>.
28Pedrunam nirqan: <<Taytay, noqakunaqa llapan imaykäkunatapis jaqiskirmi qamta qatiräyä>>.
29Jesúsnam nirqan: <<Rasunpam nï: Pipis wayinta, mamanta, papäninta, wawqinkunata, paninkunata, warminta o tsurinkunata Tayta Diospa mandakuynin raykur jaqirqa 30kay vïdachö mas atskatam chaskinqa. Tsaynöllam washa vïdachö mana ushakaq kawayta tarinqa>>.
Wanutsiyänanpä kanqanta Jesús yapay willakunqan
Mateo 20.17-19; Marcos 10.32-34
31Chunka ishkay discïpulunkunata qayaykurmi Jesús nirqan: <<Jerusalénman chänantsikpä pöcullanam faltan. Tsaychömi profëtakuna qellqayanqannölla Runapa Tsurinta llapanpis päsanqa. 32Mana Israel autoridäkunamanmi entregayanqa. Paykunam burlakuyanqa, ashlliyanqa y toqapuyanqa. 33Asutarkurmi wanutsiyanqa. Peru kimsa junaqtaqa kawamunqam>>.
34Tsaynö niptin discïpulunkunaqa manam tantiyayarqantsu ni musyayarqantsu imapä parlanqantapis.
Jericó markachö qaprata Jesús allïtsinqan
Mateo 20.29-34; Marcos 10.46-52
35Jericó markaman Jesús yaykuykaptinnam juk qapra runa limushnata mañakur nänichö jamaraykarqan. 36Atskaq runakuna päsaykaqta tantiyaskirmi tsay qapra tapukur nirqan: <<¡Imatä päsaykan!>>
37Runakunanam niyarqan: <<Nazaret runa Jesúsmi päsaykan>>.
38Tsaymi qayakur nirqan: <<¡Davidpa Tsurin#18.38 Tayta Dios mandamunqan Cristutam runakuna niyarqan Davidpa Tsurin kanqanta. Tsaynö niyarqan rey Davidpita miraq imayyaqpis mandananpä Tayta Dios promitishqa kaptinmi. Tsaypita masta musyanaykipä liyinki 2Sam. 7.10-16; Sal. 89.1-4, 19-37; 132.11-12. Jesús, kuyapaykallämay!>>
39Tsaynö niptinmi puntata aywaykaqkuna upälla kananpä ollqutupäyarqan. Ollqutupäyaptinpis masrämi qayakur nirqan: <<¡Davidpa Tsurin, kuyapaykallämay!>>
40Jesúsnam ichiykur tsay qaprata qayatsirqan. Puntanman chaykatsiyaptinnam tapur nirqan: 41<<¿Imachö yanapanätatä munanki?>>
Qapranam nirqan: <<¡Taytay, ñawï allïnantam munä!>>
42Jesúsnam nirqan: <<¡Rikayna! Yärakamunqaykipitam ñawiki rikanqa>>.
43Tsaynö niptinmi jinan höra ñawin kichakaskiptin Tayta Diosta alabaraykar Jesúspa qepanta aywarqan. Tsayta rikaykurmi llapan runakunapis Tayta Diosta alabayarqan.

Currently Selected:

Lucas 18: qxo

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy