1 Timoteo 1
1
Apóstol Pablo saludakunqan
1Noqa Pablum Jesucristupa apostolnin kä. Apostolnin kanäpämi salvakuq Tayta Dios y yärakunqantsik Señor Jesucristo churamashqa. 2Timoteo,#Hech. 16.1-3. Jesucristuman criyikur kuyay tsurïnö kaptikim kay cartata cartakamü. Papänintsik Tayta Dios y Señor Jesucristo kuyapäshurniki alli kawanaykipä yanapaykulläshuy.
Llutan yachatsikuqkunata michänanpä yätsinqan
3Macedonia provinciaman aywarmi Éfeso markachö qamta jaqimurqä llutan yachatsikuqkunata michänaykipä. 4Tsay llutan yachatsikuqkunaqa yarpayllankunapita yachatsirmi unay tiempu imanö kanqanta y unay castankuna pï kayanqanta yachatsiyan. Tsaykunata yachatsiyaptinmi Tayta Diosman yärakuyänanpa rantin manakaqkunapita rimanakullar kawaykäyan.
5Wawqikuna y panikuna rimanakuyänanpa rantin kuyanakuyänanpämi tsay llutan yachatsikuqkunata michänaykipä nï. Tsaynö kuyanakuyänanpäqa jutsata ama rurayätsuntsu, allita rurar kawayätsun y llapan shonqunkunawan Tayta Diosman criyikuyätsun.
6Tsay llutan yachatsikuqkunaqa kuyanakuyänanpa rantinmi manakaqkunapita rimanakullar kawayan. 7Tayta Diospa leyninkunata pasaypa yachaq kayanqanta nirpis imata yachatsiyanqantapis manam musyayantsu.
8Peru musyantsikmi Tayta Dios munanqannö kawayänanpä yachatsishqa leyninkuna alli kanqanta. 9Manam jutsaynaq runakunapätsu leyninkunata Tayta Dios entregarqan, sinöqa jutsa ruraqkunapämi. Tsay leyninkunam kaykan mana cäsukuqkunapä, mana alli ruraq runakunapä, jutsasapakunapä, Tayta Diosta mana respitaqkunapä, mamanta y papäninta maqaqkunapä y runa mayinta wanutsiqkunapä. 10Tsaynöllam kaykan adulteriu jutsata ruraqkunapä, ollqupura kakuqkunapä, warmipura kakuqkunapä, runa mayinta rantikuqkunapä, llullakuqkunapä, manakaqta tumpar runa mayinpa contran shäriqkunapä y alli yachatsikuyta mana cäsukur jutsata ruraqkunapä. 11Tsaytam alabashqa Tayta Diospa alli willakuyninchö nin. Tsay willakuyninta willakunäpämi Tayta Dios mandamashqa.
Pabluta Tayta Dios kuyanqan
12Señornintsik Jesucristutam agradëcikü willakuyninta willakunäpä yanapamanqanpita. Tsaynöllam agradëcikü noqaman yärakamur willakuyninta willakur purinäpä churamanqanpita. 13Ñöpataqa Jesucristuta penqakuymanmi churarqä. Payman yärakuqkunatapis ashi ashiykurmi carcelman wichqatsirqä.#Hech. 8.3; 9.4-5. Mana musyaynïpa tsaynö rurashqa kaptïpis Tayta Dios kuyamarmi perdonamashqa. 14Perdonamarmi tantiyatsimashqa Jesucristuman criyikur pïmaytapis kuyanäpä.
15Jutsasapa runakunata salvananpämi kay patsaman Jesucristo shamushqa. Tsaytaqa pïmaypis criyiyätsun. Noqatapis llapan runakunapita mas jutsayuq kaykaptïmi 16kuyapämar salvamashqa. Tsaynö salvamarqan Jesucristo perdonakuq kanqanta wakin runakunapis tantiyakur payman criyikuyänanpä y mana ushakaq kawayta tariyänanpämi. 17¡Tayta Diosmi imayyaqpis poderyuq rey, imayyaqpis kawaq y mana rikakaq! Pay kikillanmi Dios kaykan. [Manam pipis paynö yachaq kantsu.] ¡Imayyaqpis alabashqa kaykullätsun! ¡Amén!
Jesucristupa willakuyninta imaypis willakunanpä yätsinqan
18Kuyay Timoteo, tsurï cuenta kaptikim Tayta Diospa jutinchö wawqikuna niyäshunqallaykita noqapis qamta nï: Alli soldädu mana mantsaypa pelyanqannö qampis mana mantsaypa Jesucristupa willakuyninta willakuy. 19Tsaynö willakurnin Jesucristuman criyir Tayta Dios munanqannö imaypis kaway.
Wakin runakunaqa Tayta Dios munanqannö mana kawarmi Jesucristuman criyiyantsu. 20Alejandruta y Himeneuta mana criyiyanqanpitam Satanáspa poderninman entregarqü. Tsaynöpa capazmi tantiyakur llutanta yachaykätsiyanqanta dëjar Jesucristuman yapay criyikuyanmanpis.
Currently Selected:
1 Timoteo 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.