1 Pedro 1
1
Apóstol Pedro saludanqan
1Ponto, Galacia, Capadocia, Asia y Bitinia provinciakunachö kaykaq wawqikuna y panikuna:
Noqa Pedrum, Jesucristupa apostolnin kar, kay patsachö qorpanölla kayaptiki kay cartata cartakamü. 2Tayta Dios unaypita reqiyäshurnikim Espíritu Santuwan akrayäshurquyki Jesucristuta cäsuyänaykipä y yawarninta jichanqanpita perdonashqa kayänaykipä. Tayta Dios kuyapäyäshurniki alli kawayänaykipä yanapaykuyälläshuy.
Tayta Diosman criyikur kushishqa kawanantsikpä ninqan
3¡Señornintsik Jesucristupa Papänin Tayta Diosta alabaykulläshun! Kuyapäkuq kayninwanmi mushuq kawayta qaramarquntsik yapay yurishqanöna kanantsikpä.#Juan 3.3-7; 1Ped. 1.23. Jesucristo kawamushqa kaptinmi musyantsik noqantsikpis kawaskamur gloriaman chänantsikpä kanqanta. 4Gloriaman charnam Tayta Dios shuyätsimanqantsik herenciata chaskishun. Tsay herenciaqa manam imaypis ushakanqatsu, ismunqatsu ni illakanqatsu. 5Tayta Diosman yärakuyaptikim poderninwan yanapayäshunki Jesucristo kutimuptin alistanqan salvacionta chaskiyänaykipä.
6Tsayta musyarmi kay patsachö kawayanqaykiyaq pasaypa ñakarpis kushishqa kawaykäyanki. 7Qorita tsullutsirrä püru kanqanta musyanqantsiknömi qamkunapis ñakaykunawanrä musyayanki Tayta Diosman llapan shonquykikunawan yärakuyanqaykita. Criyikuynikikunaqa qoripitapis masmi välin. Tsaymi imayka ñakaychö karpis Tayta Diosman criyikuyaptikiqa Jesucristo kay patsaman kutimur alabayäshunki, alli rikayäshunki y alliman churayäshunki.
8Jesucristuta mana rikashqa karpis paytam kuyaykäyanki.#Juan 20.29. Tsaymi payman criyikurnin kushishqa kawaykäyanki. Tsaynö kushikuyanqaykitaqa manam imanöpapis tantiyatsiyta puëdiyankitsu. 9Tsaynö kushikuyanki Jesucristuman yärakur salvacionta tariyanqaykipitam.
10Tayta Dios kuyakuq kayninwan salvamänantsikpä kanqantaqa profëtakunapis shumaq tapukuykurmi willakuyarqan. 11Tsaynö willakuyänanpämi Jesucristupa Espïritun paykunata tantiyatsirqan Cristo ñakar wanunanpä kanqanta y kawarkamur llapanpä poderyuq kananpä kanqanta. Tsaynöpam profëtakuna musyayta munayarqan Cristo pï kanqanta y imay shamunanpä kanqanta. 12Tsay profëtakunatam Espíritu Santu tantiyatsirqan paykuna kawayanqan witsan shamunanpa rantin shamuq watakunachörä shamunanpä kanqanta.
Jesucristo shamushqana kaptinmi kananqa ciëlupita shamuq Espíritu Santupa poderninwan Jesucristupa alli willakuyninta willakuykäyan. Jesucristo noqantsik raykur wanur salvamanqantsiktam angelkunapis imaykanöpa tantiyayta munayan.
Jutsaynaq kawanantsikpä ninqan
13Tsaynö kaykaptinqa shumaq tantiyakur Tayta Dios munanqannö kawayay. Jesucristo kutimur Tayta Diospa puntanman qorimänantsikpä kanqanta ama qonqayaytsu.
14Tayta Diospa wamran kaykarnaqa payta cäsur munanqannö kawayay. Jesucristuman manarä criyir kawayanqaykinöqa ama kawayaytsu. 15Tsaypa rantinqa akramaqnintsik Tayta Dios santu kanqannö qamkunapis santu kayay. 16Tayta Diospa palabranmi nin: <<Noqaqa santum kä. Qamkunapis santu kayay>>.#Lev. 11.44-45; 19.2.
17Pipapis mana favornin shäriypa juzgaq Tayta Diosta <<Papä>> nikarqa kay patsachö qorpanölla kawayanqaykiyaq payta mantsapakur kawayay. 18Unay castaykikuna kawayanqannömi qamkunapis jutsata rurar kawayarquyki. Tsaynö kayaptiki manam qellaywantsu ni qoriwantsu Tayta Dios rantiyäshurquyki, 19sinöqa Jesucristupa chaniyuq yawarninwanmi. Sänu carnishta sacrificiupä pishtayaptin yawarninta jichanqannömi Jesucristupis noqantsik raykur yawarninta jichashqa.
20Kay patsata manarä kamar Tayta Dios destinashqa kaptinmi noqantsik kawanqantsik witsan Jesucristo kuyamarnintsik shamushqa. 21Pay raykurmi Tayta Diosman yärakuykäyanki. Wanunqanpita kawaskatsimurmi gloriachö poderyuq kananpä Tayta Dios qorikushqa.
22Willakuyninta#1.22 Wakin qepa kaq griego copiakunaqa Espïritupa yanapayninwan nirmi yapayan. cäsukuyaptikim kuyanakur kawayänaykipä Tayta Dios purificayäshurquyki. Tsaynö kaykaptinqa llapan shonquykikunawan jukniki juknikipis kuyanakur kawayay. 23Tsaynö kawayänaykipämi yapay yurishqanö kayanki.#Juan 3.3-7; 1Ped. 1.3. Manam mamaykikunapitatsu ni papänikikunapitatsu tsay kawayta chaskiyarquyki, sinöqa Diospa palabranta chaskiyanqaykipitam. Paypa palabran kawaq karmi imaypis mana ushakaq kanqa.
24<<Llapan runakunapis qewanö ushakaqllam.
Poderyuq kayninpis waytanö päsaqllam.
Qewapis tsakinmi y waytapis shushunmi.
25Tayta Diospa palabranmi sïqa imaypis mana ushakaq>>.#Isa. 40.6-8.
Tsay palabratam Jesucristupa willakuqninkuna willayäshurquyki.
Currently Selected:
1 Pedro 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.