YouVersion Logo
Search Icon

Ore i mexü̃ ga Márcu ümatüxü̃ 16

16
Wenaxarü namaxü̃ ga Ngechuchu
(Mt. 28.1-10; Lc. 24.1-12; Jn. 20.1-10)
1Ngü̃chigaarü ngunexü̃guwena, rü María ga Madarénacüã̱x, rü Charumé, rü María ga Chantiágu naé naxca̱x itaxegü ga pumara nax namaxã nachaãxü̃ca̱x ga Ngechuchuxü̃ne.
2Rü pa̱xmamaxü̃chi ga noxri üa̱xcü iyarügoxgu ga yüxüarü ngunexü̃gu, rü yema ngecügü rü íiyadaugü ga yema naxma̱xü̃ ga nagu yanaxücuchigüãxü̃wa.
3Rü ngĩgü ngĩgürügügü: —¿Texé tá taxca̱x ítanaxügachi ya yimá nuta ya namaxã nangũxtaü̃cü? —ngĩgürügügü.
4Natürü yexguma meama nüxü̃ nadaunügu, rü nüxü̃ idaugü ga marü nax ínaxügachixü̃ ga gumá nuta ga tacü ga namaxã nangũxtaü̃cü ga yema naxma̱xü̃.
5Rü yexguma nagu nachocugu ga yema naxma̱xü̃, rü nüxü̃ idaugü ga wüxi ga ngextü̱xücü ga ma̱xchiruxü̃ ga cómüchiruxü̃ ga yéma naxma̱xü̃arü tügünecüwawa rütoxü̃. Rü poraãcü ibaixãchiãẽgü ga yema ngecügü.
6Natürü nüma rü ñanagürü ngĩxü̃: —¡Taxṹ i peba̱i̱xãchiexü̃! Pema rü naxca̱x pedaugü ya Ngechuchu ya Nacharétucüã̱x ga gumá curuchawa yapotagüãcü. Marü wena namaxü̃, rü nataxuma i nua. ¡Dücax, mea nüxü̃ peda̱u̱x i ñaa nachica ga nagu naxügüãxü̃!
7¡Rü paxa ípixĩ rü Pedrumaxã rü ngẽma togü i ngúexü̃gümaxã nüxü̃ peyarüxugüe, rü ñapegügü nüxü̃: “Nüma ya Ngechuchu rü marü nüxíra pexü̃pa Gariréaanewa naxũ. Rü ngéma tá nüxü̃ peyadaugü ngẽma pemaxã nüxü̃ yaxuxü̃rüxü̃”, ñapegügü nüxü̃! —ñanagürü.
8Rü yexguma ga yema ngecügü rü nüxna íiyabuxmü ga yema naxma̱xü̃, yerü ngĩrü muü̃ẽmaxã poraãcü iyadu̱xruxe. Rü taxúemaama nüxü̃ iyaxugügü, yerü poraãcü imuü̃e.
Ngechuchu rü ngĩxca̱x nango̱x ga María ga Madarénacüã̱x
(Jn. 20.11-18)
9Rü yexguma Ngechuchu yuwa írüdaxguwena ga noxri yangunegu ga yüxüarü ngunexü̃gu, rü ngĩxca̱xíra nango̱x ga María ga Madarénacüã̱x ga ngĩwa ínawoxü̃ãcü ga 7 ga ngo̱xogü.
10Rü ngĩma rü íiyaxũ, rü namaxã nüxü̃ iyarüxu ga yema Ngechuchumücügü ga ingechaü̃güxü̃ rü íxauxexü̃.
11Natürü ga nümagü rü tama nayaxõgüchaü̃ ga yexguma nüxü̃ naxĩnüegu nax namaxü̃xü̃ ga Ngechuchu rü nax nüxü̃ nadauxü̃ ga ngĩmax.
Ngechuchu rü taxre ga norü ngúexü̃güca̱x nango̱x
(Lc. 24.13-35)
12Rü yemawena ga Ngechuchu rü nügü nanatoraxü̃xẽxẽ naxca̱x ga yema taxre ga norü ngúexü̃gü ga yexguma nama ga naanewaama nadaxü̃gu naxĩxgu.
13Rü nümagü rü nawoegu, rü yema togü ga ngúexü̃gümaxã nüxü̃ nayarüxugü. Natürü yemagüaxü̃́ rü ta tama nayaxõgü.
14Rü yemawena ga Ngechuchu rü naxca̱x nango̱x ga yema 11 ga norü ngúexü̃gü ga yexguma mechawa ínachibüeyane. Rü nayangagü naxca̱x nax tama aixcüma yaxõgüãxü̃ rü tama nüxü̃́ inaxĩnüexü̃ ga yema marü nüxü̃ daugüxü̃. Yerü nümagü ga yema ngúexü̃gü rü tama nüxü̃́ nayaxõgüchaü̃ ga yema nüxü̃ daugüxü̃ ga marü wena nax namaxü̃xü̃.
Ngechuchu nanamu ga norü ngúexü̃gü
(Mt. 28.16-20; Lc. 24.36-49; Jn. 20.19-23)
15Rü ñanagürü nüxü̃: —¡Guxü̃ i naanewa pexĩ rü guxü̃ i duü̃xü̃gümaxã nüxü̃ peyarüxu i ore i mexü̃!
16Rü yíxema yaxṍxe rü íbaiexe rü tá tüxü̃́ nangẽxma i maxü̃ i taguma gúxü̃. Natürü yíxema tama yaxṍxe rü tá tapoxcu.
17Rü ñaa tá nixĩ i cua̱xruü̃gü i nawa nüxü̃ icuáxü̃ i ngẽma yaxõgüxü̃. Rü chauégagu tá ínanawoxü̃ i ngo̱xogü. Rü ngexwaca̱xü̃xü̃ i nagagüwa tá nidexagü.
18Rü naxme̱xmaxã tá nüxü̃ nayayauxãchi i ãxtapegü. Rü ngẽxguma yaxaxgüãgu i ta̱xacü i nawa iyuxü̃, rü taxũtáma nanachixexẽxẽ. Rü tá tüxü̃ ningõgügü ya ida̱xaweexe rü tá tümaca̱x nitaanegü —ñanagürü.
Ngechuchu rü daxũguxü̃ ga naanewa naxũ
(Lc. 24.50-53)
19Rü nüma ga Cori ga Ngechuchu rü yexguma norü ngúexü̃gümaxã yadexaxguwena, rü Tupana rü daxũguxü̃ ga naanewa nanaga. Rü Tupanaarü tügünecüwawa nayarüto.
20Rü nümagü ga norü ngúexü̃gü rü inaxĩãchi nax guxü̃wama nüxü̃ yanaxugüexü̃ ga ore i mexü̃. Rü nüma ga Cori rü nüxü̃ narüngü̃xẽxẽ, rü nanango̱xẽxẽ nax aixcüma yixĩxü̃ ga yema ore, yerü wüxigu namaxã napuracü nax naxügüã̱xü̃ca̱x ga mexü̃gü ga taxü̃gü ga Tupanaarü poramaxã naxügüxü̃.

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy