Ore i mexü̃ ga Matéu ümatüxü̃ 22
22
Ore ga ngĩgüarü petagu ixuxü̃
(Lc. 14.15-24)
1Rü Ngechuchu rü wenaxarü ore ga cua̱xruü̃gu ixuxü̃maxã nanangúexẽxẽ. Rü ñanagürü nüxü̃:
2—Rü daxũwa ya Tupana ãẽ̱xgacü ixĩxü̃wa rü nanangẽxgumaraxü̃ ga wüxi ga nachixü̃anearü ãẽ̱xgacü ga nanearü ngĩgü üchiücürüxü̃ nixĩ.
3Rü norü duü̃xü̃güxü̃ namu nax naxca̱x yaca̱xaxü̃ca̱x ga yema duü̃xü̃gü ga marü ü̃paacü nüxna naxuxü̃. Natürü yema duü̃xü̃gü ga marü nüxna naxuchiréxü̃ rü tama yéma naxĩxchaü̃.
4Rü nüma ga ãẽ̱xgacü rü wenaxarü togü ga norü duü̃xü̃güxü̃ yéma namugü. Rü ñanagürü nüxü̃: “¡Ngéma pexĩ naxü̃tawa i ngẽma duü̃xü̃gü i nüxna chaxuchiréxü̃, rü namaxã nüxü̃ peyarüxu rü marü íname i chorü õna i taxü̃. Rü marü chanadai i chorü wocagü i ingüexü̃ rü guxü̃ma marü ínamemare. Rü chanaxwa̱xe i paxa nua naxĩ naxca̱x i ñaa chorü peta!” ñanagürü.
5Natürü yema duü̃xü̃gü ga nüxna naxuchiréxü̃ rü tama naga naxĩnüe. Rü wüxi rü naanewa naxũ, rü to rü norü taxepataü̃wa naxũ.
6Rü ga togü rü yema ãẽ̱xgacüarü duü̃xü̃güxü̃ ínayauxü̃ rü nayacua̱i̱xgü ñu̱xmata nayuexẽẽã.
7Rü yexguma ga gumá ãẽ̱xgacü rü poraãcü nanu. Rü norü churaragüxü̃ yéma namugü nax yadaiãxü̃ca̱x ga yema duü̃xü̃gü ga máetagüxü̃, rü nax yagugüãxü̃ca̱x ga gumá norü ĩane.
8Rü ñu̱xũchi ñanagürü nüxü̃ ga norü duü̃xü̃gü: “Guxü̃ma i chorü peta rü marü ínamemare. Natürü ga yema duü̃xü̃gü ga nüxna chaxuchiréxü̃ rü woetama nüxü̃ chaxo nax nua naxĩxü̃ca̱x.
9¡Rü yea ĩanearü namagü i taxü̃wa pexĩ, rü nüxna peyaxu i guxü̃ i duü̃xü̃gü i ngéma nüxü̃ pedauxü̃, nax núma chorü petawa naxĩxü̃ca̱x!” ñanagürü.
10Rü yema ãẽ̱xgacüarü duü̃xü̃gü rü ĩanearü namagüwa naxĩ. Rü nüxna nixuetanü ga guxü̃ma ga duü̃xü̃gü ga mexü̃gü rü chixexü̃gü ga nüxü̃ iyangaugüxü̃. Rü yemaacü duü̃xü̃gü ga nüxna naxuxü̃maxã nanapa ga gumá ãẽ̱xgacüpata.
11Rü yexguma gumá ãẽ̱xgacü yema ucapugu ücuxgu nax íyadauxü̃ca̱x ga yema duü̃xü̃gü ga nüxna naxuxü̃, rü yéma nüxü̃ nadau ga wüxi ga yatü ga tama petachirugu icúxü̃.
12Rü ñanagürü nüxü̃: “Pa Chomücüx ¿ñuxãcü i tama petachirugu icúãcü nuxã cuxücu?” ñanagürü. Natürü nüma ga yema yatü rü nangea̱xmare.
13Rü yexguma ga gumá ãẽ̱xgacü rü ñanagürü nüxü̃ ga yema norü duü̃xü̃gü: “¡Mea peyana̱ĩ̱xpara rü peyana̱i̱xchacüxügü i ñaa yatü, rü yéama düxétüwa i ínaxẽanexü̃wa peyatá! Rü ngéma tá narüdoxü rü tá nixü̃́xchapüta erü poraãcü tá nüxü̃́ nangu̱x”, ñanagürü.
14Rü Tupana rü muxũchiena naxu, natürü noxretama tixĩ ya yíxema Tupana tüxü̃ dexe —ñanagürü ga Ngechuchu.
Diẽru i ãẽ̱xgacüna ngĩxü̃ ixãcüchiga
(Mr. 12.13-17; Lc. 20.20-26)
15Rü yexguma ga Parichéugü rü nixĩgachi ga yéma. Rü noxrüwama nügümaxã nayarüdexagü rü naxca̱x nadaugü nax ñuxãcü tá chixexü̃gu Ngechuchuxü̃ nanguxẽxẽgüxü̃ca̱x rü ñu̱xũchi ãẽ̱xgacüxü̃tawa nax ínaxuaxü̃güãxü̃ca̱x.
16Rü yemaca̱x Ngechuchuxü̃tawa nanamugü ga ñuxre ga norü duü̃xü̃gü wüxigu namaxã ga ñuxre ga Eródearü duü̃xü̃gü nax Ngechuchumaxã nüxü̃ yanaxugüexü̃ca̱x ga ore, rü ñanagürügü: —Pa Ngúexẽxẽruxü̃x, nüxü̃ tacua̱x rü aixcüma nixĩ i ngẽma nüxü̃ quixuxü̃. Rü aixcüma cunangúexẽxẽ i duü̃xü̃gü nax Tupana naxwa̱xexü̃ãcüma namaxẽxü̃ca̱x. Rü tama duü̃xü̃gügamare cuxĩnü, erü tama norü düxétüxü̃negu cudawenü, natürü nacüma nixĩ i cungugüxü̃.
17¡Rü tomaxã nüxü̃ ixu! Rü ngẽma diẽru ya ãẽ̱xgacü ya Rómacüã̱x totanüwa ngĩxü̃ yaxucü, ¿rü namexü̃ yixĩxü̃ nax nüxna ngĩxü̃ taxãxü̃ rü ẽ̱xna tama? —ñanagürügü.
18Natürü Ngechuchu nüxü̃ nacua̱xama nax chixexü̃gu naxĩnüexü̃ ga yema duü̃xü̃gü. Rü yemaca̱x ñanagürü nüxü̃: —Pa Duü̃xü̃güpe̱xewa Mea Maxẽnetaxü̃x ¿tü̱xcüü̃ chixexü̃gu choxü̃ pengu̱xẽxẽgüchaü̃xü̃?
19¡Choxü̃ ngĩxü̃ pewé i wüxi i diẽru i ngĩmaxã ãẽ̱xgacüaxü̃́ penaxütanücü! —ñanagürü. Rü yéma naxü̃tawa ngĩxü̃ nangegü ga wüxitachinü ga diẽru.
20Rü yexguma Ngechuchu ngĩxü̃ da̱u̱xgu, rü nüxna naca, rü ñanagürü —¿Texéchicüna̱xã rü texééga nixĩ i ngĩgu üxü̃? —ñanagürü.
21Rü nümagü nanangãxü̃gü, rü ñanagürügü: —Rómacüã̱x ya ãẽ̱xgacü ya tacüchicüna̱xã nixĩ —ñanagürügü. Rü yexguma ga Ngechuchu rü ñanagürü nüxü̃: —¡Ãẽ̱xgacüna ngĩxü̃ pexã i ngẽma ãẽ̱xgacüarü ixĩcü, rü Tupanana ngĩxü̃ pexã i ngẽma Tupanaarü ixĩcü! —ñanagürü.
22Rü yexguma yema orexü̃ naxĩnüegu, rü naba̱i̱xãchiãẽgü. Rü Ngechuchuna ínixĩ.
Ngechuchuna nacagüe rü yuwa ínadagü i duü̃xü̃gü
(Mr. 12.18-27; Lc. 20.27-40)
23Rü yematama ngunexü̃gu rü ñuxre ga Chaduchéugü rü Ngechuchuxü̃tawa naxĩ. Rü nümagü nixĩ ga nüxü̃ yaxugüexü̃ nax yuexü̃ rü tagutáma wena namaxẽxü̃. Rü yemaca̱x Ngechuchuna nacagüe, rü ñanagürügü:
24—Pa Ngúexẽxẽruxü̃x, Moiché nüxü̃ ixuxgu rü ngẽxguma wüxi ya yatü naxãxma̱x rü nangexacüyane nayu̱xgu, rü name nixĩ i naenexẽtama ngĩmaxã naxãxma̱x i ngẽma yutecü i naxüma̱x, nax ngẽmaãcü naxãxacüxü̃ca̱x nüxü̃́ ya yimá naenexẽ ya marü yucü —ñanagürü ga yema ore.
25Rü ñanagürügü ta ga Chaduchéugü: —Nayexma ga totanüwa ga 7 ga nügüenexẽ. Rü naxãxma̱x ga gumá yacü, natürü tauta naxãxacüyane nayu. Rü yexguma ga nai ga naenexẽ nüxĩ́ ngĩmaxã naxãxma̱x ga yema ngecü.
26Rü gumá rü ta nayu, rü nangexacü. Rü yexguma rü nai ga naenexẽ nüxĩ́ ngĩmaxã naxãxma̱x. Rü yemaacü guxcüma ga gumá 7 ga nügüenexẽ rü ngĩmaxã naxãxma̱x ga yema nge. Rü guxcüma nayue tauta naxãxacüyane.
27Rü yemawena rü ngĩma rü ta iyu ga yema nge.
28Rü ngẽxguma yuexü̃ wena maxẽgu, ¿rü ngexcürüücü ga gumá 7 ga nügüenexẽ naxma̱x tá iyixĩ i ngẽma nge? Yerü guxcüma ga gumá 7 ga nügüenexẽ ngĩmaxã naxãxma̱x —ñanagürügü.
29Rü yexguma ga Ngechuchu rü nanangãxü̃, rü ñanagürü: —Pema rü ípetüe erü tama nüxü̃ pecua̱x i Tupanaarü ore i ümatüxü̃, rü tama nüxü̃ pecua̱x i ñuxãcü nax yixĩxü̃ i Tupanaarü pora.
30Rü ngẽxguma yuexü̃wena maxẽgu rü taxúetama tixãxma̱xgü rüe̱xna tixãtegü. Erü daxũcüã̱x i Tupanaarü orearü ngeruü̃gürüxü̃ tá tixĩgü i ngẽxguma.
31Pema choxna peca i yuexü̃arü dagüchiga. ¿Natürü tama ẽ̱xna nawa pengúe i Tupanaarü ore i ümatüxü̃ i ngextá Tupanatama ngẽmachigaxü̃ pemaxã íyaxuxü̃wa? Erü ngéma rü ñanagürü ya Tupana:
32“Choma nixĩ i Abraáü̃arü Tupana, rü Ichaáarü Tupana, rü Acóbuarü Tupana”,
ñanagürü. Rü ngẽma orewa nüxü̃ tacua̱x rü woo ñoma i naanewa nayuegu i duü̃xü̃gü, natürü Tupanaca̱x rü tama nayue rü guxü̃guma namaxẽ —ñanagürü ga Ngechuchu.
33Rü yexguma yemaxü̃ naxĩnüegu ga duü̃xü̃gü, rü guxü̃ma naba̱i̱xãchiãẽgü namaxã ga norü ngu̱xẽẽtae ga Ngechuchu.
Tupanaarü mu i guxü̃ i norü mugüarü yexera ixĩxü̃
(Mr. 12.28-34)
34Rü Parichéugü rü yexguma nüxü̃ naxĩnüegu ga ñuxãcü Ngechuchu rü Chaduchéugüxü̃ nax iyanangea̱xgüxẽẽxü̃ rü nangutaque̱xegü.
35Rü wüxi ga yema Parichéugü ga ore ga mugüwa ngu̱xẽẽtaexü̃ rü Ngechuchuxü̃ chixexü̃gu nangu̱xẽẽchaü̃. Rü yemaca̱x Ngechuchuna naca rü ñanagürü:
36—Pa Ngúexẽxẽruxü̃x, ¿ngexü̃rüüxü̃ i Tupanaarü mu nixĩ i guxü̃ i norü mugüarü yexera ixĩxü̃? —ñanagürü.
37Rü Ngechuchu nanangãxü̃ rü ñanagürü: —Ngẽma Tupanaarü mu i guxü̃ i norü mugüarü yexera ixĩxü̃, rü ñanagürü:
“¡Nüxü̃ nangechaü̃ ya Cori ya curü Tupana i guxü̃ne ya curü maxü̃nemaxã,
rü guxü̃ i cuãẽmaxã,
rü guxü̃ i nagu curüxĩnüxü̃maxã!”
ñanagürü.
38Rü ngẽma nixĩ i Tupanaarü mu i guxü̃ i norü mugüarü yexera ixĩxü̃. Rü ngẽma nixĩ i nüxíraxü̃xü̃ i norü mu ga duü̃xü̃güna naxãxü̃ ga Tupana.
39Rü ngẽma norü taxre i Tupanaarü mu, rü ngẽma nüxíraxü̃xü̃ i norü murüü̃tama nixĩ, rü ñanagürü: “¡Nüxü̃ nangechaü̃ i cumücü ngẽma cugütama cungechaü̃xü̃rüxü̃!” ñanagürü.
40Rü ngẽma taxre i Tupanaarü mugüwa nixĩ i inaxügüxü̃ i guxü̃ma i Tupanaarü mugü ga Moiché ümatüxü̃ rü Tupanaarü orearü uruü̃gü namaxã ngu̱xẽẽtaegüxü̃ —ñanagürü.
¿Texé nane yixĩxü̃ ya Cristu?
(Mr. 12.35-37; Lc. 20.41-44)
41-42Rü yexguma ínangutaque̱xeyane ga Parichéugü, rü Ngechuchu nüxna naca, rü ñanagürü: —¿Ñuxũ ñapegüxü̃ i pema nüxü̃ ya Cristu? ¿Rü texé nane yixĩxü̃? —ñanagürü. Rü nümagü ga Parichéugü rü nanangãxü̃gü rü ñanagürügü: —Cristu rü nũxcümaü̃cü ga ãẽ̱xgacü ga Dabítaxa nixĩ —ñanagürügü.
43Rü yexguma ga Ngechuchu rü ñanagürü: —¿Tü̱xcüü̃ ga Dabí ga norü Corimaxã naxuaxü̃ ga Cristu ga yexguma Tupanaãxẽ ga Üünexü̃ Dabíxü̃ idexaxẽxẽgu? Yerü ga Dabí rü ñanagürü:
44“Tupana rü chorü Cori ya Cristuxü̃ ñanagürü:
‘¡Nua chorü tügünecüwawa rüto ñu̱xmatáta nüxü̃ cuxü̃ charüporamaexẽxẽ i curü uanügü nax namaxã icucuáxü̃ca̱x!’ ”
45¿Natürü ñuxũcürüwa i Dabítaxa yixĩxü̃ ya Cristu ega nümatama ga Dabí rü norü Corimaxã naxuãgu? —ñanagürü ga Ngechuchu.
46Rü taxumaama nanangãxü̃güéga ga yema Parichéugü, rü bai ga wüxi ga oremaxã. Rü yemawena rü guxü̃ma namuü̃e nax Ngechuchuna nacagüexü̃.
Currently Selected:
Ore i mexü̃ ga Matéu ümatüxü̃ 22: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.