Ore i mexü̃ ga Matéu ümatüxü̃ 14
14
Nayu ga Cuáü̃ ga báiü̃xẽẽruxü̃
(Mr. 6.14-29; Lc. 9.7-9)
1Rü yexgumaxü̃cüü ga Eróde ga Gariréaanearü ãẽ̱xgacü rü nüxü̃ naxĩnü ga yema duü̃xü̃gü nüxü̃ ixuxü̃ ga Ngechuchuchiga.
2Rü Eróde rü norü duü̃xü̃gümaxã ñanagürü: —Yimá nixĩ ya Cuáü̃ ga báiü̃xẽẽruxü̃ rü marü wena namaxü̃. Rü ngẽmaca̱x nüxü̃́ nangẽxma i pora nax naxüaxü̃ i ngẽma mexü̃gü i Tupanaarü poramaxã naxüxü̃ —ñanagürü.
3Rü yema ñanagürü, yerü nümatama ga Eróde rü ü̃paacü norü churaragüxü̃ namu nax Cuáü̃xü̃ yayauxgüxü̃ca̱x rü cadénamaxã yana̱ĩ̱xgüãcüma poxcupataü̃wa nagagüãxü̃ca̱x. Rü yemaacü nanaxü ga Eróde, yerü yemaacü naxca̱x íica ga naxma̱x ga Erodía ga naenexẽ ga Ferípe naxma̱xchire̱x ixĩcü.
4Rü Eróde rü Cuáü̃maxã nanu yerü ga Cuáü̃ rü ñanagürü nüxü̃: —Tama name nax cuxuma̱xmaxã cuxãmaxü̃ —ñanagürü.
5Rü Eróde rü Cuáü̃xü̃ nimáxchaü̃, natürü duü̃xü̃güxü̃ namuü̃, yerü guxü̃ma ga duü̃xü̃gü rü nagu narüxĩnüe rü aixcüma Tupanaarü orearü uruxü̃ nax yixĩxü̃ ga Cuáü̃.
6Natürü yexguma norü taunecüarü ngunexü̃wa nanguxgu ga Eróde rü wüxi ga peta naxü. Rü yema petawa rü Erodíaxacü rü íyayüxparachigüxü̃ nape̱xewa ga yema petatanüxü̃. Rü nüma ga ãẽ̱xgacü ga Eróde rü poraãcü norü me nixĩ ga yema naxüxü̃ ga naxacürücü.
7Rü yemaca̱x ngĩmaxã inaxuneta rü ñanagürü ngĩxü̃: —¡Choxna naxca̱x naca i ngẽma cunaxwa̱xexü̃, rü aixcüma tá cuxna chanaxã! —ñanagürü.
8Rü yexguma ga ngĩma rü ngĩéxü̃tawa ixũ, rü ngĩéna iyaca, rü ngĩgürügü: —Pa Ma, ¿ta̱xacü i cunaxwa̱xexü̃ nax naxca̱x íchaca̱xaxü̃? —ngĩgürügü. Rü ngĩé ngĩxü̃ ingãxü̃, rü ngĩgürügü: —¡Naxca̱x ínaca i Cuáü̃ ya báiü̃xẽẽruü̃eru! —ngĩgürügü ga ngĩé. Rü yexguma ga yema pacü rü ngĩgürügü nüxü̃ ga Eróde: —Chanaxwa̱xe i wüxi ya poratugu choxna cunaxã i naeru i Cuáü̃ ya báiü̃xẽẽruxü̃ —ngĩgürügü.
9Rü yexguma ga ãẽ̱xgacü ga Eróde rü inayarümaãchi namaxã ga yema ore, natürü norü unetaca̱x rü norü petatanüxü̃ca̱x rü tama ngĩxü̃ nawomüxẽẽchaü̃. Rü nanamu ga ñuxre ga norü churaragü nax ngĩxna naxãgüãxü̃ca̱x ga yema naxca̱x ínacaxü̃.
10Rü yemaacü poxcupataü̃wa nanamu nax yéma Cuáü̃xü̃ yanadaeeruxü̃ca̱x.
11Rü yemawena wüxi ga poratugu ngĩxü̃tawa nanange ga Cuáü̃eru, rü yema pacüna nayaxã. Rü ngĩma rü ñu̱xũchi ngĩéna iyaxã.
12Rü yexguma ga Cuáü̃arü ngúexü̃gü rü yéma naxĩ, rü nayangegü ga naxü̃ne, rü inayata̱xgü. Rü yemawena rü Ngechuchumaxã nüxü̃ nayarüxugüe.
Ngechuchu rü nanachibüexẽxẽ ga 5,000 ga yatügü
(Mr. 6.30-44; Lc. 9.10-17; Jn. 6.1-14)
13Rü yexguma yemaxü̃ nacuáchigagu ga Ngechuchu, rü nüxicatama wüxi ga nguegu nixüe, rü ínaxũxũ ga yéma. Rü wüxi ga nachica ga taxúema íxãpataxü̃wa naxũ. Natürü ga duü̃xü̃gü rü nüxü̃ nacua̱xgüama ga ngextá nax naxũxü̃. Rü ínachoxü̃ ga norü ĩanegüwa, rü dauxchitagu nawe narüxĩ.
14Rü yexguma nguewa ínaxüegu ga Ngechuchu rü nüxü̃ nadau ga yema muxü̃ma ga duü̃xü̃gü. Rü nüxü̃́ nangechaü̃tümüü̃gü. Rü nanameexẽxẽ ga yema duü̃xü̃gü ga ida̱xaweexü̃ ga naxca̱x yéma nagagüxü̃.
15Rü yexguma marü nachütachaü̃gu rü Ngechuchuca̱x naxĩ ga norü ngúexü̃gü, rü ñanagürügü nüxü̃: —Marü nachütachaü̃, rü ñu̱xũchi taxúema nuxma taxãpata i nua. Rü name nixĩ i ícuyamugü i ñaa duü̃xü̃gü nax ĩanexacügü ya ngaicamana ngẽxmagünewa naxĩxü̃ca̱x, rü ngéma norü õnaca̱x yataxegüxü̃ca̱x —ñanagürügü.
16Natürü ga Ngechuchu rü ñanagürü nüxü̃: —Taxuacüma nawoegu. ¡Rü pematama penachibüexẽxẽ! —ñanagürü.
17Rü nümagü nanangãxü̃gü, rü ñanagürügü: —Natürü nua rü wüxime̱e̱xpü̱x i paũ rü taxre i choxnixicatama toxü̃́ nangẽxma —ñanagürügü.
18Rü Ngechuchu nanangãxü̃ rü ñanagürü: —¡Nua chauxü̃tawa penana! —ñanagürü.
19Rü yexguma ga Ngechuchu rü duü̃xü̃güxü̃ namu nax maxẽte̱xewa natogüxü̃ca̱x. Rü ñu̱xũchi nanade ga yema wüxime̱e̱xpü̱x ga paũ rü yema taxre ga choxnigü. Rü daxũgu nadawenüãcüma Tupanana moxẽ naxã, rü ñu̱xũchi inanabücu ga yema paũgü. Rü norü ngúexü̃güna nanana, rü nümagü rü duü̃xü̃güxü̃ nayanu.
20Rü guxü̃ma ga yema duü̃xü̃gü rü meama nachibüe. Rü yemawena rü 12 ga pexchigü nanapagü namaxã ga yema paũtüchi rü choxnichipe̱xegü ga íyaxügüxü̃.
21Rü yema yéma chibüexü̃ rü 5,000 ga yatügü nixĩ, natürü ga ngexü̃gü rü buxü̃gü rü tama nayaxugü.
Dexáétügu nixũ ga Ngechuchu
(Mr. 6.45-52; Jn. 6.16-21)
22Rü yemawena ga Ngechuchu rü duü̃xü̃güxü̃ íyamugüyane rü wüxi ga nguegu nayachoü̃xẽxẽ ga norü ngúexü̃gü nax yoxni naxtaxaarü tocutüwa naxĩxü̃ca̱x.
23Rü yexguma duü̃xü̃güxü̃ íyamugüguwena rü guma ma̱xpǘnewa ínaxü̃ãchi ga Ngechuchu nax nüxica yéma yayumüxẽxü̃ca̱x. Rü yexma nüxicatama nachütaü̃.
24Natürü ga norü ngúexü̃gü rü naxtaxaarü ngãxü̃tüchíügu nixãgü ga yexguma. Rü tacü ga buanecü ga nawaama cuecü yexma nüxü̃ naxǘ, rü poraãcü nayuape.
25Rü yexguma marü yangunechaü̃gu rü norü ngúexü̃güwe inaxũãchi ga Ngechuchu. Rü dexáchiüétügu nixũ naxca̱x ga norü ngúexü̃gü.
26Rü yexguma norü ngúexü̃gü nüxü̃ daugügu ga dexáchiüétügu nax yaxũxü̃, rü poraãcü naba̱i̱xãchiãẽgü. Rü norü muü̃maxã aita naxüe, rü ñanagürügü: —Wüxi i naxchi̱ximare nixĩ —ñanagürügü.
27Natürü ga Ngechuchu rü namaxã nidexa rü ñanagürü nüxü̃: —¡Peporae! rü choma chixĩ. ¡Rü taxṹ i pemuü̃exü̃! —ñanagürü.
28Rü yexguma ga Pedru rü Ngechuchumaxã nidexa rü ñanagürü: —Pa Corix, ega chi cuma quixĩxgu, ¡rü choxü̃ namu nax choma rü ta dexáétügu chixũxü̃ca̱x rü cuxü̃tawa nax chaxũxü̃ca̱x! —ñanagürü.
29Rü Ngechuchu ñanagürü nüxü̃: —Ẽcü ¡nua naxũ! —ñanagürü. Rü yexguma ga Pedru rü ínaxüe ga nguewa. Rü inanaxügü ga dexáétügu nax yaxũxü̃ nax Ngechuchuxü̃tawa naxũxü̃ca̱x.
30Natürü yexguma nüxü̃ yacua̱xãchigu ga nax naporaxü̃ ga buanecü rü namuü̃, rü inanaxügü nax dexáchiügu nanguxü̃. Rü aita naxü rü ñanagürü: —Pa Corix, ¡choxü̃ rüngü̃xẽxẽ! —ñanagürü.
31Rü yexgumatama ga Ngechuchu rü Pedrume̱xẽgu nayayauxãchi, rü ñanagürü nüxü̃: —Cuma rü írarüwatama cuyaxõ. ¿Rü tü̱xcüü̃ tama aixcüma cuyaxõ? —ñanagürü.
32Rü yexguma nguegu yachoü̃gu ga Ngechuchu rü Pedru, rü nangupetü ga gumá buanecü.
33Rü guxü̃ma ga norü ngúexü̃gü ga nguewa yexmagüxü̃ rü Ngechuchupe̱xegu nacaxã́pü̱xügü rü nüxü̃ nicua̱xüü̃gü, rü ñanagürügü nüxü̃: —Aixcümaxü̃chi cuma nixĩ ya Tupana Nane quixĩxü̃ —ñanagürügü.
Yenecharéxanewa Ngechuchu nanameexẽxẽ ga ida̱xaweexü̃
(Mr. 6.53-56)
34Rü yexguma marü yanguü̃gu ga naxtaxawa, rü Yenecharéxanewa nangugü rü yéma ínachoü̃.
35Rü yexguma yema duü̃xü̃gü ga yémacüã̱x nüxü̃ icua̱xãchitanügu nax Ngechuchu yixĩxü̃ ga gumá, rü guxü̃ma ga yema naanewa nanguchiga ga yéma nax nayexmaxü̃ ga Ngechuchu. Rü yemaca̱x naxü̃tawa nanagagü ga yema ida̱xaweexü̃.
36Rü Ngechuchuxü̃ naca̱a̱xü̃gü nax naxchirupechinügumare yangógügüxü̃ca̱x. Rü guxü̃ma ga yema naxchirupechinügu ingógügüxü̃ rü narümexe.
Currently Selected:
Ore i mexü̃ ga Matéu ümatüxü̃ 14: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.