Popera ga Epéchiuwa yexmagüxü̃ ga yaxõgüxü̃tanüwa namuxü̃ ga Pauru 1
1
Pauru rü nüxü̃ narümoxẽ ga yema yaxõgüxü̃ ga Epéchiuarü ĩanewa yexmagüxü̃
1Pa Chauenexẽgü ya Epéchiuwa Ngẽxmagüxe, choma i Pauru pexca̱x chanaxümatü i ñaa popera. Rü choma nixĩ ya Tupana choxü̃ yaxuxü̃ nax Ngechuchu ya Cristu choxü̃ muxü̃ca̱x nax nüxü̃ chixuxü̃ca̱x i norü ore. Rü pexca̱x chanaxümatü i guxãma i pema ya Epéchiuarü ĩanewa ngẽxmagüxe ya Tupanaarü duü̃xü̃gü ixĩgüxe ya Ngechuchu ya Cristuaxü̃́ yaxõgüxe.
2Rü chanaxwa̱xe i pexü̃ nangechaxü̃ rü pexü̃ nataãẽxẽxẽ ya Tanatü ya Tupana rü tórü Cori ya Ngechuchu ya Cristu.
Tupana rü tüxü̃ narüngü̃xẽxẽ erü Cristuarü duü̃xü̃gü tixĩgü
3Rü name nixĩ i nüxü̃ ticua̱xüü̃gü ya Tanatü ya Tupana ya tórü Cori ya Ngechuchu ya Cristunatü ixĩcü. Erü nüma ya Tupana rü Cristugagu tüxna nanaxã i naguxü̃raü̃xü̃ i ngü̃xẽẽgü i üünexü̃ i daxũguxü̃ i naanewa taxca̱x ne namugüxü̃.
4-5Rü taxũtáma naane uxgu, rü Cristugagu Tupana tüxü̃ nade nax ixüünegüxü̃ca̱x rü nax nataxuxü̃ca̱x i tórü chixexü̃ i nape̱xewa. Rü nüma ya Tupana rü poraãcü tüxü̃ nangechaü̃, rü yemaca̱x nũxcümamatama tüxü̃ naxuneta nax Ngechuchugagu naxacügüxü̃ tüxü̃ nadexü̃ca̱x. Rü yemaacü nanaxü ga Tupana yerü yema nixĩ ga norü ngúchaü̃.
6Rü yemaacü nanaxü ga Tupana nax guxü̃guma nüxü̃ icua̱xüü̃güxü̃ca̱x naxca̱x i norü ngechaü̃ rü norü mecüma ga yexguma taxca̱x núma namuãxgu ga Nane ya nüxü̃ nangechaü̃xü̃chicü.
7Rü Tupana rü poraãcü tüxü̃ nangechaü̃, rü yemaca̱x nanamu ga Nane nax taxca̱x nayuxü̃ rü nagü ibaxü̃ nax yemaacü tüxü̃ ínanguxü̃xẽẽü̃ca̱x rü tüxü̃́ nüxü̃ iyanangümaxü̃ca̱x ga tórü pecadugü.
8Rü yemaacü Tupana tüxü̃ nüxü̃ nadauxẽxẽ nax poraãcü tüxü̃ nangechaü̃xü̃, rü yemaacü tüxna nanaxã ga taxü̃ ga cua̱x nax tüxü̃́ natauxchaxü̃ca̱x i norü ore rü taãẽxü̃ icuáxü̃ca̱x.
9Rü tüxü̃ nüxü̃ nacua̱xẽxẽ ga norü ngúchaü̃ ga noxri nüxicatama nüxü̃ nacuáxü̃. Rü yema norü ngúchaü̃ ga nũxcümaxü̃chima Cristumaxã nagu naxĩnüxü̃ ga Tupana, rü yema nixĩ ga ñoma ga naanewa nax namuaxü̃ nax tüxü̃ yamaxẽxẽẽxü̃ca̱x.
10Rü ngẽxguma norü ngunexü̃ nawa nanguxgu i ngẽma Tupana nagu rüxĩnüxü̃, rü tá Cristume̱xẽwa nanangexmaxẽxẽ i guxü̃ma i daxũguxü̃ i naanewa ngẽxmaxü̃ rü guxü̃ma i ñoma i naanewa ngẽxmaxü̃.
11Yerü woetama nũxcüma ga Tupana rü tamaxã nanaxuegu nax Cristugagu tá nayauxgüxü̃ i maxü̃ i taguma gúxü̃, yerü yema nixĩ ga nagu naxĩnüxü̃ ga Tupana ya norü ngúchaü̃ãcü naxücü i guxü̃ma.
12Rü yemaacü Tupana tamaxã nanaxuegu nax yixema i yixira Cristuaxü̃́ yaxõgüxe nüxü̃ icua̱xüü̃güxü̃ca̱x naxca̱x i norü pora i üünexü̃.
13Rü yexgumarüxü̃ ta ga pema i Epéchiucüã̱xgü, rü yexguma nüxü̃ pexĩnüegu i ngẽma ore i aixcüma ixĩxü̃ i tüxü̃ maxẽxẽẽxü̃, rü Cristuaxü̃́ peyaxõgü. Rü yexguma ga Tupana rü pexna nanamu ga Naãxẽ ya Üünexü̃ nax wüxi i cua̱xruxü̃ yixĩxü̃ca̱x nax aixcüma norü duü̃xü̃gü pixĩgüxü̃.
14Rü ngẽma Naãxẽ ya Üünexü̃ ga Tupana tüxna muxü̃, rü ngẽmawa nixĩ i nüxü̃ icuáxü̃ nax aixcüma Tupana tá tüxna naxãxü̃ i guxü̃ma i ngẽma tamaxã inaxunetaxü̃. Rü ngẽxguma wena núma naxũxgu ya Cristu nax nügüxü̃tawa tüxü̃ nagagüxü̃ca̱x rü aixcüma tá tanayaxu i guxü̃ma i ngẽma Tupana tamaxã nüxü̃ ixuxü̃. Rü ngẽmaca̱x nüxü̃ ticua̱xüü̃gü ya Tanatü ya Tupana ya Üünecü.
Pauru rü yaxõgüxü̃ca̱x nayumüxẽ
15-16Rü ngẽmaca̱x, ñu̱xma nax nüxü̃ chacuáxü̃ nax aixcüma tórü Cori ya Ngechuchuaxü̃́ peyaxõgüxü̃ rü nax aixcüma nüxü̃ pengechaü̃güxü̃ i guxü̃ma i ngẽma togü i Tupanaarü ixĩgüxü̃, rü ngẽmaca̱x taguma nüxü̃ charüchau nax Tupanana pexca̱x moxẽ chaxãxü̃ rü pexna chacua̱xãchixü̃ i chorü yumüxẽwa.
17Rü ngẽxguma namaxã chidexagu ya Tanatü ya Tupana ya Üünecü ya Nanatü ya tórü Cori ya Ngechuchu ya Cristu, rü naxca̱x nüxna chaca nax pexca̱x nango̱xẽẽxü̃ i ngẽma cua̱x i Naãxẽ ya Üünexü̃wa ne ũxü̃ nax aixcüma Tupanaxü̃ pecuáxü̃ca̱x.
18Rü Tupanana naxca̱x chaca nax nümatama pexü̃ yango̱xnaãẽxẽẽxü̃ca̱x, nax nüxü̃ pecuáxü̃ca̱x nax ta̱xacü yixĩxü̃ i ngẽma ípenangu̱xẽẽxü̃ i naxca̱x pexca̱x naca̱xaxü̃ rü pexü̃ nadexü̃. Rü nüxna naxca̱x chaca nax pexü̃ nüxü̃ nacua̱xẽẽxü̃ca̱x nax namexẽchixü̃ i ngẽma maxü̃ i taguma gúxü̃ i nüma norü duü̃xü̃güca̱x namexẽẽxü̃ i daxũguxü̃ i naanewa.
19-20Rü ngẽxgumarüxü̃ ta nüxna naxca̱x chaca nax pexü̃ nüxü̃ nacua̱xẽẽxü̃ca̱x nax ñuxãcü naporaxüchixü̃ i norü pora i tawa ngẽxmaxü̃. Rü ngẽma poramaxã nixĩ ga yuwa Cristuxü̃ ínadaxẽẽxü̃ rü daxũguxü̃ ga naanewa nagaãxü̃ rü nügüarü tügünecüwawa yanatoxẽẽãxü̃.
21Rü yemaacü guxü̃étüwa nanayexmaxẽxẽ. Rü ngẽmaca̱x i ñu̱xma rü Cristume̱xẽwa nangẽxmagü i guxü̃ma i daxũguxü̃ i naanecüã̱x i ãẽ̱xgacügü rü guxü̃ma i ñoma i naanecüã̱x i ãẽ̱xgacügü rü guxü̃ma i pora i ñu̱xma ngẽxmagüxü̃ rü guxü̃ma i pora i yixcüra tá ngẽxmagüxü̃.
22Rü yemaacü ga Tupana rü marü Cristume̱xẽwa nanayexmagüxẽxẽ ga guxü̃ma. Rü yexgumarüxü̃ ta Cristuxü̃ ningucuchixẽxẽ nax guxü̃ma i yaxõgüxü̃eru nax yixĩxü̃ca̱x.
23Rü ñu̱xma rü guxü̃ma i yaxõgüxü̃ rü wüxigu Cristume̱xẽwa nangẽxmagü rü nüma rü nawa nangẽxma. Rü ngẽxgumarüxü̃ ta nawa nangẽxma i guxü̃ma i ta̱xacü i ngẽxmagüxü̃.
Currently Selected:
Popera ga Epéchiuwa yexmagüxü̃ ga yaxõgüxü̃tanüwa namuxü̃ ga Pauru 1: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.