MATIUS 2
2
To mia-mian anu nolengkat mae sasu kabete'an
1I Yesus i hampeakon i kota Betlehem i tano' Yudea tempo'nyo i Tomundo Herodes nompalentah. Tempo'nyo aitu to pia-piangkuka na anu pande monsumbu' ilimu' nu mandala' nolengkat mae sasu kabete'an tinokamo i Yerusalem. 2Aha nompokilawa iyayamae, “Iyamae na Anak aijo', anu i hampeakon da timbali Tomundo nu mian Yahudi? Tinoamo mami na mandala'-Nyo binete' i sasu kabete'an, ka' kami toka da monsombah Ia.”
3Salatan i Tomundo Herodes nohongomo han aijo', ia tinolokengkeng hondo, sumo aitu mule' iwi-iwi' na mian nu Yerusalem. 4Jadi ia nonsaimo iwi-iwi' na kapala nu imam tiba to gulu-gulu' agama bansa nu Yahudi toka mae silimu'. Lapas aitu ia nompokilawamo hi aha, “Iyamae na kinahampean nu Tomundo anu jinanji'mo nu Tumpu?”
5Aha nontaami, “I kota Betlehem i tano' Yudea. Kalana sumo uuka na tinulis nu samian na nabi,
6 #
Mi. 5:1
‘Beleyum Betlehem, i tano' nu Yehuda,
beleyum misa' anu talalo ise' i to kota-kota anu penting i Yehuda.
Kalana lengkat hi beleyum tokaje na samian anu bau polaya'
anu molaya' mian-Ku Israel anu palesayamo.’ ”
7Salatan nohumpak katalangan aijo', i Herodes nolagamo hoko-hokot anu pande monsumbu' mandala' anu lengkat mae i sasu kabete'an. Lantas ia nompokilawa hi aha naipian na katantuannyo mandala' aijo' tinoa. 8Lapas aijo' ia nompokau aha namba i Betlehem ka' nompotuun sumo uuka, “Lako', lio na Anak aijo' ka' opalesa hondo-hondo. De komiu mongkabotmo Ia, poto'i mae hi belengku, da aku suele mamba monsombah Ia.”
9-10Lantas aha nambamo. Aha nontoa mule' mandala' anu tinoa nu aha uuka mae i sasu kabete'an. Sangkeheng ahi' na kolame'nyo nu aha nontoa mandala' aijo'! Mandala' aijo' saja' mamba i moona moliu-liu aha, lantas binelenti pas-pas hondo i patak nu tampat nu Anak aijo'. 11Aha ninsoop i uno nu laigan aijo', ka' nontoa Anak aijo' tiba i Maria, tina-Nyo. Aha tinolodupu ka' nonsombah Anak aijo', lantas nombukai tampat halata' nu aha, ka' nonsombahkon hi ia mosoni', kamangian, ka' mur. 12Tumpu nompokinde'i hi aha i uno nu ipion da boli minsusule' hi Herodes. Jadi aha ninsusule'mo nontului jalan sangga'atan.
Nalai nokiijo' i Mesir
13Salatan to pande-pande anu monsumbu' mandala' aijo' i nambamo, Malaikat nu Tumpu nanintoamo hi Yusuf i uno nu ipion. Malaikat aijo' notatae, “I Herodes ko kahanda' molio Anak aijo' da o patei na Ia. Kalana aijo' bulamo, boa na Anak aijo' tiba tina-Nyo malai nokiijo' i Mesir. Jojoong i kiijo' mae sampe-Ku poto'ije mule' hi beleyum.”
14I Yusuf nobula, ka' pihi-pihi aitu mule' ia nomboamo Anak aijo' tiba tina-Nyo nalai nokiijo' i Mesir. 15#Hos. 11:1 Aha jinojoong i kiijo' mae sampe i Herodes sinilakamo.
Sahingga tinimbalimo apaa na anu tinaeakon nu Tumpu anu pinoto'inyo hi nabi-Nyo, sumo uuka, “Aku molaga Anak-Ku lengkat i Mesir.”
Pinompateian to ana-anak
16Salatan sinumbu' i Herodes taalu' anu to pande-pande monsumbu' mandala' lengkat i sasu kabete'an aitu nongakalimo ia, ia pinusamo hondo. Lantas ia nompalentahkon anu mompatei iwi-iwi' to ana-anak mo'ane anu umunnyo i aluk nu ohua' na taun. I Betlehem ka' i anu mompaha ohani. Aijo' sosok tiba katalangan anu i humpaknyo lengkat hi anu to pande-pande monsumbu' mandala' aijo' kakona tempo'nyo mandala' aijo' kinantoaan.
17Sumo aijo' na tinimbali apaa na anu toho' tinaloakon i Nabi Yeremia, aijo'mo,
18 #
Yer. 31:15
“I kampung Rama kinahongoan,
kihis ka' tando' tiba haang.
I Rahel nontando'i to ana-anaknyo;
ia madi' mongka'oho' o indeko' sabab aha i madi'mo.”
Ninsusule'mo lengkat mae i Mesir
19Noko sinilaka na i Herodes, tempo'nyo i Yusuf daagi' i Mesir samian na malaikat nu Tumpu nanintoa mule' hi Yusuf i uno nu ipion. 20Malaikat aijo' notatae, “To mia-mian anu mongka'oho' mompatei Anak aijo' sinilakamo. Kalana aitu bulamo, ala na Anak aijo' tiba tina-Nyo ka' pinsusule'mo mamba i Israel.” 21I Yusuf mule' nobula lantas nomboa Anak aijo' tiba i Maria i ninsusule' nokiijo' i Israel.
22Panyo lapas i Yusuf nohongo saba' i Arkelaus, anak mo'ane i Herodes nombolosakonmo tuumanyo tinimbali tomundo i tano' Yudea. Jadi i Yusuf nabuhukmo namba nokiijo'. Salatan ia nompaka humpakmo pokinde' nu Tumpu i uno nu ipion, ia nambamo nokiijo' i tano' nu Galilea. 23#Mrk. 1:24, Luk. 2:39, Yoh. 1:45 I kiijo' ia jinojoong i kota sanggonyo Nazaret. Sahingga sumo aitu jinadimo apaa na anu tinaloakon nu to nabi-nabi mongkona Anak aitu: “Ia o sanggo Mian nu Nazaret.”
Currently Selected:
MATIUS 2: LAILOE
Highlight
Share
Copy
Want to have your highlights saved across all your devices? Sign up or sign in