24
1kaunah sandi walsah ma tatuna yakat sau ū yakat pukkau nawatwi uinadai, kahnin dini walalapni balna ridi yayamnadai kidika duwi uinadai. 2Witingna uiwi kakana mani kat, kipala as sau ū yakat taihna sakdai kidika laih pāni yakat disdai; 3dawak ka'yaklalana, kaunah Dawan Jisas muihninuh kidika laih yayakwasdai. 4Uba palni muihsakdadauna dai, sirihni palni tatalwakat witingna yaihnitna yakat muih ahal bu raudai, praknina kidika laih yaringni dai. 5Yamaduwi sau kat abubukna dai; kaunah kidika ahalni balna yaklau witingna yakat aput diyuyulna dai:
—¿Manna ais yulni muih dadauna balna pasyakat waltamanah sangka kidika muihni yakat? 6Akat diski, kaunah watwi yaklauna. Galilea yakat sakdai mani ais manayulna dai kidika ismangnakattanauh: 7muih Walanibis al kidika laih dutni yamyang balna tingnina yakat kana karangki, pan prihni yakat ilwi papana karangki dawak ma bās yakat watwi yaklauwarangki.#Mt 16:2117:22-2320:18-19Mk 8:31Mk 9:3110:33-34Lc 9:2218:31-33
8Bahang witingna laih Jisas yulni balna dai kidika isningnakatna dai, 9dawak sau ū kaupak nawatwi aina mani kat adika dini balna bitik apostel balna 11 yakat dawak muih ūk balna yakat bik diyuyulna dai. 10Apostel balna yakat uiwi yul diyuyulna balna kidika laih adika muihni balna dai Mery Makdalen, Jims nanangni Mery, dawak yayal ūk balna kidika kauna. 11Kaunah apostel balna laih di dauh kukulna dai yayal balna yuyulwa kidika, dawak rahm dikukulwasdai.
12Kaput kaunah, Pita laih sau ū yakat kiri kiunadai; dawak pasyakat talna mani kat, dangrina balna kidika manah bangkat talna dai. Bahang di kalahna kidika yakat yamni talwi ū yakat nawatwi kaina dai.
Emaús tani yakat
(Mk 16:12-13)
13Sihm kidika mani, disaipil balna kaupak bu kidika tawan as ayangni Emaús niningyakat uinadai, Jerusalén kaupak kilómetro 11. 14Di balna kalahna kidika yulni yulbauwīnah uiwatuludai. 15witingna laih yulbabauwakat, Jisas witing palni yaihnitna yakat kaiwi witingna karak kalpakwi lapakna dai. 16Kaunah witingna tatalwadai karang bik, di as niningnakauh yaklauwadai waispa amanglawas atninna. 17Jisas yaklau diyulwi dakana:
—¿Manna ais yulni yultinah yawamanah ta yakat?
Kulninna bukna karuk wawatna dai, 18dawak witingna kaupak as, ayangni laih Cleofas yaklau, nangnitlana:
—¿Manyah Jerusalén yakat sakmandai kidika dawak kidika pāni yakat di kalahna kidika amanglatasman kidika?
19Jisas yaklau kalyulwi dakana:
—¿Ais kalahnayah?
Witingna yaklau kalyuyulna:
—Jisas Nazaret kaupak kidika, prapit as parasni nuhni duwadai kidika di balna yamwa yakat dawak yulbauwa balna yakat bik Papang muhni yakat dawak tawan muhni yakat bik; 20dawak sumalyang balna taninatuna balna dawak ma laki tunan muihni balna yaklau muih ūk balna tingnina yakat ahana īna atninna dawak pan prihni yakat bik ilwi pana atninna. 21Yangna laih tahanin lani dutayangna dai witing yaklau Israel ninisan kidika laihwi yakna atnin. Kaunah uman ma bās bayakna kidika dini balna bitik kalahna kaupak. 22Yayal balna buas yangna karak bang kidika yaklau bilkinalalauna, kat payahlanin manah sau ū yakat uinadai, 23dawak Jisas muihninuh kidika yakwas dadanadai bahang, ū yakat nawatwi aina dai. Dawak insal balna buas witingna yakat kalahwi diyulna Jisas laih sangka ki. 24Usnit kat yangna karak kaltalyang yayamni dutayangna kidika sau ū yakat uinadai dawak yayal balna amput yuyulna dai kat kaput tatalna dai, kaunah Jisas yakat laih kaltatalwasdai.
25Bahang Jisas yaklau aput diyulna:
—¡Amput dawakat manna tanka dutasmanah dawak prapit balna yuyulna kidika yakat bik rahm kultasmanah! 26¿Ais Mesías kidika adika dini balna yakat wauhwas atnindaikatpah ayangni nuhni yamwas tanitkauh?
27Usnit kat ulna balna yakat witing yulni yuyulwa kidika tannika bitik lāih yakwi diyulna dai, Moses wauhnitaya balna kidika tatuna dawak usnit kat prapit balna wauhninataya kidika.
28Uiwa tawanni yakat uiwi kakana mani kat, Jisas laih tanityakat kiwarang kapat yamnadai. 29Kaunah witingna yaklau laihwawatna dai, aput kalyulwinah:
—Yangna karak wattah, kat uman ma pukna. Puksani kalwi.
Bahang Jisas laih ū pasyakat kawi witingna karak watnadai. 30Tibil yakat uman yalahna bangkat, plawar busna kidika tingni yakat duwi Papang yakat tingkih kalana usnit kat, bahwi diana dai. 31Kidika minitni yakat miniknapa kidika uluhna dai dawak Jisas yakat amangnilalana dai; kaunah witing laih disna dai. 32Dawak biri biri aput yulwi dakakana dai:
—¿Rahm awasyah maising kidika daihni dai mapaski yakat ta yakat yulmaibauwinah kaiwakat dawak ulna balna kidika maisumalwakat?
33Baisa bik tahawas nawatwi ta yakat kalahwi Jerusalén yakat aina dai, apostel balna 11 dawak kaltalyang yayamni balna kidika kauna kaluduhna bangdai kidika yakat, 34aput diyuyulna dai:
—Rahm palni Dawan laih watwi yaklauna, dawak Saiman yakat kalkalahna.
35Bahang witingna albupak diyuyulna dai ta yakat ais dikalahna dai kidika, dawak Jisas yaklau plawar busna bahwakat amput amangnilalana dai kidika bik.
Jisas disaipil balna yakat kalahna kidika
(Mt 28:16-20; Mk 16:14-18; Jn 20:19-23)
36Witingna laih kidika dini baisa yulwabangkat Jisas laih witingna bangkidika papusyakat yaklauna dai dawak aput yulwinah diparasna dai:
—Manna yakat kulnin aslah lani.
37Witingna laih uba palni muihsakdadauna dai, spirit as tatalwa kuduhti. 38Kaunah Jisas yaklau diyulna:
—¿Ais yulni muihsakdautamanah? ¿Ais yulni manna ismangna yakat rahm kulnin lani kidika dismanah? 39Tingki balna dawak kalki balna yakat talnauh. Sihm yang. Yalaihta talnauh: spirit as kidika laih muihni dawak wakalni bik diski, manna yatalamana yang laih wakalki dutayang.
40Kidika diyulna usnit kat, tingni balna kidika dawak kalni balna kidika bik niningnakana dai. 41Kaunah witingna laih rahm kukulwasdai bahang, alasna kidika yulni dawak amanglalawasdai kidika yulni, Jisas yaklau diyulwi dakana:
—¿Manna akat kasnin dini dutamanah?
42Waspa dini busna#24.42 Tingkau ulna balna as as yakat laih aput minitlalakwi: dawak amak ūni as. kat apis kalalana dai, 43dawak witing laih duwi witingna muhnina yakat kasna dai. 44Usnit kat aput diyulna:
—Di as tikini yataihna dai kidika laih manna karak yang mani manayulnayang dai dini kidika ki: kidika dini balna laih bitik kaput kalahnin dai yang yulki ulna balna kidika Moses lani balna yakat, prapit balna wauhninataya yakat dawak salmo balna yakat bik.
45Bahang witing yaklau diyamwakat ulna balna kidika amanglalana dai, 46dawak aput diyulna:
—Ulna ki Mesías kidika laih daunin dai, dawak ma bās yakat watwi yaklauna atnin, 47dawak witing ayangni usnit yakat nisan balna bitik yakat diyuyulwakat Papang yakat wiryaklana atninna, witing yaklau dutnina kidika dawakat disna atnin. Jerusalén kaupak tunan bahna atnin, 48manna laih adika dini balna yulni witnis atnamna ki. 49Dawak yang lawik manna mamatna yakat sihki ki Papangki yaklau pramis kalahna dini kidika.#Ap.w 1:4 Kaunah manna laih akat wattanauh, Jerusalén tawanni nuhni akat, mampat mani kisang kaupak parasni kaiwa kidika dutanama kat.
Jisas kisang yakat kilwi kiuna kidika
(Mk 16:19-20)
50Usnit kat Jisas yaklau tawan nuhni kidika kaupak naikau diduwi kiunadai, Betania kat, dawak tingni dulauwi blis diyamna dai. 51Dawak blis di yamwasakkauna, witingna kaupak naikau kalahwi kisang yakat kilwi kiunadai.#Ap.w 1:9-11 52Witingna laih Jisas yakat ayangni nuhni yayamna usnit kat, alasna Jerusalén yakat nawatwi uinadai. 53Dawak ma balna bitik yakat makat yulnin ūni yakat bangdai, Papang yakat ayangni nuhni yamwīnah.
Loading reference in secondary version...