Luk 18
18
Yal tingmak dawak wihta karakmalni yulni
1Jisas yaklau malni yulni as diyulna dai amput kulninna bukwas ban kaput minitna yulninna kidika disumalna atnin yulni. 2Aput diyulna dai: “Tawan as yakat wihta as sakdai witing laih Papang yakat yamaniduwasdai dawak muih balna yakat bik rispik lani diawasdai. 3Sihm kidika tawanni yakat yal tingmak as sakdai witing laih muih ūk karak kalbilna dai dawak wihta yakat kiunadai la kat kidika yamna atnin witing niningkauh yaklauwa muihni kidika niningyakat. 4Wihta kidika laih ma mahni yal tingmak lani kidika yamnin yulwasdai, kaunah usnit kat aput kulna: ‘Papang yakat yamanidutasyang karang bik dawak muihni balna yakat risninapik lani diatasyang karang bik, 5kaput kaunah, adika tingmak yal laih yauswa kidika dawas bahang, tanit dakki ki, baisa baisa kaiwi kulnik laihwatnik lani kidika disnin awas yulni.’ ”
6Dawak Dawan yaklau minitlakwi yulna: “Wihta dutni kidika laih aput yulna dai. 7Bahang yamni, ¿ais Papang bik witing walwi yakna balna kidika yakat tanitna dakwas karangyah, madah bitik dawak pukta bitik yakat kalyuyulwa balna kidika? ¿Diyulwakat tahahawarangpah? 8Manayultayang tahawas tanitna dakwarang ki. Kaunah muih Walanibis al kidika kaiwarang mani kat, ¿sau akat muih balna rahm kulnin lani duduwa kidika baisa duduwa kat yakwarangpah?”
Fariseo muihni dawak tunan minitdakyang muihni karakmalni yulni
9Jisas yaklau adika malni yulni yulna dai muih buas balna la kat kaldakawi muih ūk balna yakat dutni diyayamwa dai kidika balna yulnina: 10“Muih ahal bu makat yulnin ūni yakat minitna yulna uinadai: as kidika laih fariseo muihni dai dawak ūk kidika laih Roma dini tunan minit dakyang muihni as dai. 11Fariseo muihni kidika laih kasakni aput minityulwadai: ‘Papang, yang tingkih matayang kat muih ūk di malyang balna, dutni muihni balna dawak marid lani bahyang balna, dawak bik tunan minit dakyang muihni kidika kapat awasyang kidika yulni. 12Yang laih sandi as pasyakat wat bu yuh wauhtayang dawak ais dutayang kidika kaupak sahyakna salap kidika bik matayang.’ 13Kaunah tunan minit dakyang muihni kidika laih naikau watnadai, dawak minikpa balna kidika kisang yakat bik wauhyaklauwi talwasdai, kaunah pasni yakat bauwi aput yulwadai: ‘¡Papang, yang yakat mikun yatalah, yang laih dutni muihniyang adika!’ 14Manayultayang kidika tunan minit dakyang muihni kidika laih Papang yaklau dutni dawak diswakat ūni yakat kiunadai, kaunah fariseo muihni kidika laih kaput awasdai. Kat angdika muihni witing alas nuhni kalyamwa kidika laih, sau yakat lakna karangki; dawak angdika muihni sau yakat bukwa kidika laih, nuhni kalyamna karangki.”#Pro 29:23; Mt 23:12; Lc 14:11.
Jisas yaklau muihbinina yakatblis diyamna kidika
(Mt 19:13-15; Mk 10:13-16)
15Jisas yakat bik muihbinina uiwi kalalawadai, dilaihna atnin yulni; kaunah disaipil balna tatalna mani kat, duwi uiwa muihni balna yakat dibibilna dai. 16Bahang Jisas yaklau diyulwak uiwakat diyulna:
—Datanangkat muihbinina kidika yang yakat aiwang, dawak dilaihwawatwinih, kat Papang king kāwa sauni kidika laih witingna kapapat kidika dinina. 17Barangni manayultayang angdika muihni kat Papang king kāwa sauni kidika sihm muihbin kapat duwas karangkat, kidika yakat kawas karangki.
Muih al di duyang as Jisas karakyulbauna kidika
(Mt 19:16-30; Mk 10:17-31)
18Tunan muihni balna kidika kaupak as yaklau Jisas yakat kalyulwi dakana:
—Maestro yamni, ¿ais yamtik ban sangka atnin lani kidika dukiyah?
19Jisas yaklau nangnitlana:
—¿Ais yulni yamni yatimahn? Yamni kidika laih aslah ki: Papang. 20Man lā balna kidika uman amanglataman: ‘Man marid lani bahwinih,#Ex 20:14; Dt 5:18. muih īwinih,#Ex 20:13; Dt 5:17. di malwinih,#Ex 20:15; Dt 5:19. muih as kau bik alasni yulwinih,#Ex 20:16; Dt 5:20. dawak papangma dawak nanangma yakat rispik diyamtah.’#Ex 20:12; Dt 5:16.
21Muih al kidika yaklau kalyulna:
—Kidika dini balna bitik laih yamnayang wahmabin yang kaupak.
22Kidika dakawi Jisas yaklau nangnitlana:
—Baisa di as yamtasman: di balna dutaman kidika bitik bakanmukta muih miniknakunni balna yakat diatah. Kaput laih kisang yakat rits lani kidika duma. Usnit kat aiwa uskit uitah.
23Kaunah muih al kidika adika yulni dakana kat, uba palni kulnin bukna dai, kat di duyang dai kidika yulni. 24Kidika kaput kaltalwi Jisas yaklau kalyulna:
—¡Di duyang balna Papang king kāwa sauni yakat kaninna kidika laih dadasni palni ki!#Pro 11:28. 25Baisa isi ki kiamil as silip minikpa munah bayakna atnin dawak di duyang muihni as Papang king kāwa sauni yakat kanin karak dawakat.
26Dakakana muihni balna kidika yaklau kalyulwi dakakana:
—¿Dawak wais laih laihwi yaknin lani kidika dunin sipyah?
27Jisas yaklau nangnitnalana:
—Muih balna niningna yakat dadasni kidika laih Papang niningyakat dadasni awaski.
28Pita yaklau kalyulna:
—Dawan, yangna laih dikina balna bitik damuktik man usmat uinayangna.
29Jisas yaklau nangnitnalana:
—Barangni manayultayang angdika muihni Papang king kāwa sauni yulni ūni, yalni, wirahni balna, papangni balna, kidik awaskat walanibis balna dana kat, 30witing sangka mani balna yakat laih kidika kaput baisa minitkau duwarang ki, dawak sangnika tanitkau kaiwarang kidika yakat laih sangka ban atnin lani kidika duwarang ki.
Jisas witing daunin wat bas yakatyulna kidika
(Mt 20:17-19; Mk 10:32-34)
31Jisas yaklau disaipil balna 12 kidika naikau diyulwakat uiwak aput diyulna: “Waralaih Jerusalén yakat mawi, kidika yakat di balna bitik kalahwarang ki prapit balna yaklau muih Walanibis al yulni uhulna kidika kaput. 32Bahang pa ūk muihni balna tingnina yakat ahawarang ki, dawak witing yakat sarahni kaltatalwarang ki, niningkauh dutni kalyuyulwarang ki dawak bik susuihwas kaltutuhwarang ki. 33Babauwarang ki dawak ihiwarang ki; kaunah ma bās yakat watwi yaklauwarangki.”
34Witingna laih kidika dini di as bik amanglalawasdai ais yulni diyulwapa, bahang kidika dini balna laih witingna amanglaninna dini awasdai.
Jisas yaklau Jericó yakatmuih minikpa di talwas as yakatyamni kalyamna
(Mt 20:29-34; Mk 10:46-52)
35Jisas witing Jericó yakat kiwi kanin manah ulis dana mani kat, muih minikpa di talwas as ta yaihnit yakat yalahna lalah yulwasakdai kidika, 36muih mahni bayayakwakat dakawi, yulwi dakana dai ais kalahwapa. 37Jisas Nazaret kaupak kidika bayakwi kalatwi kalyuyulna dai, 38dawak witing laih parasni sarahwi aput yulna:
—¡Jisas, Devid Walanibis, yang yakat minikun yatalah!
39Tuna yakat uiwabang muihni balna kidika yaklau bibilna dai ap dana atnin, kaunah witing laih baisa parasni sarahwadai:
—¡Devid Walanibis, yang yakat minikun yatalah!
40Jisas laih watwi diyulna dai duaiwi kalana atninna. Yaihnit yakat kaina mani kat, aput kalyulwi dakana:
41—¿Man yulma ais yamnik kidika dukih mawih?
Muih minikpa di talwas kidika yaklau nangnitlana:
—Dawan, mikpa kidika di talnik dukih yawi.
42Jisas yaklau kalyulna:
—¡Man mamakpa dutah! Man rahm kulnin lani dutaman kidika yulni yamni mayamna.
43Kidika minitni yakat muih minikpa di talwasdai kidika laih di talna dai, dawak Jisas usnit uiwi kiunadai Papang yakat ayangni nuhni yamwīnah. Dawak muih balna mahni tatalna kidika bik Papang yakat ayangni nuhni yayamna dai.
Currently Selected:
Luk 18: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998