YouVersion Logo
Search Icon

Jonás 1

1
Jonás Papang kaupak kirana
1Papang yaklauwi Jonás#2 Re 14:25. yakat kiuna, Amitai walanibis yakat, dawak aput kalyulna: 2“Nínive tawanni nuhni yakat yawah, dawak diyulta yang lawik kidika tawanni dispamki ki, kat yang muhki kat witingna dutnina kidika kiwi kana.”#Nah 1:1; 3:1-19.
3Kauna Jonás, witing Papang kaupak yulni dakanin pāni yakat, nawatkauh laih kirinin yamna Papang kaupak dawak Jope kau kuring kaikawa tani yakat kuna, dawak kuring as sakdai Tarsis#1.3 Tarsis: Israel balna kukulwa dai, Tarsis kidika pa as tanit naikau kukulwa dai, sau adika kaupak. yakat, kaput laih witing mahka kiwarang minit kidika lauwi kuring pasyakat kana kiuna atnin. 4Kauna Papang yaklauwi yamna wing parasni wauhna atnin, dawak kuma pasyakat wing parasni wauhna, bahang sip kapat dai kuring kidika bahwi dis yamnin. 5Kuring waihyang balna kidika yamaduduna, dawak witingna bitik laih daninawan kau yuyulna. Witni kat, kuma kuring kidika ingni yamnin yulni di balna kidika bitik rumhahana waspa yakat. Dawak Jonás laih kuma kuring pasyakat kakiwi di pupuwa yakat yamni palni kamana dai. 6Bahang kuma kuring tanituna kidika Jonás yakat kiwi kalyulna:
—¿Man ais yamta yakat amatusmahn? ¡Lawa Papangma yakat yulta! Sip kat mayang akat mamikun maitalwi mailaih'yakwarang.
7Dawak kuma kuring wauhyang balna laih biri biri yuyulna:
—Mayang tanka waldarang wais yakat kalbukwarang pa adika dutni kalahwa.
Adika tanka wawalwak, Jonás kidika yakat bukna dai. 8Kaput dawak kalyuyulna:
—Maiyulta, amput dawak adika dutni mayang akat kaina yah. ¿Ais warkni dutamahn? ¿Angkaupak aiwamahn? ¿Angdika pāni kaupak manh? ¿Ais nisan manh?
9Jonás yaklauwi diyulna:
—Yang laih hibru muihni yang, dawak Papang makau sakyakat mikit yultayang kuma yamna dawak sau yamna Daniwan yakat.
10-11Jonás yaklauwi diyulna, witing Papang muhni kaupak kiri, dawak witingna dakakana, kaput bik tatalna kuma kidika baisa parasni lalamna dawak yamaduwi yulwi dakakana:
—¿Man ais yamta aput yamna manh? ¿Man yakat ais mayamdakat kuma adika lungni kalawarangyah?
12Jonás nangnitna lana:
—Bahang kuma yakat yaruhm'ātanauh, kaput laih kuma kidika lungni kalna karang. Yang amanglatayang, adika wing parasni wauhwa adika laih yang dutki yulni manna mamatna yakat kaina.
13Waihyang muihni balna kidika parasnina bitik wawaihna kung yakat kiuna atnin, kauna sip-awas dadana, kat kuma kidika baisa parasni lalamna bahang. 14Kaput laih Papang yakat parasni yulwi yuyulna: “Papang, maidatang kat daunin awaski, adika alni yulni kaupak. Dawak witing kidika dutni as yamwas kat, witing dauwarang kidika mayang akat maikulwinih, kat Papang man laih yamtaman, amput yamnin kultaman yakat.”
15Kaput yulwi dawi, Jonás kidika kuma yakat rumhahana, dawak kuma kidika lungni kalna. 16Kidika talwi, witingna Papang yakat kulninna yamaduduna, kalkukulna dawak sakripais as yayamna, dawak pramis bik yayamna dai.
17 # S.b. 1:17—2:10 kidika libitna ki 2:1-11 hibru kau ulna yakat.Kidika minitni yakat, Papang yaklauwi waspadini nuhni as yakna dai, bahang kidika yaklauwi Jonás yakat ukna. Dawak Jonás kidika waspadini bānipas yakat ma bās, pukta bās sakdai.#Mt 12:40.

Currently Selected:

Jonás 1: SUMU

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy