Isaías 1
1
Judá muihni dutni yamyang balna
1Isaías, Amoz walanibis, niningkana dai kidika Judá dawak Jerusalén yulni, bahang kidika mani balna yakat king kakana dai Uzías,#2 Re 15:1-7; 2 Cr 26:1-23. Jotam,#2 Re 15:32-38; 2 Cr 27:1-9. Acaz#2 Re 16:1-20; 2 Cr 28:1-27. dawak Ezequías#2 Re 18:1—20:21; 2 Cr 29:1—32:33. kaunah Judá#Mi 1:1. sauni yakat.
2Dakanauh kisang dawak sau,
Dawan yulwa kidika:
“Yang walakibis balna muhnayang,
kaunah muihbarak kalwi niking yakat yaklalauna.
3Turuh almuk kidika daniwan yakat amangnilawi,
kaput bik laih biriku kidika daniwan yaklauwi pa kalana kidika amanglawi;
kaunah Israel laih yang tawanki muihni balna palni ki,
kaunah amanglawas ki, dawak tanka bik duwas ki.”#Jr 8:7.
4¡Alakaih, muih dutni yamyang balna,
tawan as dutni manah trurukwa kidika,
muih dudutni sulani balna dawak dutni yamyang walanibis balna!
Dawan kaupak naikau alahuina,
Israel Papangni holi kidika ruhmwi dadana.
5Manna laih dutni manah yamnin kultamana,
muihmana kidika wisnin pāni bik dis kalna.
Tunamana bitik laih daknamanah ki, parasmana bitik laih witna.
6Kalmana sutni kaupak tunamana kat
yamni as bik diski manna muihmana kidika;
mana dakna manah ki, mana wisna, pilau manah ki;
muih as bik pilaumana kidika klin yamwi sitwaski,
dawak dia kau bik salapwi sanni yamwas ki dalawa balna kidika.#Jr 30:12-15.
7Pamana kidika kauhmak wanilang manah kalna,
dawak tawan nunuhni balna kidika dahlwi.
Manna muhmatna yakat
di dahna mana dai kidika kakaswi waihmanala balna.
Bitik laih kauhmak wanilang manah kalna,
Sodoma#1.7 Sodoma: kaput ulna kidika yamni kapat ki. Hibru kau laih yulwi pa ūk muihni balna. daukalpamna dai kapat.
8Sayan laih alas kalahna
sihm wain yanimak papusyakat ū labanni bin aslah sakkapat,
sihm melón balna pasyakat nandakna as sakkapat,
dawak bik sihm tawan nuhni as waihnila balna awaihdadakna kapat.
9Dawan parasni nuhni duwa kidika
mayang buas maidawas dai katlaih,
waradika Sodoma dawak Gomorra kapat mawarang.#Gn 19:1-29; Rom 9:29.
Prias as rahm yamnin kidika Papang yakat
10Sodoma tunan muihni balna, Dawan yulni adika dakanauh;
Gomorra muihni balna,#Jr 23:14. yamni dakanauh
mayang Mapapangki mana sumalwarang kidika.
11Dawan witing aput yulwi:
“¿Aisyamta sakripais manas yang akat duaitamanah?
Sakripais talnamanah yasuhdana kuts bustamana kidika
dawak turuh almuk binina salani bustamana kidika;
dawak turuh almuk, kuts almuk āni bik talkihyāwas ki.
12Manna yang muhkit akat aiwa mana,
kaunah, ¿wais mana yulna yah watakki kidika kalmana kau ataknin?
13Minit dis dini as parasni dis kidika duahaiwinih yang akat;
wayauni kidika dukih yāwaski.
Manna tawan yakat di yultamana waiku wisam dawak yak-urupdinin mani,#1.13 Yak-urupdinin mani kidika laih satadi mani. kidika alasnina yamnin,
kaunah yang dukih yawas ki muih dutni yamyang balna alas yayamwa kidika.
14Yasuhdana waiku wisam alasnina yayamwa kidika dawak kalududuhwa kidika bik;
¡kidika yayamwa kidika dutni dakayang
baisa wauhkih yawas ki!#Jr 6:20; Am 5:21-22.
15Manna mamatna yulta tingmana dulauta mana kidika,
manna kaupak mikpa kidika naikau latayang;
wat wat mamatna yultanama bik
yang dakasyang.
Tingmana kidika ā manah kahna.
16¡Suhtanauh, klin alahwanauh!
¡Dutmana kidika yang mikpa kaupak latanauh!
¡Dutni yamtamana kidika datanauh!
17¡Yamni yamnin kidika lan alahwanauh,
traitala lā kat yamtanauh,
taihwa muihni balna yakat ilpni yamtanauh,
warau niningyakat lā kat yamtanauh,
yal tingmak rahmni kidika kalatanauh!”#Ex 22:21-22; Dt 24:17-21; 27:19.
18Dawan aput yulwi:
“Aiwanang adika yulni yulbaudanang.
Dutmana kidika di as pauni kapat karang bik,
yang lawik mukus pihni kapat yamki;
asna pauni-sa kapat karang bik
sīp butuni pihni kapat daki.
19Yulki kat dakanama kat,
adika sauni di minik tanit yamni yakwa kidika kastanama;
20kaunah ban kulnamna dutni dutanama kat,
wār yakat dautanama.”
Dawan witing yaklawi kaput yulna.
Dawan yaklauwi Jerusalén kidika maisihni dis yamna karang
21¡Ais yamta kaput yamna manh,
tawan nuhni as barangni man dai kidika,
waradika laih pukta yalni kapat kalnaman kidika!#Jr 3:6-10; Ez 16:15-36; 23:1-49.
Tanit mani kau laih muihma balna kidika lā kat yayamwa dai,
kaunah waradika laih muih iyang balna manah ki.
22Man kidika lalah man dai, kaunah waradika laih bubuh kalnaman,
wain yamni as man dai kaunah waradika laih was manah kalnaman.
23Kabamintma balna kidika muih dudutni ki
dawak di malyang balna karak kalpapakwi.
Di bitik kidika lalah yaklauwi dibakanwi
dawak wawalwi muih yaklauwi di prisant diana atnin.
Lā kat yayamwaski warau nining yakat,
dawak yal tingmak rahmni kidika bik kukulwas ki.
24Kidika bahang,
Israel Papangni Dawan parasni nuhni duwa kidika, yulwi:
“Yang waihkila balna kidika lanina yamki.
Yang biritik diyamki.
25Wattik yang tingki dulauki man namang yakat,
dawak bubuhmana kidika bitik busmukki;
kaput bik laih dutni dutaman kidika bitik klin yamki ki.
26Yamtingkat watta tama tuna balna yayamni duma,
muhnilau dai kapat dawak la sumalyang muihni balna bik.
Yang adika yamting usnit kat watwi manyak ma yuyulna karang
‘Tawan nuhni as lā kat’, ‘Tawan nuhni as barangni’.#Zac 8:3.
27Yang lā kat yamtayang kau dawak laihtik yaktayang kidika karak
Sayan muihni balna kidika laihtik yakki yang akat ainin yulni;
28kaunah muih kulninna dutni dawak dutni yamyang balna kidika laih imukki,
dawakat yaruhmwi dadawa balna kidika bik dadauwarang.
29Pan balna bik manna yakat yakasasaldarang,
manna lawa yamni dukih manawa kidika,
dawakat kidika yakat bik dawan dauh balna yakat prinias yamta manna kidika.
30Manna laih pan as dauwak basni kusulawa kapat awanama,
dawak bik dipulu dahna pāni as was-dis kapat awanama.
31Muih al parasni kidika laih, unitak mana kalna karang,
dawak witing warkni balna kidika laih kuh raiwa kapat karang:
bupak laih dahlna karang,
dawak muih as bik diskarang pina atnin.”
Currently Selected:
Isaías 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998