Hageo 1
1
Diyulna makat yulnin ūni kidika yamna atnin
1King Darío, witing king kana kurih bu yakat, waiku tiaskauas kiwi kawak ma tatuna yakat, Papang yaklauwi prapit Hageo munah, Salatiel walanibis, Judá kingni Zorobabel yakat, dawak bik sumalyang nunuhni balna taninatuna, Sadoc walanibis Josué yakat bik kalyulna dai.#Esd 4:24—5:2; 6:14.
2-3Papang parasni nuhni bitik duwa kidika, adika yulni yulwa dai prapit munah: “Adika muihni balna yuyulwi, baisa mani balna kaikawas ki makat yulnin ūni kidika yamna atnin. 4¿Dawak manna namangna yakat, mani balna kaiwi kana katpah ū yaksisihni kana atnin, dawak yang ūki kidika laih daukalna yakat ban atnin? 5Yang, Papang paraski nuhni bitik dutayang kidika, manayultayang yamni kulta talnauh, manna kulnamna yakat dutamana kidika. 6Manna kasak di dahtamana, kauna bubin manah yaktamana, di kastamana kauna ismangnalak dakasmana; ditamana kaunah baisa damatna buhwi; kalsuruhmtamana kauna manapuihawaski; dawak wark kalahyang muihni kidika, witing minit duwi kauna lalahni kidika bikni ahlna pasyakat āwi. 7Yang laih Papangyang, paraski nuhni bitik dutayang, bahang manna yakat manayultayang, kulnamna yakat dutamana kidika yamni kulta talnauh. 8Asangpas yakat yawa pan duaita makat yulnin ūni kidika watta yamtanauh. Bahang yang laih yakat isinglak sak awaki, dawak alaskina yaksihni kidika namangnakaki. 9Manna manas waltamana, kaunah bulah yaktamana; dawak manna ūmana yakat apaktamana kidika, yang duyawayang wingkita kau puhtik. ¿Amput dawak? Kat yang ūki kidika daukalna bahang, dawak manna laih ūmana kidika yakat manah kultamana. Yang Papangyang kat yultayang. 10Kidika bahang was lauwa kidika manna dimana-awas ki, dawak sau bik minik yakwi manawas ki.#Lv 26:18-20. 11Yang lawik yamtingkat sau kidika buhlana, asang balna yakat bik, plawar minik yakat bik, wain yamak balna yakat bik, dawak ani damni balna kidika bik, yamak kau di minik dahna balna kidika bik, muih minitna yakat bik, didauh balna minitna yakat bik, dawak di bitik kau manna wark alahwamana minit yakat bik.”
12Zorobabel, Josué dawak muih as balna kidika bitik yamaduduna dai, Papang yaklauwi prapit Hageo yakat pakwak yulna kidika yulni, bahang adika kuduh yultah kalatna dai kidika. 13Kaput laih Hageo Papang yulni trukyang, Papang ayangni kau yakwi diyulna: “Papang aput yulwi: ‘Yang, Papangyang kat yultayang: yang manna karak yang.’ ”
14-15Kaput laih Papang yaklauwi Zorobabel Judá kingni yakat kulnin dulauna dai, Josué yakat, dawak sumalyang nunuhni balna taninatuna yakat, tawan muihni balna yakat bik, dawak Darío king kana kurih bu laihwi bayakna, dawak minit yakat waiku tiaskauas laihna kidika kaupak ma muihasluih minitkau arungka yakat, Papang parasni nuhni uni kidika mahka laihwi yayamna dai.#Esd 5:2.
Currently Selected:
Hageo 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998