YouVersion Logo
Search Icon

Éxodo 1

1
Israel balna Egipto yakatpāt wawauhna kidika
1Israel balna Egipto yakat uiwi kakana kidika Jacob karak, witingna ayangnina balna, dawak kaput bik laih witingna walaninabis dawak yalnina balna bitik dai: 2Rubén, Simeón, Leví, Judá 3Isacar, Zabulón, Benjamín, 4Dan, Neftalí, Gad dawak Aser. 5Jacob sulani balna kidika bitik kat muih 70 dai. José kidika laih Egipto yakat sakdai.#Gn 46:8-27.
6José dawak witing wirahni ahal balna, dawak witingna balna bitik dadauna dai; 7kaunah Israel balna kidika walaninabis mahni duduwadai bahang, mahni palni kalsahna dai, dawak parasni kakalna dai. Bahang kidika sauni laih Israel manah bunghdana dai.
8Usnit kat king wisam ūk kanadai, Egipto yakat, bahang witing laih José kidika amangnilawas danadai, dawak tawanni muihni balna yakat diyultah: 9“Talnauh Israel balna laih mahni ki, dawak witingna kauh tanit parasnina duduwi. 10Kaput bahang mayang di as yamnin ki, witingna baisa mahni kalsahwi, war as kaiwarang kat sipki, mawaihkila balna ilpnina kanin, dawak maniking kauh kalbauna atnin, dawak bik adika sauni kaupak kalahwi uina atnin.”#Ap.w 7:14-19.
11Kaput bahang Egipto muihni balna yaklauwi wark tunan muihni balna ahana dai, Israel balna yakat taihna atnin yulni wark parasni yakat awi. Dipapakwak Pitón tawanni nuhni kidika yayamna dai dawak Ramsés tawanni nuhni bik, bahang kidika pāni balna laih Egipto kingni yaklauwi di minik balna puwadai. 12Baisa parasni ditataihwak baisa mahni kakalna. Kaput bahang Egipto muihni balna kidika kasak yamaduduwadai.
13Egipto muihni balna yaklauwi dutni palni diyayamna dai Israel balna yakat. 14Witingna sangninaka kidika yakat tapalhni palni diyayamna dai wat parasni yakat awi, bahang kidika warkni pasni laih sau kau duwi yayamwadai ū paknin dini, dawak bik yamak kau wark balna yamnin kidika balna bitik yamna atnindai. Kaput laih yamwi Israel balna kidika wararauna dai. 15Kidika minit yakat fero yaklauwi yulbauna dai Sifra Fúa balna karak, witingna kidika laih muih yal muihbin duwak main talyang balna dai, bahang aput diyulna:
16—Hibru yayal balna muihbin duduwak maintalnama kat, yamni talnauh muih bin kidika ais pa yal bin karang kat datanangkat sangka kawang, kaunah al bin karang kat, ¡itanauh!
17Kaput kaunah, yayal muihbin duduwak maintatalwa yayalni balna kidika yamaduduna dai Papang niningkauh, kidika bahang Egipto kingni yulna kidika yayamwas dadanadai, kaput laih muih ahal binina kidika iwas dadawak bararakna. 18Kaput dawak Egipto kingni yaklauwi diyulwak uina witing muhni yakat, dawak diyulna:
—¿Ais yamta datanangkat muihbinina ahal kidika sangka yah?
19—Kat Hibru yayal balna kidika laih Egipto yalni balna kapat awaski —kalatwadai—. Nawatkauh laih witingna kidika pararasni ki, bahang baisa yangna yawasyangna kat uman muihbin duna ki awi.
20-21Kaput laih Israel muihni balna kidika mahwadai, kaput bik baisa parasni kukulwadai, baisa minit yakat yayal muihbin duduwak maintalyang yayalni balna kidika Papang yamaniduduna bahang, Papang kidika witingna karakdai, bahang kalwanaih mahni palni kakalna dai. 22Dawak fero laih, witing tawanni bitik yakat diyulna dai: “Hibru balna walaninabis ahal batatahnwarang#Ap.w 7:19. kidika bitik laih waspa yakat ruhm'atanauh, kaunah yayal binina karang kat datanang sangka kawang.”

Currently Selected:

Éxodo 1: SUMU

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy