Ester 1
1
King Asuero kasnin alasnina as yamna
1Adika yulni umani kalahna dai king Asuero,#Esd 4:6. sau sahyakna 127 minit yakat king kawa mani balna dai yakat, kidika laih panuhni dai India kaupak Etiopía kat duwa dai, 2dawak king kawa tawanni nuhni palni laih Susa yakat dai.
3King kana kaupak kurih bās laihna yakat, king Asuero alasna nuhni as yamna, witing kingkawa yaihnit kau muih balna tingnisut lalaihwa balna bangkidika ayangninakau, Persa dawak Medo muihni kalbauyang balna tanina tuna bik, kabamint muihni balna, dawak sau sahyakna kidika tunan muihni balna bik, 4kidika laih witing ritsni balna dawak witing nuhni kidika king kawa lani balna, dawak kaput bik laih parasni nuhni palni tanit duwa kidika niningnakanin yulni. Kidika alasnina yamna kidika laih kurih papusbah praisni laih yamna dai, 5kidika bayakwak usnitkat, king watwi alasna ūk yamna dai ma tiaskau bu praisni, bahang kidika laih king witing ūni watak yakat yamna dai. Dawak Susa tawanni nuhni yaihnit kau pa binina kalbauyang ūni pararasni bangkidika muihni balna kidika yulwi dukiuna dai, muih nunuhni kalkulna balna kidika dawak bik nunuhni kalkulwas balna kidika bitik, yulwi dukiuna dai. 6Watak yakat dūr rinin pipihni dawak sangni balna kidika rina dai, dawak wahni sitna balna kidika laih paisa sa kapat dai, bahang wahni balna kidika laih ting ānin kapat lalah kau yamna tuyuyulni balna kidika munah urhlana dai, bahang kidika balna laih ū rahni nunuhni marmol kau āna kidika yakat sitna dai. Dawak yalahnin dini balna kidika gol kau dawak lalah kau yamna balna kat lakna dai, dawak sau kidika laih kipala tanit yamni, nácar, marmol pihni dawak sani bik lakna dai.#1.6 Watak yakat... sani bik lakna dai: kaput wirlana kidika yamni kapat ki. Hibru kau laih amangladaski. 7Dinin dini balna kidika laih gol sūnitak kau utuhwi yuna dai, sūnitak balna kidika sat yamna dai, wain kidika manas dai, kat king risnipik kau bahang. 8Kaput kauna king witing ūni kau kasnin dini balna tibil yakat ihilwa muihni balna taninatuna yakat, adika lani diana dai, muih as kau bik witingna yaklauwi pakwak dinin-awaski, kaunah nawatkauh laih, muih yulwi dukiuna balna kidika witingna dikih yakat didina karang. 9Dawak king yalni Vasti, witing bik kasnin alasnina as yamna dai, king yaklauwi muih balna yulwi dukiuna yalnina balna karak, King Asuero ūni yakat.
10Alasna manah ma tiaskau bu laihna yakat, king kidika uba alasna duna dai, wain dina kidika yulni, dawak muih tiaskau bu witing yaklauwi yamni dikulwa ahalni balna kidika#1.10 Yamni dikulwa ahalni balna kidika: barangni yulnin kat: ahal yayal dukih diawas balna kidika. yakwi sihna, Mehumán, Bizta, Harbona, Bigta, Abagta, Zetar dawak Carcas, 11kidika laih witing sakyakat dukiuna atnin king yalni Vasti kidika king kraunni pakwi dawak, bahang kaput laih tawan muihni dawak muih nunuhni balna bik king yalni yaksihn kidika talna atnin, kat rahm laih yal kidika nuhni yaksihn dai. 12Kauna king, witing yaklauwi yamni dikulwa ahalni balna munah yul sihna dai kidika yamnin yulwas dana. Kaput laih witing kulnin uba daukalna, 13lā#1.13 Lā: kaput ulna kidika yamni kapat ki. Hibru kau laih yulwi mani balna. amanglawa muihni balna yakat yulwi dakana, kat witingna nining kaput yayamwa dai, king yulni balna kidika laih lā amanglayang balna manah sipdai laihwi talna atnin. 14Kidika balna king karak tanit yamni yaihnit yakat balna kidika laih Carsena, Setar, Admata, Tarsis, Meres, Marsena dawak Memucán, kidika muih tiaskau bu kidika tanit nunuhni balna dai Persia dawi Media yakat, witingna kidika laih king yaihnit palni yakat la yamyang balna dai, dawak kaput bik laih wark nuhni kidika tingnina yakat dai, kidika kabamintni muihni balna minitna yakat. 15King yaklauwi diyulwi dakana:
—Lā yakat kulnin karang kat, ¿ais yamninyah, king yalni Vasti kidika yulki kat dakawi yamwas dana kidika, yang muih ahal yamni dikultayang balna munah yul sihtingkat?
16King ūni yakat lā yamyang muihni balna muhnina yakat, Memucán yaklauwi king yakat nangnitlana:
—King yalni Vasti kidika, king man muhma yakat manah bik dutni yamwas ki, kaunah lā yamyang muihni balna bitik yakat, dawak sauma muihni balna bitik muhnina yakat bik dutni yamna. 17King yalni yamna kidika yayal ūk balna bitik dakakawarang, bahang kidika yulni kaupak yayal balna kidika alnina kau kukulwas dadawarang, kat yuyulwarang: ‘King Asuero yaklauwi yulna, witing yalni kidika, witing yakat kiuna atnin, kaunah yal kidika kiunin yulwas dana.’ 18Persia dawi Media kau muih nunuhni balna bangkidika yalnina balna kidika amanglalawarang kat king yalni Vasti yamna kidika, warmani alnina balna karak kidika yulni yuyulwarang ki, dawak kidika kaupak kalbilnin, dutni bik kalahwarang ki. 19Kaput bahang, yamni kapat talma karang kat, king man kidika, lā as ata isningna pakta, kaput laih persa balna dawi medos balna lanina as karang, kaput laih dauh kalwas karang:#Est 8:8; Dn 6:8. ‘King yalni Vasti kidika wat as bik laih king muhni yakat kiwas karang.’ Kaput laih king yalni kidika ūk yakna karang, baisa tanit yamni kat. 20King lā awa kidika witing sauni kidika bitik yakat isningna pakna karang, kaput laih yayal balna bitik witingna alnina balna yakat rispik diayawarang, ais satni muihni karang bik.
21Memucán kulnin lani kidika, yamni kapat talna, dawak lā yamyang uk balna kidika bik, kaput laih king yaklauwi kidika lāni mahka yamna. 22Wauhtaya sihna dai, witing king kawa sauni balna bitik yakat, witingna tunina kat ulwi sihna, Kidika yakat dipakna, alnina balna lanina kidika yalnina minit yakat atnin, ūnina pasyakat, dawak witingna amput yamni tatalwa yakat yulbauna atnin.#1.22 Witingna amput yamni tatalwa yakat yulbauna atnin: kaput ulna kidika yamni kapat ki. Hibru kau laih yulwi witingna tunina kat yulna atnin.
Currently Selected:
Ester 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998