Máfíò 1
1
Jízɛ̀ ɓǎ nììn ɓǎ ɓě
(Ɖúù 3:23-38)
1Ɖɛ ɓě céè ɓá Jízɛ̀ Kɛ́ɖɛ́ì mɔ̀à Dèɓéɛ̀ xwíníín-dyùɔ̀ kɛɛ ɓǎ nììn ɓǎ ɓěɔ̀ jè dyíɛɛ, wa kɛà kɛ̀. Dèɓé mɔ̀ ma Ééɓòɖòhɛ̃́ɛ̀ xwíníín-dyù.
2Ééɓòɖòhɛ̃́ɛ̀ wóɖóìn ma Áázè, ké Áázè wóɖóìn ma Jékɔ̀, ké Jékɔ̀ wóɖóìn ma Júɖà kè ɔ ɖíí ɓěɔ̀. 3Ké Júɖà wóɖóìn ma Pɛ́wɛ̀ɖɛ̀ kè Zɛ́wàɖà. Wa ɖeɛ̀ nyɛ́nɛ́ mɔ̀ ma Támà. Ké Pɛ́wɛ̀ɖɛ̀ wóɖóìn ma Hɛ́wɔ̀ɖɔ̀ùn, ké Hɛ́wɔ̀ɖɔ̀ùn wóɖóìn ma Wáɖáùn. 4Ké Wáɖáùn wóɖóìn ma Ámìnáɖà, ké Ámìnáɖà wóɖóìn ma Násɔ̀ùn, ké Násɔ̀ùn wóɖóìn ma Sámɔ̀. 5Ké Sámɔ̀ wóɖóìn ma Bóà. Bóà ɖeɛ̀ nyɛ́nɛ́ mɔ̀ ma Wéɖéháà. Ké Bóà wóɖóìn ma Óɓè. Óɓè ɖeɛ̀ nyɛ́nɛ́ mɔ̀ ma Wuɖufí. Ké Óɓè wóɖóìn ma Jɛsé. 6Ké Jɛsé wóɖóìn ma Dèɓé mɔ̀ ma kà ɓóɖóɔ̀ kã́á kɛ.
Ké Dèɓé wóɖóìn ma Sã́ɖómà. Sã́ɖómà ɖe mɔ̀ ma Dyùwáɖádyàà gmàà kĩ́ín. 7Ké Sã́ɖómà wóɖóìn ma Wíɖíhɔ̀bóàùn, ké Wíɖíhɔ̀bóàùn wóɖóìn ma Àbíjà, ké Àbíjà wóɖóìn ma Ásà. 8Ké Ásà wóɖóìn ma Jɛ̀hósáfà, ké Jɛ̀hósáfà wóɖóìn ma Jɛ̀hówàɖàùn, ké Jɛ̀hówàɖàùn wóɖóìn ma Dyùzíà. 9Ké Dyùzíà wóɖóìn ma Jótàùn, ké Jótàùn wóɖóìn ma Áhàzì, ké Áhàzì wóɖóìn ma Hɛ́sèkádyà. 10Ké Hɛ́sèkádyà wóɖóìn ma Mànásì, ké Mànásì wóɖóìn ma Ámɔ̀ùn, ké Ámɔ̀ùn wóɖóìn ma Jòsádyà. 11Ké Jòsádyà wóɖóìn ma Jɛ̀hódyàcĩ̀ìn kè ɔ ɖíí ɓěɔ̀, ti ɓɛ́ wa nyu zɔ̃̌ɔ̀ kà Éézùɖùɛ̀-nyɔ̀ ɓěɔ̀ toɛ̀-kpɔ̃-nyɔ̀ mú, ɓɛ́ wa dyià wa ɖé Báɓèɖɔ́ùn-ɓòɖòɔ̀ kɔ̃ kpa kɛ.
12Ti ɓɛ́ wa ɖǎ ma nyɔ ɓěɔ̀ ɖé Báɓèɖɔ́ùn-ɓòɖòɔ̀ kɔ̃ kpaa, Jɛ̀hódyàcĩ̀ìn wóɖóìn ma Sɛ́àtíè, ké Sɛ́àtíè wóɖóìn ma Zɛ̀wáɖáɓèɓò. 13Ké Zɛ̀wáɖáɓèɓò wóɖóìn ma Àbíù, ké Àbíù wóɖóìn ma Ɛ̀ɖìákĩ̀ìn, ké Ɛ̀ɖìákĩ̀ìn wóɖóìn ma Ázɔ̀. 14Ké Ázɔ̀ wóɖóìn ma Záɖò, ké Záɖò wóɖóìn ma Ákĩ̀ìn, ké Ákĩ̀ìn wóɖóìn ma Ɛ̀ɖíù. 15Ké Ɛ̀ɖíù wóɖóìn ma Ɛ̀ɖɛ̀ázà, ké Ɛ̀ɖɛ̀ázà wóɖóìn ma Máfàùn, ké Máfàùn wóɖóìn ma Jékɔ̀. 16Ké Jékɔ̀ wóɖóìn ma Jòsé ɓɛ́ ɔ mɔ̀ ma Meɖéɛ̀ dyú-ɓǎ kɛ. Meɖé mɔ̀ ma Jízɛ̀ ɓɛ́ wa ɖáìn Kɛ́ɖɛ́ì kɛɛ ɖe.
17Nìí, sɔ̀ìn Ééɓòɖòhɛ̃́ɛ̀ gbo ké Dèɓé gbo muɛɛ, ɔ mɔ̀ ma xwéɖé-dù deìn dúún ɓaɖa-bùè sè hĩinyɛ. Ké sɔ̀ìn Dèɓé nììn tiɔ̀ gbo, ké ti ɓɛ́ wa kpa ma kà nyɔ ɓěɔ̀ ɖé Báɓèɖɔ́ùn-ɓòɖòɔ̀ kɔ̃ɛɛ gbo nyiniɛɛ, ɔ mɔ̀ ma xwéɖé-dù deìn dúún ɓaɖa-bùè sè hĩinyɛ. Ké sɔ̀ìn ɓó tia gbo ké Kɛ́ɖɛ́ì nììn jè gbo dyiɛɛ, ɔ mɔ̀ ma xwéɖé-dù deìn dúún ɓaɖa-bùè sè hĩinyɛ.
Jízɛ̀ Kɛ́ɖɛ́ì wóɖó jè
(Ɖúù 2:1-7)
18Kà Jízɛ̀ Kɛ́ɖɛ́ì nyu ma wóɖóɛ kɛɛ, ɔ kɛà kɛ̀. Jòsé kpɔ̃ ma Jízɛ̀ ɖe Meɖé ɓéeín, kɛɛ hwɛ̀ ɓɛ́ wa ké ma dyi kpɔ̃ìn nyɛɛ, Meɖé dyéɛ ma kà ɓɛ́ Zùù Hwɛ̀ǐn-hwɛ̀ǐnɔ̀ muɛ ma nyuùn, ɓɛ́ ɔ ké ma dyú ɖò ɓéɖéɛ. 19Ké Jòsé mɔ̀ nyɔ kpɔ̃ ma kà Meɖé ɓéeín nyɛɛ mɔ̀ ma nyɔ ɓɛ́ ɔ nyu dyí-sɛ́ɖɛ́ìn-ɖɛ̀ teeɛ. Kɛɛ ɔ se mɔ́ ɓɛ́ ɔ ké ma ɔ dɛ̃ nyùìn ɓó nyɔǔn dyúa. Ɔ jèɛɛ, ɔ poɛ ma gbɔ, ɓɛ́ ɔ ké ma ɔ dyi táà nyàà. 20Ti ɓɛ́ ɔ nì ma ɖɛ nìà kɛ jè hwìɖǐi poɛ̌n nyɛɛ, púɛɛ, Bounɓoɔ̀ ínjà ɖò wóɖóìn ma ɔ dyí ɖé dya-dya mú, ké ɔ ɖá, “Jòsé, mɔ̀ mɔ̀à Dèɓéɛ̀ xwíníín-dyùɔ̀ kɛɛ, mɔ̀ǔn ɖá ɓɛ́ m̀ ké fɛ̃̀ìn, ɓɛ́ m̀ ké se Meɖé dyi kpɔ̃, ɓɛ́ ɔ ké nì gmàà jǔ, sepóɛɖé Zùù Hwɛ̀ǐn-hwɛ̀ǐnɔ̀ mɔ̀ nyɔ nyu, ké ɔ nìà zùù kɔ̃ kɛ̀. 21Ɔ mu gàa-dyù ɖò wóɖóìn, ké m̀ mɛ jǔìn dyúɔ̀ Jízɛ̀-nyɛ̀nɛ̀, sepóɛɖé ɔ mɔ̀ nyɔ mu ɔ nyɔ ɓěɔ̀ póìn sɔ̀ìn ɖé waà nàmàǔn ɓěɔ̀ xwaún.”
22Ɖɛ séín ɓě nìà kɛ kpá ma, ɓɛ́ ɖɛ ɓɛ́ Bounɓoɔ̀ cɛ̃ zɔ̃̌ɔ̀ ɖé ɔ kpáá-ɖɛ̀-cɛ̃-nyɔ̀ ɖò múɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá, 23“Gmɔ̀ nɔ̄, màa-dyù gmɔ̀ ɖò ɓɛ́ ɔ se toɖo kɔ̃ jè dyuòɛɛ mu zùù kɔ̃ nììn, ké ɔ mu gàa-dyù ɖò wóɖóìn, ké ɔ nyɛ́nɛ́ mu Ìmádyùɛ̀ jǔùn.” Nyɛ́nɛ́ɔ̀ xwíníín mɔ̀ Gèɖèpɔ́ɔ̀ nì à gbo.
24Ɔ jèɛɛ, ti ɓɛ́ Jòsé wóɖó ma nyíɔún wɛ̃ɛ, ɔ nyu ɖɛ ɓɛ́ Bounɓoɔ̀ ínjàɔ̀ cɛ̃ ma kà ɔ gboɛ. Ɔ kpɔ̃ ma Meɖé dyi. 25Kɛɛ ɔ kèɔ̀ kè se ma da nì tee ké Meɖé wóɖóìn ma dyúɔ̀ hwɛ̀. Ké Jòsé jǔìn ma ɔ Jízɛ̀-nyɛ̀nɛ̀ɔ̀.
Currently Selected:
Máfíò 1: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.