JUELE 1
1
1Heḽi ndi ipfi ḽa Muṋe washu ḽe a amba na Juele ṅwana wa Phethuele.
Vhathu vha tshi lilela tshinyalelo yo vhangwaho nga nzie
2Inwi vhahulwane ipfani!
Noṱhe inwi ni dzulaho shangoni ḽino,
thetshelesani!
Ho no vhuya ha itea zwo raliho misi yaṋu
kana misi ya vhokhotsi aṋu?
3Zwi vhudzeni vhana vhaṋu, vhana vhaṋu vha zwi vhudze
vhana vhavho-vho,
vhana vhavho vha zwi vhudze murafho u ḓaho.
4 Zwo siwaho nga lutsinga lwa nzie zwo ḽiwa nga nzie khulu.
Zwo siwaho nga nzie khulu zwo ḽiwa nga nzie ṱhukhu.
Zwo siwaho nga nzie ṱhukhu zwo fhedziswa nga magerere.
5Vuwani ni lile, inwi zwidakwa!
Honḓani noṱhe inwi vhanwi vha waini,
lilelani waini,
yo dzhavhuliwa mulomoni waṋu.
6 Shango ḽanga ḽo dzhenelwa nga luṅwe lushaka,
lushaka lwa maanḓa lwo andaho,
lwa maṋo a no nga a ndau ya nduna,
lwa madungammbwa a no nga a ndau ya tsadzi.
7Lwo fhedza minḓirivhe yanga,
lwa tshinyadza mihuyu yanga.
Lwo kwatula na makwati ayo,
lwa laṱa kule,
lwa sia matavhi ayo e matshena.
8Jerusalema, lila unga muselwa a tshi lilela munna wawe
o ambara madzanganda.
9Nduvho ya thoro na nduvho ya waini
a zwi tsha ḓo ṋekedzwa nḓuni ya Muṋe washu.
Vhotshifhe vhane vha shumela Muṋe washu
vha khou lila vha tou ṱavha mukosi.
10Masimu o sala e swoto,
mavu a khou lila,
mavhele o fhela,
waini a i tsha wanala,
a hu tshee na mapfura.
11 Inwi vhalimi, ṱovhowani,
inwi vhalimi vha minḓirivhe,
honḓani;
lilelani goroi na baḽi,
khaṋo ya masimuni yo tshinyadzwa.
12Minḓirivhe yo oma,
mihuyu yo puta;
migranada na mitshevho na miapula –
miri yoṱhe ya tsimuni yo oma.
Vhukuma dakalo ḽa vhathu ḽo fhela.
Vhathu nga vha ḓisole vha rabele
13Inwi vhotshifhe,
ambarani madzanganda ni lile,
honḓani inwi ni no shuma aḽiṱarini.
Iḓani, lalani no fuka madzanganda,
inwi vhane na shumela Mudzimu wanga,
ngauri nḓuni ya Mudzimu waṋu a hu tshee na nduvho ya thoro na ya waini.
14 Ḓivhadzani ḓuvha ḽikhethwa ḽa u ḓidzima,
kuvhanganyani tshivhidzo tshikhethwa.
Vhidzani vhahulwane na vhoṱhe vhadzulapo,
vha ḓe nḓuni ya Muṋe washu Mudzimu waṋu,
ni ṱavhele Muṋe washu mukosi!
15 Musi uyo u ofhisa hani!
Vhukuma ḓuvha ḽa Muṋe washu ḽi tsini;
ḽi ḓo ḓa unga ndozwo ya Ramaanḓaoṱhe.
16 Zwiḽiwa a zwo ngo fhela ri tshi zwi vhona naa?
Mifhululu na dakalo a zwo ngo fhela nḓuni ya Muṋe washu naa?
17 Mbeu yo fela fhasi ha maḓinga.
Zwisiku a zwi tshee na tshithu,
maḓulu o pwashekana,
a hu tshee na mavhele.
18Kholomo dzi ri u lila!
Masambi a kholomo a sokou tendeleka
nga u shaya pfulo;
na masambi a nngu a khou kundelwa.
19Yawee Muṋe wanga,
nṋe ndi vhidzelela Iwe,
mulilo wo fhisa pfulo yoṱhe,
khavhu ya mulilo yo fhisa miri yoṱhe ya ḓaka.
20 Na phukha dza ḓaka dzo lindela Iwe;
milambwana ya maḓi yo xa;
mulilo wo fhisa pfulo ye lore.
Currently Selected:
JUELE 1: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.