VHARANGAPHANḒA 1
1
Matsinde a Juda na Simioni vha tshi thuba Adoni Bezeke
1 Musi Joshua o no fa Vhaisraele vha vhudzisa Muṋe washu vha ri, “Ndi vhafhio vha matsinde ashu vho fanelaho u vha vhone vha u ranga u yo dia Vhakanana?”
2Muṋe washu a fhindula a ri, “Tsinde ḽa Juda ndi vhone vhane vha fanela u ranga u ya. Ndi khou vha kumedza shango heḽi.”
3Vhathu vha Juda vha amba na vha Simioni vha ri, “Nga ri ṱuwe roṱhe shangoni ḽe ra kovhelwa ḽone, ri ḓo lwa na Vhakanana roṱhe, riṋe ra ḓo konou ya na vhoinwi shangoni ḽe na kovhelwa.” Matsinde a Simioni 4na Juda vha bva vhoṱhe pfumo. Muṋe washu a kumedza Vhakanana na Vhapherisi zwanḓani zwavho, vha vhulaha vhanna vha 10 000 muḓini wa Bezeke. 5Vha wana Adoni Bezeke henefho vha lwa nae, vha kunda Vhakanana na Vhapherisi. 6Adoni Bezeke a shavha, vha mu pandamedza, vha mu fara, vha mu tumula magunwe a zwanḓa na a milenzhe. 7Adoni Bezeke a ri, “Ho vha hu na mahosi a 70 e nda a tumula magunwe a zwanḓa na a milenzhe a tshi ṱwa a tshi doba matshakatshaka fhasi ha ḓafula ḽanga. Mudzimu zwino o nndifhedza zwe nda vha ita.” Vha mu isa Jerusalema, a fela hone.
Vha tsinde ḽa Juda vha tshi kunda Jerusalema na Hebroni
8 Vhanna vha Juda vha dia Jerusalema vha u thuba. Vha vhulaha vhathu vhawo vha u fhisa. 9Vho no fhedza izwo vha ṱuwa vha yo lwa na Vhakanana vha no dzula mivhunduni na midavhini ya Negeve na midavhini i re tsini ha lwanzhe. 10 Vha yo dia Vhakanana vha no dzula muḓini wa Hebroni, we kale wa vha u tshi pfi Muḓi wa Araba. Henefho vha kunda vha mitupo ya Sheshai na Ahimani na Thalamai.
Othiniele a tshi kunda muḓi wa Debiri
(Josh. 15:13-19)
11U bva henefho vhanna vha Juda vha yo dia vhathu vha no dzula Debiri. Misi iyo wo vha u tshi kha ḓi pfi Kuḓi kwa Sefere. 12Muṅwe wavho we a vha a tshi pfi Khalebe a ri, “Munna ane a kona u thuba Kuḓi kwa Sefere ndi ḓo mu ṋea ṅwananyana wanga Akhisa, a mu dzea.” 13Othiniele, ṅwana wa Kenasi murathu wa Khalebe, a thuba uyo muḓi, zwenezwo Khalebe a mu ṋea ṅwananyana wawe Akhisa a mu dzea. 14Musi wa munyanya wa mbingano a ṱuṱuwedza Othiniele uri a humbele khotsi awe tsimu. Musi Akhisa a tshi tsa kha donngi yawe, Khalebe a mu vhudzisa tshine a tshi ṱoḓa. 15Akhisa a fhindula a ri, “Ndi ṱoḓa maisha a maḓi. Shango ḽe vha nṋea ndi fhethu ho omelelaho.” Ndi hone Khalebe a tshi mu ṋea zwisima midavhini na magovhani.
U kunda ha vhathu vha Juda na vha Benyamini
16 Vhakeni vhaḓuhulu vha khotsi a musadzi wa Mushe, vho gonya na vhathu vha Juda vha tshi bva Muḓini wa Mitshevho, vha ya phangani tshipembe ha Aradi kha ḽa Juda. Henefho vha dzula vhukati ha vhathu. 17Vhathu vha Juda vho rambana na vha Simioni, vha dia Vhakanana vha no dzula muḓini wa Tsefathi. Vha phusukanya uyo muḓi, ha vha u u kumedza Mudzimu, vha ri u pfi Horoma (Phusukanyo). 18-19 Muṋe washu a farisa vhathu vha Juda, vha dzhia shango ḽa dzithavhani. Hone vha si thube Gaza na Ashkeloni na Ekroni na mashango o i tangaho. Vhathu havho vha dzulaho tsini ha lwanzhe vho vha vhe na gariki dza nndwa dza tsimbi, ndi zwe vhathu vha Juda vha kundwa u vha thatha uri vha ṱuwe. 20 Hebroni ho ṋewa Khalebe nga he Mushe a vha laya, Khalebe a thatha vhaḓuhulu vhararu vha Anaki na vhana vhavho afho muḓini. 21 Hone vhathu vha tsinde ḽa Benyamini a vho ngo thatha Vhajebusi vha no dzula Jerusalema, avho Vhajebusi vho ḓi dzula henefho na vhathu vha Benyamini, na ṋamusi.
Matsinde a Efraimi na Manase vha tshi kunda Bethele
22-23 Matsinde a Efraimi na Manase vha yo dia muḓi wa Bethele, we misi iyo wa vha u tshi pfi Lusi. Muṋe washu a vha farisa. Vha ruma ṱholi afho muḓini, 24vha vhona muṅwe munna a tshi khou bva vha mu vhudza vha ri, “Ri sumbedze nḓila ya u dzhena afho muḓini, wa ralo a ri nga u huvhadzi.” 25Uyo munna a vha sumbedza, vhathu vha Efraimi na Manase vha vhulaha vhathu vhoṱhe afho muḓini, vha litsha uyo munna na muṱa wawe. 26Ngavhuya uyo munna a ya shangoni ḽa Vhahithi, a fhaṱa muḓi henefho, a ri u pfi Lusi; na ṋamusi dzina ḽawo ḽi tshee ḽeneḽo.
Vhathu vhe vha si thathwe nga Vhaisraele
27 Vha tsinde ḽa Manase a vho ngo thatha vhathu vhane vha dzula miḓini ya Bethe Shiani na Thaanakha na Doro na Ibiliamu na Megido na vha ḓorobo dza henefho tsini; Vhakanana vho ḓi dzula henefho. 28Musi Vhaisraele vho no anda, vha ita Vhakanana phuli dzavho, hone vha si vha thathe.
29 Vha tsinde ḽa Efraimi a vho ngo thatha Vhakanana vha no dzula muḓini wa Gezere, vhenevho Vhakanana vho ḓi dzula henefho navho.
30Vha tsinde ḽa Zebuloni a vho ngo thatha vhathu vha no dzula miḓini ya Kithironi na Nahalala, vhenevho Vhakanana vho ḓi dzula henefho navho, vha vha ita phuli dzavho.
31Vha tsinde ḽa Ashere a vho ngo thatha vhathu vha no dzula miḓini ya Akho na Sidoni na Ahalabu na Akhazibi na Heliba na Afeke na Rehobo. 32Vhathu vha Ashere vho dzula na Vhakanana vha henefho, vhunga vha songo vha thatha uri vha ṱuwe.
33Vha tsinde ḽa Nafuthali a vho ngo thatha vhathu vha no dzula miḓini ya Bethe Shemeshe na Bethe Anatha. Vhathu vha Nafuthali vho dzula na Vhakanana vha henefho, hone vha vha ita phuli dzavho.
34 Vhaamori vha kombetshedza tsinde ḽa Dani uri vha dzule mivhunduni vha si vha tendele vha tshi tsela zwigodini. 35Vhaamori vha ḓi dzula thavhani ya Herese na Ayaloni na Shaalabimu vha tshi vhuswa hone nga matsinde a Efraimi na Manase, vha vha ita phuli dzavho.
36Devhula ha Nngwa masakha a Vhaamori a buḓekanya Phara ya Dziphephenu.
Currently Selected:
VHARANGAPHANḒA 1: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.