मत्ती 1
BFZ-NT

मत्ती 1

1
यीशु रौ पोस्तौ
(लुका 3:23-38)
1यीशु मसीह रै पोस्तै रै बारै दी, ज़ुण दाऊद राज़ै री खानदानी कु थौ राज़ौ दाऊद अब्राहमा री खानदानी कु थौ। 2अब्राहमा रौ छ़ोहरु इसहाक, इसहाका रौ याकूब, याकुबा रै छ़ोहरु यहुदा और तेसरै भाई, 3यहुदा और तामारा रै फिरिस और जोरह, फिरिसा रौ हिस्त्रोन, और हिस्त्रोना रौ एराम थौ। 4एरामा रौ अम्मीनादाब, अम्मीनादाबा रौ नहशोन, और नहशोना रौ सुलेमान, 5सुलेमाना और राहाब, राहबा रौ बोअज़, बोअज़ा और रुत, रुता रौ ओबेद, और ओबेदा रौ यिशै, 6और यिशै रौ छ़ोहरु दाऊद राज़ौ थौ। और दाऊदा रौ सुलेमान तिंया छ़ेउड़ी कु पैदौ हुऔ ज़ुण पैहलै उरिय्याह री छ़ेउड़ी थी। 7सुलेमाना रौ रहबाम, रहबामा रौ अबिय्याह, और अबिय्याहा रौ आसा, 8आसा रौ यहोशाफात, यहोशाफाता रौ योराम, और योरामा रौ कौनाल़डु थौ उज्जियाह, 9उज्जियाहा रौ छ़ोहरु योताम, योतामा रौ आहाज, और आहाजा रौ हिजकिय्याह, 10हिजकिय्याहा रौ मनश्शिह, मनश्शिहा रौ आमोन, और आमोना रौ थौ योशिय्याह। 11इस्राइली लोगु रै बेबीलौना री कैदा दी पौड़णै कु पैहलै योशिय्याह, यकुन्याह और तेसरै भाई रौ नान बौणौ
12कैदी चाणीऔ सै बेबीलौना दी निणै बासिऐ यकुन्याह कु शालतिएल हुऔ, और शालतिएला रौ छ़ोहरु जरुब्बाबिल, 13जरुब्बाबिला रौ अबीहूद, अबीहूदा रौ इल्याकीम, और इल्याकीमा रौ अजोर, 14अजोरा रौ छ़ोहरु थौ सदोम, सदोमा रौ अकीम, अकीमा रौ इलीहूद, 15इलीहूदा रौ इलियाजार, इलियाजारा रौ मतान, मताना रौ याकूब, 16याकुबा रौ छ़ोहरु युसुफ, ज़ुण मरियमा रौ बोउटौ थौ, और मरियमा कु यीशु ज़ासलै मसीह भी बोलाई, पैदौ हुऔ। 17इणै कौरी अब्राहमा कु दाऊदा झ़ांऊ चौदहा पीड़ी हुई, और दाऊदा कु बेबीलौना रै गुलाम हुईऔ पौउंच़णै झ़ांऊ चौदहा पीड़ी, गुलाम हुइयौ बेबीलौना लै पौउंच़णै झ़ांऊ रै बौगता कु मसीह झ़ांऊ चौदहा पीड़ी हुई।
यीशु रौ ज़नम
(लुका 1:26-38; 2:1-7)
18इऐ सारी बुशै यीशु रै ज़ौनमा कु पैहलै हुई ई। यीशु मसीह रौ जनम इणै कौरी हुऔ, कि ज़ेबी तेसरी मां मरियमा री मांगणी युसुफा आइलै हुई गोई, ता तिउंरी शादी हुणै कु पैहलै ई मरियम पवित्र आत्मा री तौरफा कु गौरकड़ी हुई। 19तैबै तियांरौ हुणै वाल़ौ बोउटौ युसुफ ज़ुण धौर्मी थौ और तिऐं बदनाम कौरणौ नाईं च़ाहा थौ, तिऐं च़ुटुकच़ार पोरु छ़ाड़णै रै बारै दी सुंच़दै लागौ। 20ज़ेबी सेऊ इऊं बुशै सुंच़दै थौ लागौ औन्दौ ता सौरगदूत तेसरै सुइणै दी दिशियौ बोलदै लागौ, “ओ युसुफ! दाऊदा री खानदानी रौ, तू तिऐं मरियम ज़ुण तेरी छ़ेउड़ी हुणै वाल़ी आ। तिऐं आपणै रै काऐ आणना लै नाईं डौर, कैलैकि ज़ो तिंआरै गर्भा दी आ, सेऊ पवित्र आत्मा री तौरफा कु आ। 21तिंआरौ एक मांऊ हुआ आ और तू तेसरौ नाऊं यीशु छ़ाड़ै, कैलैकि सेऊ आपणै लोगु रौ तिंउरै पापा कु छ़ुटकारौ कौरालौ।”
22एऊ सब एथीलै हुऔ कि ज़ो वचन प्रभुऐ यशायाह भविष्यवक्ता रै ज़ौरिऐ यीशु रै ज़नमा रै बारै दी बोलौ औन्दौ थौ, सेऊ पुरौ हुआ। 23“देखौ, एक बिण ब्याई गौरकड़ी हुआ और तिंआरौ एक मांऊ हुआ, और तेसरौ नाऊं इम्मानुएल छ़ाड़ाई, ज़ेथरौ मतलब आ परमेश्‍वर आमु आइलै आ।” 24तैबै युसुफ निजा कु बीउज़ुऔ परमेश्‍वरा रै दूता रौ हुकमा कौरी आपणी हुणै वाल़ी छ़ेउड़ी आपणै घौरै आणी। 25और ज़ेबी झ़ांऊ तिंआरौ छ़ोहरु नाईं हुआ लौ तेबी झ़ांऊ सेऊ तिंया काऐ नाईं डैऔ और ज़ैबै मरियमा रै मांऊ हुऔ युसुफै तेस मांऊ रौ नाऊं यीशु छ़ाड़ौ!

This work is licensed under Creative Commons Attribution-ShareAlike 4.0 License.


Learn more about पहाड़ी महासुई

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.