Mat GÎTAARÎRIA
GÎTAARÎRIA
Kîrîkanîrorî kîrîa gîkûrû, Ngai nîwerîre andû ake Mûvonokia. Îvuku rîîrî rîa Ûvoro Mwaro, ûrîa wavecanirwe nî Mathaayo rîvecanîte Ûvoro Mwaro rîkauga atî Jesû nîke Mûvonokia ûrîa weranîrwe, na nîrî na njîra yake, Ngai aavingirie ciîranîro ciake. Ûvoro ûyû mwaro tî wa andû tu a kûrîa Jesû aaciarîrwe na agîtûûra, na nîo Ayahudi, nwatî nî wa andû onthe a nthî.
Maûndû marîa marî îvukuurî rîîrî nîmavangîtwe mamenyereretwe waro mûno. Mwandîki ambîrîrîtie kwandîka ûvoro wa gûciarwa kwa Jesû, na agacoka agataarîria ûrîa aavatithirue na akîgerua. Wana rîngî mwandîki nîacokete akavecana ûvoro wa wîra wa Jesû arî Galili, wa kûvunjia, kûthomithania na kûvonania. Mwandîki arîkîrîrîtie na kûvecana ûvoro wa rûgendo rwa Jesû kuuma Galili nginya Jerusalemu, na maûndû marîa meekîkire kiumiarî gîake kîa mûthiia, marîa maarîkîrîrie na kwambwa gwake na kûriûka.
Îvuku rîîrî rîa Mathaayo rîonanîtie atî Jesû nî mwarimû mûnene, ûrîa wîna ûvoti wa gûtaûra Watho wa Ngai, na ûthomithagia Ûthamaki wa Ngai.
Maûndû marîa Jesû athomithanîtie îvukuurî rîîrî, nwa magaanue maita matano: (1) Maûndû marîa aathomithanirie arî Kîrîmarî, megiî mîtugo, mawîra, mawega, na maûndû megiî Ûthamaki wa Îgûrû, kûrîa etîkia makaathiî maakua (Mûrango wa 5—7); (2) Mataaro kûrî arutwa arîa îkûmi na aîrî nîûndû wa wîra wao (mûrango wa 10); (3) Ngerekano ciîgiî ûthamaki wa îgûrû (mûrango wa 13); (4) Kîthomo gîa kwonania vata wa gûtuîka mûrutwa (mûrango wa 18); na (5) Kîthomo kîgiî mûthiia wa mavinda mama tûrî namo na gûka kwa ûthamaki wa îgûrû (mûrango wa 24—25).
Ûvoro ûrîa ûrî îvukuurî rîîrî
Mûtaratara wa methe ma tene ma Jesû Kristû, na gûciarwa gwake 1.1—2.23
Wîra wa Johana Mûvatithania 3.1-12
Kûvatithua na kûgerua kwa Jesû 3.13—4.11
Wîra wa Jesû kûrî andû, arî Galili 4.12—18.35
Kuuma Galili nginya Jerusalemu 19.1—20.34
Kiumia kîa mûthiia kîa Jesû arî vakuvî na Jerusalemu na arî kuo 21.1—27.66
Kûriûka kwa Mwathani na kuumîrîra andû 28.1-20
Currently Selected:
Mat GÎTAARÎRIA: KKB
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019