MALAKI 3
3
1Sisyai, nĩngũtũma mũtũmwa wakwa, na akaseũvya nzĩa mbee wakwa: na Mwĩaĩi, ũla mũmanthaa, akooka na kĩthũlũmũko ĩkalũnĩ yake; na mũtũmwa wa ũtianĩo, ũla mwendaa, sisyai, nĩwũkĩte, easya ũu Yeova wa nguthu. #Isa 40.3; Mt 11.10; Mko 1.2; Lk 1.76; 7.27. 2Ĩndĩ nũũ ũtonya kũmĩĩsya mũthenya wa kũka kwake? Na nũũ wĩũngama yĩla wĩumĩla? Nũndũ ailyĩ mwaki wa mũui wa vetha, na ailyĩ savunĩ wa mũthambya wa ngũa: #Isa 4.4; Yoe 2.11. 3na akekala nthĩ ta mũui na mũthesya wa vetha, na akathesya ana ma Livai, na kũmathesya ta thaavu na vetha; namo makathembea Yeova nthembo na ũlũngalu. #Isa 1.25; Nzek 13.9. 4Nĩvo ĩndĩ nthembo ya Yuta na Yelusaleme yĩendeesya Yeova, o ta mĩthenya ya tene, na ta myaka ya tene mũno. #Esek 20.40. 5Na ngooka vakuvĩ nenyu kũsilĩla; na ngeethĩwa ngũsĩ yĩ mĩtũkĩ kwa aoi, na kwa ilaalai, na kwa ala mevĩtaa ũvũngũ, na kwa ala mavinyĩĩaa mũthũkũmi ũndũ wa ĩtuvi yake, na aka ndiwa, na ala makw’ĩĩwe nĩ aaĩthe, na kwa ala melelũkasya sila wa mwĩkali wa ũeninĩ ndakone kĩla kyake, mateũngĩa, easya ũu Yeova wa nguthu. #Ali 19.13; Kũt 24.17; Yel 29.23. 6Nũndũ nyie, Yeova, ndialyũkaa; kwondũ wa ũu inyw’ĩ, inyw’ĩ ana ma Yakovo, mũiminawa. #Sav 102.27; Iĩo 3.22.
Kumw’a kwa ilungu sya ĩkũmi
7Kuma mĩthenya ya aaĩthe menyu nĩmweelelũkile kuma motw’ĩonĩ makwa, na mũiaamasũvĩa. Nzyokeai, nakwa ngamũsyokea, easya ũu Yeova wa nguthu. Ĩndĩ inyw’ĩ mwĩkũlya, Twĩsyoka ũndũnĩ wĩva? #Nzek 1.3; Meko 7.51. 8Mũndũ akamũyĩa Ngai? Ĩndĩ nĩmũmbũyaa. Ĩndĩ mwĩkũlya, Tũkũyĩe ũndũnĩ wĩva? Nĩ ilungunĩ sya ĩkũmi na nthembo. #Nee 13.10. 9Nĩmũumanĩwe; nũndũ nĩmũmbũyaa, o mbaĩ ĩno nima. 10Etei kĩlungu kya ĩkũmi kyonthe ĩkũmbĩnĩ, nĩ kana vethĩwe lĩu nyũmbanĩ yakwa, na ndatai ũndũnĩ ũũ yu, ethĩwa ndimũvingũĩa mbũthi sya ĩtunĩ, na kũmũtulũĩla ũathimo, mũvaka vae ũthei wa kũwĩanĩa, easya ũu Yeova wa nguthu. #Mwa 7.11; Nth 3.9,10; 2 Ako 9.6–8. 11Na ngamũkan’ya mwanangi nũndũ wenyu, na ndakananga mosyao ma nthĩ yenyu; o na mĩsavivũ yenyu ndĩketĩkya ũsyao wayo mũũndanĩ ũtanavika, easya ũu Yeova wa nguthu. 12Na mbaĩ syonthe ikamwĩtaa atanu; nũndũ mũkeethĩwa nthĩ ya kwendeesya, easya ũu Yeova wa nguthu. #Isa 62.4; Nzev 3.19.
Kĩvathũkan’yo katĩ wa ala alũngalu na ala athũku
13Ndeto syenyu syĩkalĩte syĩ nyũmũ ĩũlũ wakwa, easya ũu Yeova. Ĩndĩ inyw’ĩ mwĩkũlya, Tũkũneenee ata? #Mal 2.17. 14Inyw’ĩ mwaĩtye, No mana kũthũkũma Ngai; ũndũ tũlũmĩtye wĩaĩo wake, ũndũ tũendaa twĩ na woo mbee wa Yeova wa nguthu, ũunĩko nĩ mwaũ? #Yovu 21.15; Nzev 1.12. 15Na yu twĩmeta ekathĩĩi atanu; ĩĩ, o ala mekaa ũthũku nĩmakawa; ĩĩ, nĩmatataa Ngai na makĩvonoka. #Sav 95.9.
16Nĩvo ĩndĩ ala makĩaa Yeova maneenanisye ene kwa ene; na Yeova eethukĩĩsya, na eew’a, na ĩvuku ya ũlilikan’yo yaandĩkwa e vo, nũndũ wa ala makĩaa Yeova, na ala malilikanaa syĩtwa yake. #Kuma 32.32; Kũt 6.6,7. 17Na makeethĩwa makwa, easya ũu Yeova wa nguthu, o makwa mwene ki, mũthenya ũla nĩtw’a; na ngamew’ĩa tei, o tondũ mũndũ wĩw’ĩaa mwana wake mwene tei ũla ũmũthũkũmaa. #Kuma 19.5; Meko 17.31; 1 Vet 2.9. 18Nĩvo ĩndĩ mũkasyoka na kũvathũkan’ya katĩ wa ala alũngalu na ala athũku, ũla ũthũkũmaa Ngai na ũla ũtamũthũkũmaa.
Currently Selected:
MALAKI 3: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956