Mateo 1
NEGAB

Mateo 1

1
Yesu Kristo Wekukpãa
(Luka 3.23-38)
1Wolo wekukpãa Yesu Kristo, bi David, bi Abraham bi. 2#Jɛn 21.3, 12, 25, 26; 29.35; 49.10 Abraham fɔ Isak, Isak fɔ Yakob, ni Yakob fɔ Yuda kɛ enyɛmimɛi lɛ; 3#Jɛn 38.29, 30; Rut 4.18-22 Yuda kɛ Tamar fɔ Perez kɛ Zera, Perez fɔ Hezron, ni Hezron fɔ Ram; 4Ram fɔ Aminadab, Aminadab fɔ Nahashon, ni Nahashon fɔ Salmon; 5#Rut 4.13-17 Salmon kɛ Rahab fɔ Boaz, Boaz kɛ Rut fɔ Obed, ni Obed fɔ Ishai; 6#2 Sam 12.24 Ishai fɔ Maŋtsɛ David, ni David kɛ Uria ŋa lɛ fɔ Solomon. 7#1 Kron 3.10-16 Solomon fɔ Rehoboam, Rehoboam fɔ Abia, ni Abia fɔ Asa; 8Asa fɔ Yehoshafat, Yehoshafat fɔ Yoram, ni Yoram fɔ Uzia; 9Uzia fɔ Yotam, Yotam fɔ Ahaz, ni Ahaz fɔ Hezekia; 10Hezekia fɔ Manase, Manase fɔ Amon, ni Amon fɔ Yosia; 11#2 Maŋ 24.14-15; 2 Kron 36.10; Yer 27.20 Yosia fɔ Yekonia kɛ enyɛmimɛi lɛ, be ni abaŋɔ amɛ nom kɛtee Babilon lɛ. 12#1 Kron 3.17; Ezra 3.2 Ni be ni aŋɔ amɛ nom kɛtee Babilon lɛ sɛɛ lɛ, Yekonia fɔ Shealtiel ni Shealtiel, fɔ Zerubabel, 13Zerubabel fɔ Abiud, Abiud fɔ Eliakim, ni Eliakim fɔ Azor; 14Azor fɔ Sadok, Sadok fɔ Akim, ni Akim fɔ Eliud; 15Eliud fɔ Eleazar, Eleazar fɔ Matan, ni Matan fɔ Yakob; 16#Mat 27.17, 22 Yakob fɔ Yosef ni ji Maria ni fɔ Yesu ni atsɛɔ lɛ Kristo lɛ wu lɛ.
17Belɛ yinɔi lɛ fɛɛ kɛjɛ Abraham nɔ kɛbashi David nɔ lɛ feɔ yinɔi nyɔŋma kɛ ejwɛ; ni kɛjɛ David nɔ kɛbashi Babilon nomŋɔɔ lɛ nɔ lɛ yinɔi nyɔŋma kɛ ejwɛ, ni kɛjɛ Babilon nomŋɔɔ lɛ nɔ kɛbashi Kristo nɔ lɛ yinɔi nyɔŋma kɛ ejwɛ.
Yesu fɔmɔ
(Luka 2.1-7)
18 # Luk 1.35 Agbɛnɛ bɔ ni Yesu Kristo fɔmɔ lɛ yɔɔ nɛ. Enyɛ Maria lɛ, be ni Yosef etsɛ ehe baa ni amɛnako amɛhi shi lɛ, ana akɛ ehiɛ musu kɛjɛ Mumɔ Krɔŋkrɔŋ lɛ mli. 19Shi Yosef, ewu lɛ, akɛni jalɔ ji lɛ ni etaooo akɛ ebɔ lɛ ahora lɛ eto eyiŋ akɛ eeeŋmɛɛ ehe kpoo. 20#Mat 1.18 Shi be ni ejwɛŋɔ nii nɛɛ ahe lɛ, Nuŋtsɔ lɛ bɔfo jie ehe kpo etsɔ̃ɔ lɛ yɛ wɔlamɔ mli, ni ekɛɛ lɛ akɛ, “Yosef, David bi, kaashe oŋa Maria lɛ ŋɔɔ gbeyei, shi musu ni ehiɛ nɛɛ ejɛ Mumɔ Krɔŋkrɔŋ lɛ mli, 21#Luk 1.31; 2.21; Bɔf 4.12 ebaafɔ binuu, ni ooowo lɛ gbɛi akɛ Yesu, ejaakɛ lɛ ebaahere emaŋ lɛ yiwala kɛjɛ amɛhe eshai lɛ amli.”
22 # Yes 7.14 Shi enɛ fɛɛ ba, koni nɔ ni Nuŋtsɔ lɛ wie yɛ gbalɔ lɛ naa lɛ aba mli akɛ,
23“Naa, oblayoo foro lɛ aaana musu,
Ni eeefɔ binuu, ni amɛaawo lɛ
gbɛi akɛ Imanuel, eshishi ji
Nyɔŋmɔ kɛ wɔ yɛ.”
24Ni be ni Yosef te shi kɛjɛ wɔ lɛ mli lɛ, efee bɔ ni Nuŋtsɔ lɛ bɔfo lɛ kɛɛ lɛ lɛ, ni eŋɔ eŋa lɛ; 25#Luk 2.7, 21 shi eleee lɛ aahu kɛyashi beyinɔ ni efɔ binuu. Ni Yosef wo lɛ gbɛi akɛ Yesu.

Bible in Ga Language © Bible Society of Ghana, 2020.


Learn more about ŊMALƐ KRƆŊKRƆŊ LƐ