Juan 17
17
Dios Yayata Jesús mañakunqan
1Tsaynö niskirmi ciëlupa rikarkur Jesús nirqan: <<Taytay, hörä chämushqanam.#17.1a Hörä chämushqanam nirqa wañunanpaq y kawamunanpaq kanqantam nirqan. Tsuriki kaykaptïqa glorificaykallämay#17.1b Glorificaykallämay ninqanqa kawaskatsimar qoriykallämay y llapanpaqpis poderyuq kanäpaq churaykallämay ninanmi.. Tsaynöpam noqapis glorificäshayki#17.1c Noqapis glorificäshayki ninqanqa noqa kawamuptïmi runakuna Dios Yayata alabayanqa ninanmi.. 2Llapan runakunapaq poderyuq kanäpaqmi churamashkanki. Tsaymi poderyuq kä podernïman churamunqayki runakunata mana ushakaq kawayta qaranäpaq. 3Mana ushakaq kawaychö kawaqkunam qamta reqiyäshunki. Tsaynöllam noqatapis reqiyäman. Tsaynöpam tantiyayan japallan Dios kanqaykita y noqata kachamanqaykita.
4<<Runakuna alabayäshunaykipaqmi llapan nimanqaykikunata kay patsachö cumplishkä. 5Taytay, kay patsa manaraq kaptin puntaykichö poderösu kanqänö kananpis poderösu kanäpaq pushakallämay.
6<<Imanö kanqaykitam discïpulükunata musyatsishkä. Qampa kayaptinmi paykunata akraskir podernïman churamushkanki. Tsaymi willakuynikita willakuptï cäsukuyashqa. 7Kananqa llapan yachatsinqäkuna y ruranqäkuna qam munanqaykinölla kanqantam musyayan. 8Llapan nimanqaykitam paykunata yachatsishkä. Tsaymi yachatsinqäkunata creyir qampita kay patsaman shamunqäta musyayan.
9<<Manam llapan runakunapaqtsu mañakamü, sinöqa discïpulükunallapaqmi. Qampa kayaptinmi paykunata podernïman churamushkanki. 10Llapanpis noqaman creyikuqkunaqa qampam y qamman creyikuqkunapis noqapam. Discïpulükuna noqaman creyikuyanqanpitam runakuna tantiyaykäyan noqata kachamanqaykita. 11Kay patsapita qam kaqman kutimuptïmi paykunaqa kay patsallachöraq kayanqa. Santu Dios Yaya, noqantsik jukllaylla kanqantsiknö paykunapis jukllayllanö kayänanpaq cuidaykullay.
12<<Podernïman churamunqayki runakunatam [kay patsachö] shumaq cuidashkä. Tsaynö cuidaptïmi mayqanpis oqrakashqatsu. Peru jukmi sïqa Satanás munanqanta rurar oqrakashqa. Tsaynö päsashqa Dios Yayapa palabran cumplinanpaqmi.#Sal. 41.9; Juan 13.18.
13<<Kananqa qam kaqmannam kutikamushaq. Kay patsachömi discïpulükunata yachatsishkä noqa kushishqa kanqänölla paykunapis kushishqa kawayänanpaq. 14Willakuynikita willakuptïmi chaskiyashqa. Munanqaykita ruranqänö paykunapis rurayaptinmi mana cäsushuqniki runakuna chikiyan. 15Tsaynö chikiyaptinpis manam kay patsapita sas pushakunaykipaqtsu mañakuq, sinöqa Satanáspita tsapaykunaykipaqmi. 16Qampa podernikichö kanqänömi paykunapis podernikichöna kaykäyan.
17<<Willakuynikiqa rasunpa kaqmi. Willakuyniki ninqannö kawayänanpaq yanapaykullay. 18Kay patsaman kachamanqaykinöllam paykunatapis munanqaykita rurayänanpaq kachaykä. 19Nimanqaykinöllam llapantapis cumpliykä. Tsaynöpam noqata rikäyämar paykunapis ninqaykikunata cumpliyanqa.
20<<Peru manam discïpulükunallapaqtsu mañakamü, sinöqa willakuyanqanta chaskir noqaman creyikamuqkunapaqwanmi mañakamü. 21Taytay, noqantsik jukllaylla kanqantsiknö kikinkunapurapis y noqantsikwanpis jukllayllanö kawayänanpaq yanapaykullay. Tsaynö kawayanqanta rikarmi wakin runakunapis tantiyayanqa kachamanqayki Cristo kanqäta.
22<<Willakuynikita tantiyatsimanqaykinöllam tantiyatsishkä. Tsaymi noqantsik jukllaylla kanqantsiknö paykunapis jukllayllanö kayanqa. 23Jukllayllanömi paykunawan kä y qampis noqawan jukllayllam kanki. Tsaymi paykunapis juk shonqulla kuyanakuyaptin kachamanqayki Cristo kanqäta runakuna musyayanqa. Tsaynöllam musyayanqa noqata kuyamanqaykinölla paykunatapis kuyanqaykita.
24<<Taytay, podernïman churamunqayki runakuna noqawan kawayänantam munä. Puntächö karmi rikäyämanqa poderyuq kanäpaq churamanqaykita. Kay patsata manaraq kamarmi kuyamar poderyuq kanäpaq churamarqayki.
25<<Taytay, mana cäsushuqnikikuna manam reqiyäshunkitsu. Peru noqam sïqa reqiq. Tsaynöllam podernïman churamunqayki runakuna musyayan kay patsaman kachamanqaykita. 26Qampa willakuynikitam yachatsishkä. Tsaynöllam imaypis yachatsishaq noqawan jukllayllanö kawayänanpaq y noqata kuyamanqaykinö kuyanakuyänanpaq>>.
Currently Selected:
Juan 17: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.