Juan 15
15
Üvapa yuranman Jesús iwalatsinqan
1Tsaypitanam Jesús nirqan: <<Noqam rasunpa kaq üvapa yuran kä.#Sal. 80.8-16; Isa. 5.1-7. Taytänam üva cuidaq. 2Mayqan rämäpis mana wayuptinqa Taytämi walluskinqa. Peru wayuq kaqtam sïqa mas wayunanpaq shumaq llawmipan. 3Üvata llawmipaptin limpiu kanqannömi qamkunapis ninqäkunata cäsur jutsaykikunapita limpiuna kayanki.
4<<Noqawan jukllayllanö kawakuyay. Tsaynö kawayaptikim noqapis qamkunawan jukllayllanö kashaq. Yuranpita pakishqa räma mana wayunqannömi qamkunapis noqawan mana jukllayllanö karqa Dios Yaya munanqannö kawayta puëdiyankitsu.
5<<Noqam üvapa yuran kä. Qamkunam rämäkuna kayanki. Tsaymi noqawan jukllayllanö kawarqa alli wayuq rämanö kayanki. Peru noqawan jukllayllanö mana kawarmi sïqa ni ima rurayta puëdiyankitsu. 6Pipis noqawan jukllayllanö mana kawarqa yuranpita wallushqa rämanömi tsakinqa. Tsakiskiptinnam qoriskir ninaman jitaykuyanqa.
7<<Noqawan jukllayllanö kar y yachatsiyanqaqnö kawarmi llapan mañakayämanqaykita chaskiyanki. 8Tsaymi alli wayuq üvanö kar rasunpa discïpulükuna kayanki. Tsaynö kawayaptikim Taytäta alabayanqa.
9<<Taytä kuyamanqannömi noqapis qamkunata kuyayaq. Tsaynö kuyaykäyaptiqqa qamkunapis kuyayämay. 10Mandamientükunata cumplirqa rasunpam kuyayämanki. Tsaynöllam noqapis Taytäta kuyar mandamientunkunata cumplï. 11Tsaykunatam niyaq noqa kushishqa kawanqänö qamkunapis kushishqa kawayänaykipaq.
12<<Noqapa mandamientüqa kaymi: Qamkunata kuyayanqaqnö juknin jukninwanpis kuyanakuyay.#Juan 13.34; 15.17; 1Juan 3.23; 2Juan 5. 13Rasunpa kuyakuq karqa amïgun raykum wañunmanpis. 14Llapan ninqäkunata cäsurmi qamkunapis amïgü kayanki. 15Servikuq kayanqaykita mananam niyäshaykinatsu. Servikuqtaqa manam patronnin imata yarpanqantapis willantsu. Peru amïguntam sïqa llapan yarpanqanta willan. Tsaynöllam qamkunatapis amïgü kayaptiki Taytä nimanqankunata llapanta willayashkaq.
16<<Manam qamkunatsu akrayämashkanki; noqam qamkunata akrayashkaq. Tsaynömi akrayashkaq maypa aywarpis alli wayuq jachanö kar allikunata rurayänaykipaq y tsay rurayanqaykikuna imaypis kaykänanpaq. Tsaymi shutïchö imatapis mañakuyanqaykita Taytä qarayäshunki. 17Mandamientü ima ninqantam yapay niyaq: Juknin jukninwanpis kuyanakur kawakuyay.
Jesúsman creyikuqkunata chikiyänanpaq ninqan
18<<Pipis chikiyäshuptiki ama llakikuyaytsu. Tsaypa rantin musyayay puntata noqatapis chikiyämanqanta. 19Jutsata rurar kawayaptikiqa Diosta mana cäsuq runakunam kuyayäshunkiman. Peru Dios Yaya munanqannö kawakuyaptikim chikiyäshunki.#Juan 17.14-18. Pay munanqannö kawayänaykipaqmi qamkunata akrayashkaq.
20<<Yarpäyay qamkunata niyanqaqta: <Servikuqqa manam patronninpita mas poderyuqtsu>.#Mat. 10.24; Luc. 6.40; Juan 13.16. Tsay niyanqaqnöllam noqata chikiyämarqa qamkunatapis chikiyäshunki. Noqa ninqäkunata chaskirqa qamkuna niyanqaykitapis chaskiyäshunkim. 21Noqa raykum runakuna chikiyäshunki kachamaqnï Taytäta mana reqirnin.
22<<Kay patsaman shamur mana willakuptïqa manam jutsayuqtsu kayanman.#15.22 Tsaynö nirmi Jesucristo nirqan: Kay patsaman shamur mana willakuptïqa mana creyikayämanqanpita runakuna manam jutsayuq kayanmantsu karqan. Peru Diospa willakuyninta willakuptï mana chaskirmi sïqa jutsayuq kayan. 23Noqata chikiyämarmi Taytätapis chikiyan.
24<<Pipis mana ruranqan milagrukunata puntankunachö ruraykaptïpis chikiyämarmi jutsayuq kayan. Noqata chikiyämarmi Taytätapis chikiyan. Tsay milagrukunata mana ruraptïqa manam jutsayuqtsu kayanman karqan. 25Leyninkunachömi nin: <Jutsannaq kaykaptïmi runakuna chikiyämashqa>.#Sal. 35.19; 69.4. Tsay ninqannöllam llapanpis cumpliykan.
26<<Taytä kaqpita Yanapakuqta kachamuptïmi noqapaq runakunata musyatsinqa. Tsay Yanapakuqqa rasun kaqta tantiyatsikuq Espíritu Santum. 27Tsaynöllam qamkunapis qallananpita noqawan purishqa kar noqapaq musyatsiyanki.
Currently Selected:
Juan 15: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.