Hebreos 1
1
Librupa qallanan
1Mas unayqa profëtankunawanmi Dios Yaya yapay yapay tukuynöpa unay aylluntsikkunata parlaparqan. 2Peru kay ultimu tiempuchönam Tsurin Jesucristuwanna willakuyninta willamantsik. Paywanmi kay patsata ciëluta kamarqan. Paytam llapantapis poderninchö katsinanpaq churarqan. 3Jesucristum Dios Yaya imanö kanqanta musyatsimantsik. Payta reqirmi kikin Dios Yayatapis reqintsik.#Juan 1.1-3; Col. 1.15-17. Poderösu palabranwanmi llapan kamanqankunatapis mandan munanqannö kayänanpaq. Jutsantsikpita purificashqa kanapaq wañurmi gloriaman kutirqan. Kananqa Dios Yayapa trönun derëcha kaq lädunchömi jamaykan.
Angelkunapitapis Jesucristo mas poderyuq kanqan
4Tsaynö karmi Dios Yayapa Tsurin Jesucristo llapan angelkunapitapis mas poderyuq. Tsaynöllam shutinpis angelkunapa shutinpita mas respitashqa.#1.4 Shutinpaq parlarqa Jesús Diospa Tsurin kanqanta y salvamaqnintsik kanqantam parlan. 5Dios Yaya manam ni imaypis angelkunata nirqantsu:
<<Qammi tsurï kanki.
Kanan junaqpitam taytayki kä>>.#1.5 Kanan junaqpitam taytayki kä ninqanqa manam puntata Tsurin mana kanqantatsu nin, sinöqa Jesucristo Dios Yayapa Tsurin kanqanta tsay junaqpita musyatsinqantam nin. Tsaynö musyatsirqan wañunqanpita Jesucristuta kawaskatsimurmi (Hech. 13.33).#Sal. 2.7.
Tsaynöllam mastapis Dios Yaya nirqan:
<<Noqam paypa taytan kashaq.
Paynam noqapa tsurï kanqa>>.#2Sam. 7.14; 1Crón. 17.13.
6Tsaynöllam japallan Tsurinta kay patsaman kachamur Dios Yaya nirqan: <<Llapan angelkunapis payta adorayätsun>>.#Deut. 32.43.
7Angelkunapaqmi Dios Yaya nirqan:
<<Angelnïkunatam wayratanö kachä.
Servimaqnïkuna karmi lunyaykaq ninanö kayan>>.#Sal. 104.4.
8Peru tsurinpaqnam nirqan:
<<Dios Yaya, trönuykichömi imayyaqpis mandakuq kanki.
Qammi llapanta alli mandanki.
9Pipis allita ruraptinmi kushikunki.
Mana allita ruraptinmi rabyakunki.
Tsaymi Dios Yaya qamta churashushkanki pïmaypitapis mas kushishqa kanaykipaq>>.#Sal. 45.6-7.
10Tsaynöllam Tsurinpaq nirqan:
<<Dios Yaya, qammi kamanqayki höra kay patsatapis shumaq patsätsishkanki.
Ciëlutapis makikiwanmi kamashkanki.
11Llapan kamanqayki ushakaptinpis qamqa imaypis kaykankim.
Llatapa makwayaqnömi llapanpis ushakanqa.
12Mantuta doblaqnömi kamanqaykikunata churanki.
Llatapata cambiaqnömi trukatsinki.
Llapan ushakaptinpis qamqa imaypis kanqaykinöllam kaykanki.
Qamqa manam ni imaypis awkinyankitsu>>.#Sal. 102.25-27.
13Manam mayqan angeltapis Dios Yaya nirqantsu: <<Derëcha kaq lädüman jamakamuy llapan chikishuqnikikunata podernikiman churamunqäyaq>>.#Sal. 110.1; Mat. 22.44; Hech. 2.34; Heb. 1.3.
14Tsaymi angelkunaqa Dios Yayapa mandädunchö kayan. Paykunatam Dios Yaya kachamun salvashqa kaqkunata yanapananpaq.#Mat. 4.11; Luc. 1.19.
Currently Selected:
Hebreos 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.