Gálatas 1
1
Apóstol Pablo saludakunqan
1-2Galacia provinciachö wawqikuna y panikuna:
Noqa Pablum kay cartata qamkunaman cartakamü. Apóstol kanäpaq manam runakunatsu churayämashqa, sinöqa Jesucristo y payta kawatsimuq Dios Yayam churamashqa.
Kaychö wawqikuna y panikunam saludayämushunki. 3Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy. 4Taytantsik Dios Yaya munanqannömi kay patsachö jutsapita salvamänapaq Jesucristo wañurqan.#Mat. 20.28; Mar. 10.45; 1Tim. 2.6; Tito 2.14. 5Dios Yaya imayyaqpis alabashqa kaykullätsun. Amén.
Wawqikuna y panikuna mana alli yachatsikuyta chaskiyanqan
6Musyayanqaykinömi Jesucristupa kuyakuyninwan Dios Yaya qayayäshurqayki. Tsayta musyaykarqa ¿imanirtan mana alli yachatsikuyta chaskir manaraqpis unayta Dios Yayapita witikuyashkanki? ¡Tsaytaqa manam imanöpa tantiyaytapis puëdïtsu! 7Jesucristupa willakuyninpita juk mas willakuyqa manam salvakänapaq kantsu. Tsaynö kaykaptinpis wakin runakunam Jesucristupa willakuyninman yaparkur mana allikunata yachaykätsiyäshunki.
8Yachatsiyanqaqta manakaqman churar pipis mana allikunata yachatsiptinqa infiernuman Dios Yaya jitarputsun. Noqakunatapis mana allikunata yachatsiyaptiqqa infiernuman jitarpayämätsun. Ciëlupita shamuq angeltapis llutanta yachatsiptinqa infiernuman jitarputsun. 9Yapaymi nï: Pipis Jesucristupa willakuynin jananman mana alli yachatsikuyta yapaq kaqtaqa infiernuman jitarputsun.
10Tsaynö nir ¿runakuna aläbayämänantatsuraq ashï? ¿Runakunapita alli rikashqa kaytatsuraq munä? Noqaqa manam runakuna aläbayämänanpaqtsu yachatsï, sinöqa Dios Yaya: <<Allitam rurashkanki>> nimänanpaqmi.#1Tes. 2.4. Runakuna aläbayämänan raykulla yachatsikurqa manam Jesucristupa serviqnintsu käman.
Apostolnin kananpaq Pabluta Jesucristo churanqan
11Wawqikuna y panikuna, shumaq tantiyakuyay. Alli willakuyta willakunqäqa manam runakunapa yarpaynintsu. 12Tsay willakuytaqa manam runatsu yachatsimashqa, sinöqa kikin Jesucristum revelacionchö tantiyatsimashqa.
13Qamkunam musyayanki ñawpata Israel runakunapa costumbrinkunata cumplir imanö kanqäta. Tsay witsaymi Jesucristuman creyikuqkunapa contran shärir qatikacharqä. Paykunatam llapanta ushakätsiyta munarqä.#Hech. 8.3; 22.4-5; 26.9-11. 14Wakin Israel majïkunapitapis masmi costumbrïkunata välitsirqä.#Hech. 22.3. Llapan paqta majïkunapitapis masmi Moisés qellqanqankunata cumplirqä.
15Peru imanö kaptinpis manaraq yuriptïmi Dios Yaya llakipämar payta servinäpaq akramashqa.#Isa. 49.1; Jer. 1.5. 16Tsaypitam Jesucristuman creyikunäpaq shumaq tantiyatsimar#Hech. 9.3-6; 22.6-10; 26.13-18. mana Israel runakunata willakuyninta willanäpaq kachamashqa.
Tsaynö kachamaptinmi willakuyninta tantiyatsimänanpaq pitapis tapukurqänatsu. 17Manam noqapita mas punta kaq apostolkunawan parlanäpaq Jerusalénman aywarqätsu. Masbienmi Arabia partipa aywarqä. Tsaypitanam Damasco markaman yapay kutirqä. 18Tsaypitam kimsa watataraq Pedruwan parlaq Jerusalénman aywarqä.#Hech. 9.26-30. Tsaychömi chunka pitsqa junaq paywan paqta kayarqä. 19Tsaychömi reqirqä Señor Jesucristupa wawqin Santiaguta. Peru wakin apostolkunataqa manam reqirqätsu. 20Dios Yaya musyanmi mana llullakunqäta.
21Tsaypitanam Siria y Cilicia provinciakunapa aywarqä.#1.21 Cilicia provinciachömi Pablupa markan Tarso karqan (Hech. 9.30). Siria provinciachönam Antioquía karqan (Hech. 11.25-26). 22Judea provinciachö#1.22 Judea provinciachömi Jerusalén karqan. wawqikuna y panikuna manam ni mayqanpis reqiyämarqantsu. 23Paykunash wiyayänaq: <<Qatikachämaqnintsik runam kananqa Jesucristupa willakuyninta willakurna puriykan>>.
24Tsaynö niqta wiyarshi Dios Yayata alabayänaq.
Currently Selected:
Gálatas 1: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.