JOB 1
1
Job shuti runaguta llaquicuna japishcatami villajun
1Uz shuti llactapimi, Job shuti runagu causajurca. Paica, ima pandatapash na ruraj, aligutalla ruraj, Taita Diostapash manllaj, nalita ruranamandaca anchurishca runami carca. 2Paica, canchis churicunata, quimsa ushicunatami charirca. 3Paipaj jazindapica, canchis huaranga llamacunata, quimsa huaranga camellocunata, picha patsaj yunta huagracunata, picha patsaj burrocunata, servijcunatapash ashtacatapachami charirca. Indi llujshimuj ladopi causanajuj puramandaca, chai runami tucuita yali charij carca.
4Paipaj churicunaca, paicuna huacharishca punlla pactajpimi, paicunapaj huasiman rishpa, tucuicuna jatun micuita ruran carca. Paicunapaj quimsa panicunatapash, paicunahuan micuchun, ufiachunmi cayachun cachan carca. 5Chai jatun micui punllacuna tucurishca jipami, cashna ruran carca: Job runaguca, paipaj tucui huahuacuna Diospajlla tucushpa alichirichunmi, cachan carca. Paica, tutamandata jatarishpami, paipaj churicuna mashna churicuna cashcashnallata, Diosman animalcunata cushpa huañuchishpa, tucuillata rupachin carca. Job runaguca, cashnami nijurca: “Ñuca huahuacunaca, imapipash juchata rurarcapashchari. Taita Diostapash fiñashpa, paicunapaj shungupi nali shimicunata rimarcapashchari” nircami. Shina nishpami, fiesta tucurishca jipaca, punllandi chashna ruran carca.
6Shuj punllami, Taita Diospaj churicunaca, pai Mandaj Diospaj ñaupajpi ricuringapaj shamurca. Paicuna purapica, Satanaspashmi shamurca. 7Chaipimi Mandaj Diosca, Satanastaca:
—¿Maimandata shamungui?— nirca.
Shina nijpimi Satanasca, Mandaj Diosman cashna nishpa tigrachirca:
—Alpa pachata muyushpa, chaipi purishpami shamuni— nircami.
8Shina nijpimi Mandaj Diosca, Satanastaca cashna nirca:
—Ñucata servij Job runataca, ima pandatapash na ruraj, aligutalla ruraj, Taita Diostapash manllaj, nalita ruranamanda anchurishca cajtaca, ¿nachu ali ricurcangui? Chai alpa pachapica, paishnaca pipash na tianllu— nircami.
9Shina nijpimi Satanasca, Mandaj Diosman cashna nishpa tigrachirca:
—Job runaca, ¿yangamandachu Taita Diosta manllan? 10¿Nachu canllata paitapash, paipaj huasi ucu puratapash, tucui imatalla pai charishcatapash, tucuilla muyundita cuidajungui? Paipaj maquihuan imata rurajpipash, ninandami bendiciarcangui. Chaimandami pai imata charishcacunaca, cai llactapica ninanda mirashca. 11Ashtahuangarin cunanda, cambaj maquita chutashpa, pai imatalla charishcacunata quichuyari. Shina rurajpica, ¿nachu candaca, cambaj ñaupajpillata nalicachishpa nali shimicunata rimanga?— nircami.
12Shina nijpimi Mandaj Diosca, Satanastaca cashna nirca:
—Ricui, pai imatalla charishcacunaca cambaj maquipimi. Shina cajpipash paitalla, ama cambaj maquihuan tacaringui— nircami.
Shina nijpica Satanasca, Mandaj Diospaj ñaupajmanda llujshishpa rircallami.
13Shuj punllami, cashna tucurca: Job runagupaj churicunapash, ushicunapash, paicunapaj punda huauquipaj huasipimi micunajurca, vinotapash ufianajurca. 14Chaipimi shuj villaj runa, Job runagupajman shamushpa cashna nishpa villajurca:
—Huagracunaca yapunajurcami. Chai ladopillatami, burrocunapash micunajurca. 15Chaipimi, sabeo nishca runacuna ñapash shamushpa, canda servijcunata japishpa, espadahuan huañuchirca. Chaita villangapaca, ñucallami quishpirircani— nijurcami.
16Chai runa villajujpillatami, shuj runa chayamushpaca, cashna nirca:
—Taita Diospaj nina jahua pachamanda urmamushpami, llamacunatapash, michij runacunatapash rupachishpa tucuchirca. Chaita villangapaca, ñucallami quishpirircani— nircami.
17Chai runapash villajujpillatami, shuj runa chayamushpaca, cashna nirca:
—Quimsapi shicanyarishca caldeocuna chayamushpami, camellocunata tandachishpa ñapash aisashpa rinajurca. Canda servijcunatapash, espadahuanmi huañuchirca. Chaita villangapaca, ñucallami quishpirircani— nircami.
18Chai runapash villajujpillatami, shuj runa chayamushpaca, cashna nirca:
—Cambaj churicunapash, ushicunapash paicunapaj punda huauquipaj huasipimi micushpa, vinotapash ufianajurca. 19Chaipica, jichushca pamba ladomanda ninan acapana shamushpami, huasi chuscundi lado tigranacunapi huactarca. Shina huactajpi, chairalla viñaicunapaj jahuapi urmajpimi huañurca. Chaita villangapaca, ñucallami quishpirircani— nircami.
20Shinamandami Job runaguca jatarishpa, paipaj jahualla churajushcata liquishpa, umatapash aspirishpa, alpapi cungurishpa Diosta ninanda alicachirca. 21Paica cashnami nirca:
—Ñuca mamapaj vijsamandaca, lluchullami huacharircani. Lluchullallatami, alpaman tigrana cani. Mandaj Diosmi cararca, Mandaj Diosllatami quichurca. Mandaj Diospaj shutica, aligumari ni tucushca cachun— nircami.
22Chai tucui llaquicuna shamujpipash, Job runaguca napacha juchataca rurarcachu. Taita Diostaca, ima nalitapash na rimarcachu.
Currently Selected:
JOB 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.