ESDRAS 1
1
Ciro shuti jatun mandajmi, Jerusalenman tigrachun mandashca
(2 Crón. 36:22-23)
1Ciro shuti jatun mandajca, Persia llactataca ñami shuj huatata mandajurca. Chai huatapimi Mandaj Diosca, Jeremías runaghuan villachishca shimicuna pactachun, Mandaj Diosca, Persia llactata jatun mandaj Ciro shuti runapaj shungupi yuyaita curca. Shinamandami, pai mandajuj tucui llactapica, shimihuanllapash escribichishpapash, cashna nishpa villachun mandarca: 2“Persia llactata jatun mandaj Ciro shuti runaca, cashnami nin: ‘Jahua pachapi causajuj Mandaj Taita Diosmi, tucui cai pachapi tiaj llactacunata mandanataca ñucaman cuhuashca. Shinallata Judá llactapi tiajuj Jerusalenbi, Diospaj huasita rurachumbashmi mandahuarca. 3Canguna purapi Dios agllashcacuna tiajpica, Taita Diosca paihuan cachun. Shinallata Judá llactapi tiaj Jerusalenman vichai rishpa, israelcunata Mandaj Taita Diospaj huasita shayachipachunlla. (Paica, Taita Diosmi). Paica, Jerusalenbimi causajun. 4Shinallata maijan llactapi quedashca causanajujpipash, chaipi causajcunaca culquita, orota, imalla alicunata, animalcunata carashpa ayudapaichi. Diospaj huasita shayachinajuchun, cangunapaj tucui munaihuan imagutapash carashca jahuami, chashna ayudana canguichi. Chai huasica, Jerusalenbimi tiajun’ ninmi” nishpa villachunmi mandarca.
Jerusalenman tigrashcatami villajun
5Shinamandami Judá aillupaj, Benjamín aillupaj ñaupa taitacunapaj huasi ucu puracunata mandajcunapash jatarinajurca. Shinallata curacunapash, levitacunapash, Mandaj Diospaj huasita shayachingapaj, Jerusalenman vichai rina yuyaita paicunapaj shungupi Taita Dios cujpimi, chai yuyaita japijcunaca tucuicuna alichirinajurca. Chai huasica, Jerusalenbimi tiajun. 6Paicunapaj muyundipi tucui causajcunami culquihuan, orohuan, tucui alicunahuan, animalcunahuan, ima juyaillacunahuan ayudanajurca. Ashtahuan imagutapash paicunapaj munai carashca jahuami, chashna ayudanajurca. 7Mandaj Diospaj huasipi imata charishcacunataca, jatun mandaj Ciro shuti runami tigrachingapaj llujshirca. Chaicunataca Nabucodonosor runami, Jerusalenmanda llujchishpa apashpa, paipaj dioscunapaj huasipi churashca carca. 8Chaicunataca, Persia llactata jatun mandaj Ciro shuti runaca, culquita alichij Mitrídates shuti runatami llujchichun mandarca. Paimi, Judá llactata mandaj Sesbasar shuti runapaj maquipi cuentashpa curca. 9Paicuna cuentashcacunaca, caicunami carca: Orota rurashca quimsa chunga jatun tastacuna, culquita rurashca huaranga jatun tastacuna, ishcai chunga iscun cuchillocuna, 10orota rurashca quimsa chunga uchilla tastacuna, culquita rurashca chuscu patsaj chunga uchilla tastacuna, ashtahuan shuj huaranga imalla charishcacunapashmi carca. 11Orota, culquita rurashca imalla charishcacunaca, tucuimandaca picha huaranga chuscu patsajmi carca. Tucui chaicunataca Sesbasar shuti runaca, Babilonia llactapi prezu causanajushcamanda, Jerusalenman paihuan vichai shamujcunahuanmi apamurca.
Currently Selected:
ESDRAS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.