YouVersion Logo
Search Icon

ECLESIASTÉS 1

1
Cai pachapica, imapash yangallami
1Villaj villashca shimicunami. Davidbaj churica, Jerusalenbi jatun mandajmi carca. 2Yanga yangapachami nircami chai villaj runaca. Yanga yangapachami. Tucui imapash yanga yangami. 3Indi punllayachijuj cai pachapi tucui imatapash ninandapacha rurashpa trabajaj runaca, ¿ima alitata japin? 4Shuj miraicunaca chinganmi, shuj miraicunami huacharin. Ashtahuangarin cai pachaca, causaita causaicaman tiajunllami. 5Indi llujshimushpaca, cutin huashajunllami. Llujshimushca pushtumanllatami, ucha tigran. 6Huairapash uraiman huairajushpata, vichaiman muyushpa rinllami. Chashna muyushpa muyushpa rijushpallatami, chai pushtumanllata chayan. 7Tucui jatun yacucunami, mama cuchaman chayan. Shina cashpapash mama cuchaca, na jundanllu. Jatun yacucunaca, maimanda llujshishpa shamushcamanllatami, cutin shamungapaj tigran. 8Runa parlai ushashcatalla parlashcatapash yalimi, tucui imapash shaijuchin. Ñavica ricunataca, ima horapash na shaijunllu. Rinripash, uyanataca na shaijunllu. 9¿Imata pundaca tiarca? Jipaman imapash tianallatami tiarca. ¿Imatata rurashca cashca? Jipaman imata ruranatallatami rurashca. Indi punllayachijuj cai pachapica, imapash na mushuj tianllu.
10“Ricui, caica mushujmi” ningapaca, ¿imapash tianllu? Cunambi tucui ima tiashcapash, punda huatacunallatami ña tiashca. 11Punda ima tiashcata yarinaca, na tianllu. Jipaman ima tucunataca, chai jipaman causajcunapash na yaringachu.
Villaj runaca, tucuita alipachami yachashca
12Villaj ñucami, Israel llactapaj jatun mandaj cashpaca, Jerusalenbi mandajurcani. 13Cai pachapi tucui imatalla ruranajushcata yachangapaca, tucui shunguhuan, alipacha yachaihuanmi callarishpa ricujurcani. Chai shinlli ruranata rurashpa causachunga, Taita Diosmi huañuna aichayu runacunaman curca.
14Indi punllayachijuj cai pachapi imatalla ruranajujtaca, tucuitami ricurcani. Ricuichi, tucui chaicunapash yangallami, yuyaita shaijuchingapajllami.
15Vishtuyashcataca, na alichi usharinllu, ashalla illajtapash na cuentai usharinllu.
16Ñuca shungupica, cashnami yajurcani: “Ricui, ñucaca Jerusalenbi punda mandajcunata yalimi jatunyachi tucushcani, ashtahuan yachajushcapashmi tucushcani. Ñuca shungupipash alipacha yachajuita japishpami yachajushcani. 17Ali yachaita rijsingapajmi, tucui shunguhuan chaitalla yariajurcani. Shinallata juizu illaj canatapash, imapash yangacunata ruraj canatapashmi yachajurcani. Tucui chaicunapash yuyaita shaijuchingapajllami” yajurcanimi. 18Ninandapacha yachajushca cajpica, imapash ashtahuanmi fiñachin. Pipash ashtahuan yachajushpa catijushpaca, llaquitami mirachin.

Currently Selected:

ECLESIASTÉS 1: QUII

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy