HECHOS 1
1
Diosca, paipaj jucha illaj Espirituta cachamushami nishcami 1Punda libropica, Jesús imatalla rurashpa, imatalla yachachishpa callarishcatami, quiquin Teofiloman ña villarcani. 2Jesusta jahua pachapi chasquishca punllacamanmi villajurcani. Diospaj jucha illaj Espíritu yarichijpi villachun cachangapaj agllashcacunaman mandashca jipami, jahua pachapi chasqui tucurca. 3Paicunamanmi, ninanda llaquichi tucushpa huañushpa causarishca jipa, ama ishcai shungu tucunajuchun, tauca ricuchinacunahuan, chuscu chunga punllacaman, cutin cutin ricurijurca. Chashna ricurishpami, Taita Dios mandajujmanda villajurca.
4Jesusca, paicunahuan cashpallatami, cashna nishpa mandarca:
—Jerusalenmandaca na maimambash rishpami, ñuca Taita cachamushapacha nishcata shuyanajuna canguichi. Chaitaca, ñuca villajujta ña uyarcanguichimi. 5Juanga, yacuhuanllami bautizajurca. Ashtahuangarin cangunaca, asha punlla jipallami, Diospaj jucha illaj Espirituhuan bautizai tucunguichi— nircami.
Jahua pachaman Jesús rishcatami villajun
6Jesushuan tandanajushcacunaca, cashna nishpami tapunajurca:
—Apunchi Jesús, ¿cunan punllacunallatacha cai Israel llactataca, ñucanchillata mandachun cutin alichingui?— ninajurcami.
7Shina nijpimi Jesusca, cashna nirca:
—Ima huatacuna, ima punllacunapacha chashna tucunatapash, na yachai ushanachu canguichi. Ima hora chashna tucunataca, ñuca Taitallatami ninan ushaihuan churarca. 8Ashtahuangarin Diospaj jucha illaj Espíritu cangunapajman shamujpimi, ushaita japinguichi. Chai ushaihuanmi, Jerusalenbi, tucui Judea llactapi, Samaria llactapi, cai pacha tucuri manñacaman ñucamanda villagringuichi— nijurcami.
9Shina nijujpillatami, paicuna ricujta Jesustaca jahua pachaman vichai aparca. Paitaca, fuyu quilpajpimi, paicunaca na ashtahuan ricui usharca. 10Jahua pachaman Jesús rijujta vichai ricunajujpimi, yuraj churajunata churajushca ishcai runacuna, ñapash paicunapaj ladopi shayarimurca. 11Paicunaca cashnami ninajurca:
—Galilea llacta runacuna. ¿Imashpata cangunaca, jahua pachata ricunajunguichi? Cangunapaj chaupimanda jahua pachaman apai tucushca cai Jesusllatami, jahua pachaman rijujta canguna imashna ricushcashnallata, cutin shamunga— ninajurcami.
Judas shuti runapaj randica, Matías shuti runatami agllashca
12Chai jipami, Olivos shuti urcumanda, Jerusalenman tigranajurca. Chai urcuca, Jerusalenmandaca shuj kilometropishnami. 13Ña chai puebloman chayashpaca, paicuna causanajuj jahua altibajo huasimanmi vitsianajurca. Chai huasipica: Pedro, Jacobo, Juan, Andrés, Felipe, Tomás, Bartolomé, Mateo shuti runacunapash, Alfeo shuti runapaj churi Jacobopashmi causanajurca. Shinallata Zelote nishca Simonbash, Jacobopaj huauqui Judaspash, chaipillatami causanajurca. 14Paicunaca, huaquin huarmicunandi, Jesuspaj mama Mariandi, Jesuspaj huauquicunandimi tandanajushpa, Diosta shujllashnalla yarishpa mañarianajurca. 15(Chai punllacunapimi, Jesusta crij puracunaca, patsaj ishcai chungashna tandanajun carca). Pedroca, paicunahuan cashpami jatarishpa, cashna nijurca: 16“Tucui crijcuna. Ñaupa punllacunapimi Judas runamandaca, Diospaj jucha illaj Espíritu, Davidman villashpa escribichishca. Chai villashca pactachunmi Judas runaca, Jesusta prezu japichun, ricuchingapaj pushamurca. 17Judas runaca, ñucanchi purami carca. Ñucanchishnallata villachun, paitapash agllashcami carca. 18Pai chashna nalita rurashpa jatushca culquihuanga, alpatami randirca. Chai alpapillatami Judasca, jahuamanda umahuan urmashpa, chaupi vijsapi tugyajpi, tucuilla chunlluli llujshishpa huañurca. 19Chashna tucushcataca, Jerusalenbi tucui causajcunami yacharca. Chaimandami chai alpataca, paicunapaj rimaipica, Acéldama nishpa shutichirca. Shina nishpaca, Yahuarlla Pamba nijunmi. 20Salmos libropica, cashna nishpa escribishcami tiajun:
‘Pai causajushca huasica, jichushca pambashna cachun,
chaipica pipash ama causachun’ nijunmi.
Shinallata:
‘Paiman rurachun mingashcatapash,
shuj runa rurachun’ nishpami villajun.
21Apunchi Jesús ñucanchihuan maiman cashpapash rishpa, shamushpa purijushca punllacunapimi, ñucanchita cumbashpa cai runacunaca purinajurca. 22Cai runacunaca, Juan bautizai callari punllamandapacha, ñucanchi ricujta Jesús jahua pachaman rishca punllacamanmi, ñucanchihuan purinajurca. Jesús causarishcata ñucanchihuan villagrichunga, shuj runata agllashunchi” nijurcami.
23Pedro shina nijpimi, agllanajuchun ishcai puracunata churarca. Shujca, Justo nishca José Barsabás shutimi carca. Shujca, Matías shutimi carca. 24Shina agllashpami, cashna nishpa mañanajurca: “Jatun Dioslla, canmi tucuicunapaj shunguta rijsingui. Cai ishcai puramanda maijanda can agllashcatapash, ñucanchiman ricuchihuai. 25Cambajta rurashpa ñucanchihuan villajuchun agllapangui. Judas runaca, pai rina pushtuman ringapajmi, canda na cazurca” nishpami mañanajurca.
26Shina mañashpa suerteta rurajpica, Matías shuti runapajmi urmarca. Chaimandami Matiasca, villachun cachashca chunga shuj runacunahuan tandanajurca.
Currently Selected:
HECHOS 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.