2 PEDRO 1
1
Alillachu capanguichi nishcami
1Jesucristo villachun cachashca, paita servij Simón Pedromi cani. Imatapash cashcatapacha ruraj ñucanchi Dios Quishpichij Jesucristomandami, juyailla crinataca ñucanchishnallata japircanguichi. Shina cajpimi, cangunaman escribini. 2Taita Diostapash, ñucanchi Apunchi Jesustapash aliguta rijsishcamandaca, ninan juyaitapash, casilla ali causaigutapash, cangunapi ashtahuan mirachijuchunmi munani.
Taita Diosman rijchajmi canchi
3Causaipaj tucui ima ali canatapash, llaquishpa causanatapash, ninan ushaita charij Diosmi ñucanchiman caramurca. Chaitaca, pai punchapambagu cashpa, alicachi tucushca cashpa, ñucanchita cayajpi paita rijsishcamandami, shina caramurca. 4Chaicunata caramushpami Diosca, imatapash juyailla ninandami carasha nishcata pactachirca. Cai pachapica, nalita munashcamandami ima huaglicunapash tian. Chai huaglicunata saquishpa, Diosman rijchaj canata japigrichunmi, chashna ricuchirca. 5Shinamandami canguna ña crij cashcamandaca, ashtahuan tucuipi ali cana canguichi. Shina tucuipi ali cashpami, yachajunataca ashtahuan yariana canguichi. 6Shina yachajushpami, nali munaicunataca cangunallata saquina canguichi. Nali munaicunata cangunallata saquishpami, na ñapash fiñarishpa causana canguichi. Shina na ñapash fiñarishpa causashpami, Diosta yariashpa causana canguichi. 7Diosta yariashpa causashpami, crij purapash juyarishpa causana canguichi. Shina huauqui purashna juyarishpa causajpimi, juyaica tian.
8Chashna causana cangunapi tiajpica, ñucanchi Apunchi Jesucristota rijsishcamandaca, grano fucujunshnami na quillanayachishpa, ashtahuan yachajunguichi. 9Ashtahuangarin chashna causanata na charishpaca, caruta ricuita na ushaj runashnami causan. Pai punda rurashca juchacunata anchuchishcatapash cungashpami, ñausashna causan. 10Huauquicuna, panicuna, chaimandami cangunata Dios cayashpa agllashcata yariajlla causashpa, ashtahuan shinlli tucuna canguichi. Caicunata pactachishpa causashpami, ima horapash na urmashpa causanguichi. 11Shina causajpimi, ñucanchita Mandaj, Quishpichij Jesucristo causaita causaicaman mandajuj llactaman yaicuchun saquinga. Paica na jarcashpa, cushijuihuanmi yaicuchun saquinga.
12Chaimandami, na llullashpa villajuj shimitaca canguna ña yachashpa, ali shinllicuna cajpipash, cutin cutin caicunata yarichijunataca na saquisha. 13Causajushpallata cangunata shinllita tacurishpa rijchachijunshna yarichijushpaca, imatapash cashcatapachami rurajuni yanimi. 14Ñucanchi Apunchi Jesucristo, ñuca ñalla huañunata villajpi yachashpami, caicunataca yarichijuni. 15Ñuca huañushca jipapash, cai villashcataca ama cungashpa yarianajuchunmi, tucui shunguhuan ucha yarichijuni.
Cristo punchapambagu cajtaca ricurcanchipachami nishcami
16Ñucanchi Apunchi Jesucristo ninan ushaihuan shamunataca, na yanga runacuna umachishca parlocunata catishpalla yacharcanchichu. Ashtahuangarin mandana ushaita pai charijta, ñucanchi ñavihuambacha ricushpami yacharcanchi. 17“Caimi, ñuca juyashca Churigu. Paimandami, ninanda cushijuni” nishpami, Taita Diosca juyailla punchapamba chaupimanda rimarca. Paita ninanda alicachishpami, punchapambagumi cangui nirca. 18Jahua pachamanda chashna rimamujtaca, Diospajlla urcu jahuapi Jesushuan cashpami uyarcanchi.
19Profetacuna villashca Shimitapash charinchimi. Chai Shimimi yanata micha punchayachinshna, aliguta villajun. Punllayajujpi llujshimuj luzeroshna, cangunapaj shungu punchayachun, chai Shimita uyashpaca, aligutami ruranajunguichi. 20Caitarami punda yachajuna canguichi: Dios escribichishca Shimipi Dios villashcacuna imata nijujtaca, pipash na paillata yachai ushangachu. 21Dios villashcataca, ima horallapash na gentepaj munailla villashcachu. Ashtahuangarin Taita Diospajlla causanajuj runacuna cashpami, Diospaj jucha illaj Espíritu yarichijpi villanajushca.
Currently Selected:
2 PEDRO 1: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.