Matiu 2
2
Awe olegheri-ịyaar otu oḅeton ạJizos
1Ụmar Jịzos ẹpe Bẹtilihem eelhe aJudia, mem mọ ọpo ạHerod kụ ạda bọ. Íbia bịn awe olegheri-ịyaar ọḍua ẹpe erumuḍio phọ remite ghan bọ kụ oru Jeruselem, 2kụ opuru mọ, “Odi ẹghen ọpo ọmar bọ ọda ạbuo aJu phọ? Yoor mọmiin ẹenaan phọ ọdi ẹpe erumuḍio phọ remite ghan bọ, kụ otu bọ ooseeny ọdi.” 3ẠHerod ọdaam ẹmha phọ rọnaghan ịphen phọ bịn ẹeḅaghami ologhi ọdi, rꞌiloghi oomo ạbuo aJeruselem. 4Kụ ọdi aakpomoghi oomo ạbuo ạrumhu ariil ạrikia phọ rꞌạbutughemia iilogh phọ kụ apuru bịdi mọ, “Ẹghen kụ ẹdi kọmar bọ Kraist phọ?” 5Kụ bịdi ọḅeni nyọdi mọ, “Ẹpe Bẹtilihem eelhe phọ aJudia. Oyil phọ Ẹnaan ạge ịduon mọ,
6 #
Maik 5.2
“‘Nạ ạBetilihem, ẹpe eelhe phọ aJudia,
nạ kẹ́bam esi ikpolom ạramha phọ aJudia.
Esi ạna kụ ẹdi oḍiemiom kạḍua amite,
dị kạda we phọ ạmi Ịzirel.’”
7Kụ ạHerod ạmagh we olegheri-ịyaar phọ esi ịbooghian apuru kụ bịdi ọḅeni nyọdi ọdo phọ amem mọ ẹenaan phọ emite bọ. 8Kụ ọdi ạḅeni bịdi mọ, “Ịki Bẹtilihem ẹmaar ẹwa ẹmiin esi phọ ọmar bọ mọony phọ, mẹmiin, kụ eru ịḅeni ịmi, ọbo mị ạghi aani aaseeny nyọdi.”
9Kụ awe olegheri-ịyaar phọ rọnaghan bọ ịpe ọdaam ẹmha phọ ạghaaph bọ, kụ ọḍua. Ẹenaan phọ bịdi ọmiin bọ ẹpe erumuḍio phọ remite ghan bọ iḍiemiom ni bịdi, tụtu eru ẹmeera ạnyu otu phọ ọbumoony phọ ạrol bọ. 10Mem dị bịdi ọmiin bọ mọ ẹenaan phọ mẹmeera, bịdi ụmoogh ni iboom iboh. 11Kụ bịdi oḍigh otu kụ ọmiin ọbumoony phọ rꞌaMeri onhiin phọ ọdi kụ okpuḍughian ooseeny nyọdi; kụ okpenyon rukuru ạbidi kụ ọngo nyọdi gol, rꞌạfrankinsens, rꞌamaa.
12Ẹnaan ịphur ri bịdi rụru esi ạmalha mọ kúḅula mun kꞌạHerod kụ bịdi okiton ẹnon eten ogheel ẹmha ạbidi.
Oghiil okpetenaan ogheel Ijipt phọ
13Awe olegheri-ịyaar phọ rogheel, kụ ọokpaany Ọmoogh-we phọ aru ạteeny Jọsef ụmalha kụ ạḅeni mọ, “Ḅetenu ạsighe ọbumoony phọ rꞌonhiin phọ asumanam agheel Ijipt, kụ ạrol ẹpe tụtu mị ạmagh nyịna. ẠHerod kạwa ni mọony phọ ịlo oghiigh.”
14Kụ ạJosef aḅetenu ḍughul ạsighe ọbumoony phọ rꞌonhiin phọ agheelom Ijipt, 15#Hos 11.1kụ ạrol ẹpe tụtu ạHerod amugh.
Ịphen phọ imite omuneniom ikpo ọnhu phọ Ẹnaan oyil phọ ọdi ạḅem bọ mọ, “Mị kạmagh ni Mọony phọ ạmi mọ ạḍua eelhe Ijipt agheel.”
Ọzeeghi ịbam ạnmuny phọ
16Mem dị ạHerod alegheri bọ mọ awe olegheri-ịyaar phọ mobi nyịno, rꞌọghagh ologhi kụ arom we mọ ọghi Bẹtilihem rꞌoomo ạramha phọ ekoom bọ ọzeeghi lephiri ạnmuny egbi bụlo mọman ịyal ạsia kụ esoorom. Ọdi ạsighe mem mọ ọpo awe olegheri-ịyaar phọ ọḅeni bọ nyọdi mọ ọmiin ẹenaan phọ kụ alegheriom bọ.
17Ịphen imuneniom ni ịpe aJerimaya oyil phọ Ẹnaan ạghaaph bọ mọ,
18 #
Jer 31.15
“Ẹpe Rama,
ụnaghan ni ẹḍogh dị rẹlooghi rꞌiḅeleghu rꞌọto.
ARechel kụ ramoghi ghan nmụny ọdi dị momuneen,
kụ ómeera mọ ọodereghi nyịno.”
Ọḍua Ijipt origheel phọ
19ẠHerod romugh bọ kụ ọokpaany Ọmoogh-we phọ ạḅile ạteeny Jọsef ụmalha ẹpe Ijipt, 20kụ ạḅeni mọ, “Ḅetenu ạsighe ọbumoony phọ rꞌonhiin phọ aḅulonom eelhe Ịzirel, ịdi eḍighi bọ bụphe ọwa bọ oghiigh ọony phọ momuughu.” 21Kụ ạJosef aḅetenu, ạsighe ọbumoony phọ rꞌonhiin phọ aḅulonom eelhe Ịzirel.
22Mem dị ọdi ạnaghan bọ mọ Ạrkelaos mạsighe dọl ạHerod ọde phọ ọdi rạda Judia, ọdi aghiilaan ni ogheel ẹpe phọ. Kụ roroma nyọdi ụmalha, kụ ọdi agheel ẹpe Galili 23#Mạk 1.24; Luk 2.39; Jọn 1.45arugh ẹmha dị oghol mọ ạNazeret. Ịphen phọ imite omuneniom ịpe ariil phọ Ẹnaan ọghaaph bọ ịlo aMesaya phọ mọ, “Kokol mọ ọdi ọlo ạNazeret.”
Currently Selected:
Matiu 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS