YouVersion Logo
Search Icon

LUCAS 1

1
Teofiloman quillcashcami (1.1-4)
1Ñucanchijpurapi imalla tucushcacunaca chashnatajmi. Chaimantami achcacuna callarishpa ima shina cashcatataj quillcashpa churashun nishcacuna. 2Callarimanta quiquin ñahuihuantaj ricushpa alli huillaita huillajcunami, ñucanchijmanca ima shina cashcatataj alli yachachirca. 3Callarimanta pacha tucui imalla tucushcacunataca, callarishpami alli alli tapurcani. Chaicunaca ñucapajpish alli cajpimi, alli nishca can Teofiloman tucuita callarishpa quillcani. 4Canta yachachishcacunaca, chashnataj cashcata alli yachachunmi quillcani.
Bautizaj Juan huacharinata huillashcami
5Judea llajtata jatun mandaj Herodes mandacui punllacunapimi, Zacarías shuti cura causarca. Paica Abías curapaj huahua huahuacunapurami carca. Paipaj huarmica, Aaronpaj huahua huahuapuramanta Elisabetmi carca. 6Paicunaca ishquindijtajmi Taita Diospaj ñaupajpica, cashcata rurajcuna carca. Jatun Dios tucui mandashcacunata, rurai nishcacunataca chaitataj rurashpa pi mana juchachipajcunami carca. 7Elisabet mana huachaj cashcamantami paicunaca huahua illajcuna carca. Ishquindijtaj ña yuyajcunapishmi carca.
8Zacarías curaca paicunapurapaj chai punllacunapi Diospajta rurana tucujpi chaipi Diospajta ruracujpimi, 9curacuna ruraj cashca shinallataj sorteajpica, Jatun Diospajlla ucuman yaicushpa inciensota rupachinaca, Zacariaspajmi urmarca. 10Chaipi caj tucuicunaca inciensota rupachingacamaca canllapimi Diosta mañacurcacuna. 11Inciensota rupachina altar alli ladomanca, Jatun Diospaj shuj angelmi shayacuj ricurirca. 12Angelta ricushpami, Zacariasca musparishpa jatunta mancharirca.
13Angelca cashnami nirca:
–Zacarías, ama manchaichu. Can mañashcataca Diosca uyashcami. Cambaj huarmi Elisabetca, shuj c'ari huahuatami huachanga. Paitaca Juan shutita shutichingui. 14Pai huacharijpica yallitajmi cushicungui. Shujtajcunapish cushicungacunami. 15Paica Dios alli nishcami canga. Vinotapish, sidratapish mana ubyangachu. Mamapaj huijsamanta pachami jucha illaj Espirituhuan junda canga. 16Achca israelcunatami, paicunapaj Jatun Dios, Taita Diospajman tigrachinga. 17Juanca Eliaspaj espirituhuan, Elías charishca poderllahuantajmi Quishpichijta ñaupashpa ringa. Yayacunapaj shungutaca, huahuacunata c'uyaj cachun tigrachingapaj, mana cazujcunatapish, cashcata rurajcuna shina cachun rurangapajmi chashna canga. Gentecunataca Mandaj Jesusta chasquinallata rurangapajmi chashna canga– nircami.
18Chaimi Zacariasca angeltaca:
–Ñucapish ñuca huarmipish ñamari yuyajcuna canchij. ¿Ima shinataj can huillashca pajtanataca yachashari?– nirca.
19Shina nijpi angelca:
–Ñucaca Diospajta rurangapaj paipaj ñaupajpi shayacuj Gabrielmi cani. Paimari canman cai alli huillaita huillachun cacharca. 20Ñuca huillashcata mana crishcamanta cunanca cambaj huahua huacharingacama upami saquiringui. Ñuca nishca pajtangacamami mana rimaj saquiringui– nircami.
21Chaicamaca canllapi cajcunaca: –Diospajlla ch'icanchishca ucupica, ¿ima nishpataj Zacariasca uniyanchu imamí?– nishpami mancharinacushpa shuyacurcacuna. 22Zacarías llujshimushpaca imata mana rimai tucushpa, ima tucushcataca maquillahuan ricuchishpami huillarca. Mana rimai tucushpa upallataj saquirijpimi:
–Diospajlla ch'icanchishca ucupimari ¿imatatajshi ricushca yuyachin?– ninacurcacuna. 23Diospajta rurana punllacuna ña tucurijpica, Zacariasca paipaj huasimanmi tigrarca.
24Chai punllacuna q'uipami, paipaj huarmi Elisabetca chichushpa pichca quillata mana maiman llujshishpa huasillapi carca. 25Chaipimi: “Mana huachaj nishpa pipish ama rimachun, Jatun Diosmari ñucataca chashna rurashca” nishpa yuyacurca.
Jesús huacharinata huillashcami
26Elisabet chichushca ña sujta quilla cajpimi, Diosca Galileapi caj Nazaret shuti puebloman ángel Gabrielta cacharca. 27Chaipica c'arihuan manaraj chayarinacushca Mariamanmi huillanaman rirca. Mariaca Davidpaj huahua huahuamanta caj Josehuanmi cazaranapaj ari ninacushca carca. 28María maipi cashcaman ángel yaicushpaca:
–¡Allillachu cangui! Jatun Dios canhuan cashcamanta tucui huarmicunata yalli alli nishcami cangui. Taita Dios cushca allicunata chasquijmari cangui– nircami.
29Mariaca angelta ricushpaca, achcata mancharishpami:
–¿Ima nishpataj chashna ninchu, imamí?– nishpa yuyacurca. 30Chaimi angelca:
–María, ama manchaichu. Taita Diosmari canmanca mana c'uyaipajta c'uyajta cungapaj agllashca. 31Cunanca chichu tucushpa shuj c'ari huahuatami huachangui. Chai huahuataca, JESÚS shutita shutichingui. 32Paica jatun nishcami canga. Jahua pachapi caj Jatun Diospaj Churi nishcami canga. Mandaj Diosca, Davidpaj jatun tiyarinatami paimanca cunga. 33Paica Jacobpaj huahua huahuacunatami huiñaita mandanga. Paipaj mandanaca, manataj tucuringachu– nircami.
34Chaimi Mariaca angeltaca:
–¿Ima shinataj chashnaca tucungari? Manaraj cusayuj canica– nirca.
35Shina nijpi angelca:
–Jucha illaj Espiritumi cambaj jahuaman shamunga. Tucuipaj jahuapi caj Diosmi paipaj poderhuan llandunga. Chaimantami Jucha Illaj huacharigrij Huahuaca, Diospaj Churi nishcapish canga. 36Riqui, cambaj familia Elisabetpish mana huachaj nishca cashpapish, yuyaj cashpapish ñamari sujta quillata c'ari huahuata chichu. 37Diosca imatapish rurai tucunllami– nirca.
38Chaimi Mariaca:
–Shinashpaca can nishca shina rurachunlla. Ñucaca Jatun Diospajta rurajmi cani– nijpica, angelca paipaj ñaupajmanta rircallami.
Elisabetta María ricugrishcami
39Chai punllacunapimi, Judá urcucunapi caj shuj puebloman Mariaca utcashpa rirca. 40Chaiman chayashpa Zacariaspaj huasiman yaicushpa Mariaca Elisabettaca: –¿Allillachu cangui?– nijpica, 41Elisabetpaj huijsapi caj huahuaca jaitarircallami. Chaipimi jucha illaj Espirituca Elisabetta japijpi, 42sinchita cashna nirca:
–Canca huarmicunapurapica alli nishcami cangui, cambaj huijsapi caj huahuapish alli nishcamari. 43Ñucataca ¿ima cajpitaj ñucata Mandajpaj mamaca ricuj shamurcanguiyari? 44Can allillachu cangui nijpica ñapish ñuca huahuaca cushicushpa huijsapi jaitarinllamari. 45Jatun Dios ima nishca pajtana cashcata crishcamantaca canca cushichishcami cangui– nircami.
46Chaimi Mariaca:
“Ñuca almaca Jatun Diostami jatunyachin.
47Ñuca espirituhuanca ñucata Quishpichij Taita Diospimi yallitaj cushicuni.
48Diospajta ruraj imapish mana cajtami paica ñucataca agllashca.
Cunanmanta pachami huahua huahuacuna ñucataca, Taita Dios cushichishcami cangui nicungallacuna.
49Tucuita rurai tucuj Diosmi ñucapica, pi mana rurai tucuipajta rurashca.
¡Paipaj shutica jucha illajmi!
50¡Paita manchajcunataca huahua huahuacunatami llaquishpa c'uyacungalla!
51Paipaj maquihuanmi, pi mana ruraipajta rurashca.
Paicunapaj shungupi jatun tucushcacunataca caita chaitami cachashca.
52Jatun tucushca mandajcunataca anchuchishpami, mana jatun tucushcacunataca jatun nishca canapi churarca.
53Yaricaihuan cajcunamanca, charinacunatami yallijta cushca.
Charijcunataca chushajllatami cachashca.
54Diosca pai llaquij cashcata mana cungarishpami, paipajta ruraj israelcunamanca allicunata cushca.
55Chaitaca ñucanchij ñaupa yaya Abrahamman, paipaj huahua huahuacunamanpish huiñaipaj cusha nishca shinallatajmi rurashca” nircami.
56Mariaca Elisabethuan, quimsa quilla shinata tiyashpami, paipaj huasiman tigrarca.
Bautizaj Juan huacharishcami
57Elisabetca huachana punlla pajtajpica, c'ari huahuatami huacharca. 58Elisabetta Dios llaquishpa jatunta c'uyashcata uyashpaca, c'uchullapi causajcunapish, familiacunapish paita ricunaman rishpaca yallitajmi cushicurcacuna.
59Ña pusaj punlla tucujpica, huahuata circuncisionta rurachinamanmi apashpami, huahuataca yayapaj shuti Zacariasta shutichishun nircacuna. 60Ashtahuanpish paipaj mamaca:
–¡Mana! Juan shutimi canga– nijpimi,
61–¿Imamantari? Cambaj familiapica, chai shutica manamari tiyanchu– nircacuna.
62Chashna nishpaca paipaj yayataca maquihuan ricuchishpallami, ima shutitataj shutichisha ningui nishpa tapujpi, 63Zacariasca uchilla tablata mañashpa: “Paipaj shutica Juanmi” nishpa quillcajpica, tucuicuna mancharircacuna. 64Chashna quillcancami paipaj c'allu cacharirishpa rimai callarishpaca, Diosta allimari cangui nirca. 65C'uchullapi causajcunaca yallitajmi mancharircacuna. Tucui chaicunataca, Judea urcucunapi causajcunapish tucuicunami huashan huashan yachaj chayarcacuna. 66Tucui chaita uyajcunami:
–Chai huahua jatunyashpaca ¿ima shinashi canga?– nishpa, caishuj chaishuj tapunacushpa chaitaca paicunapaj shungupi huaquichircacuna. Jatun Diospaj tucuita rurai tucuj maquica chai huahuahuanmi carca.
Chai huahua ima shina canata Zacarías huillashcami
67Juanpaj yaya Zacariasca, jucha illaj Espíritu rimachijpimi, ima shina tucunata cashna nishpa huillarca:
68“Israelcunata Mandaj Taita Diosca allimari.
Paipaj cajcunataca quishpichishpa llujshichingapajmi shamushca.
69Paipajta ruraj Davidpaj huasi ucupuramantami, tucuita rurai tucuj Quishpichijta cushca.
70Callarimanta pachami paipaj jucha illaj profetacunaman caitaca huillachishca:
71Ñucanchijta p'iñashpa mana ricunachijcunapaj maquimanta Quishpichijmi.
72Ñucanchij ñaupa yayacunata llaquishpa, paica pajtachishatajmi nishcata mana cungarishpami quishpichishca.
73Ñucanchij ñaupa yaya Abrahamman cushami nishcata Dios pajtachinaca caimi:
74Cancunata p'iñajcunamanta quishpichishami.
Quishpichijpica imata mana manchashpami ñucapajta ruranguichij.
75Cancunapaj tucui causaipi ñuca munaillata rurashpa, ima jucha illajllami causanguichij nishcami.
76Shinallataj can huahuituca, jahua pachapi caj Diospaj profeta nishcami cangui.
Canmari Quishpichij purina ñanta allichishpa ñaupashpa ringui.
77Can rishpaca paipaj caj gentecuna quishpirichun juchacunamanta ima shina quishpirina yuyaitapish cushpami yachachingui.
78Diosca ñucanchijtaca achcata c'uyashpami tutamantapi inti llujshishpa achijyachij shina jahua pachamanta Quishpichijta cachashca.
79Huañuna manchaihuan amsapi causacujcunapica achijyachichunmi luzta churanga.
Ñucanchijtaca sumaj causaipimi punllanta pushanga” nircami.
80Chai huahua huiñashpaca Diosmanta alli yachajmi carca. Israelcunaman huillanapaj ricurina punllacamami, shitashca pambacunallapi causarca.

Currently Selected:

LUCAS 1: QCHI04

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy