JOSUÉ 1
1
Moisespaj randi Josué pushaj cachun Dios cayashcami
1Mandaj Diosca paipajta ruraj Moisés ña huañujpica Moisesta ayudaj, Josué, Nunpaj churitami cashna nirca: 2“Ñucapajta ruraj Moisesca ñami huañun. Cunanca israelcunaman ñuca cusha nishca allpata japingapajca, canmi paipaj randi shayarishpa tucui israelcunandij cai Jordán jatun yacuta ch'imbana cangui. 3Ñucaca cancunamanca Moisesman nishca shinallatajmi, cancunapaj chaqui maillata sarushca allpataca tucuita cuni. 4Shitashca pambamantaca Líbano urcundij, Éufrates Jatun yacucamami cuni. Heteocuna causan tucui llajtatami inti huashicun ladoman caj mama cuchacama cuni. Tucui chai llajtacunaca cancunapajmi. 5Moiseshuan cashca shinallatajmi canhuanpish casha. Cantaca manataj saquishachu, canmantaca manataj anchurishachu. Chaimanta tucui cambaj causaipi canhuanca pi mana ch'imbapura shayari tucungachu. 6Cancunapaj ñaupa yayacunaman ñuca cusha nishca allpata japinataca, c'ari c'ari tucushpa, ama manchaichu. Chai allpataca, tucui israelcunaman canmi chaupishpa cungui. 7Ashtahuanca ñucaca caitami mandani: Ñucapajta ruraj Moisesman ñuca cushca mandashcata pai canman cushcataca chaitataj pajtachingapaj c'ari c'ari cangui. Alli ladomanpish, lluqui ladomanpish ama anchuringuichu. Chai mandashcacunapi nishca shinataj rurashpaca, tucui imapipish allimi cangui. 8Cai libropi quillcashca tiyacuj ñuca mandashcataca tutapish punllapish rezanataca amataj saquingui. Chashna cashpa yuyaipi charishpami, imalla mandashcataca chaitataj pajtachingui. Chashna rurajpica, tucui can rurashcacunami alli llujshinga. 9Riqui, ñucaca cantaca c'ari c'ari cai, ama manchaichu nishpami mandani. Ama manchanguichu, shaicurishpa ama saquiringuichu. Ñuca canta Mandaj Diosca can maita rijpipish canhuanmi casha” nircami.
Dios cusha nishca llajtata japigringapaj Josué allichishcami
10Chaimi Josueca paita ayudashpa israelcunata pushajcunataca cashna nishpa mandarca: 11“Tucui israelcuna causacun carpa huasicunaman rishpa, tucuicunata cashna mandaichij: Micunacunata allichichij. Ñucanchijta Mandaj Dios ñucanchijman cusha nishca llajtata japigringapajca cunanmanta quimsa punllapimi Jordán jatun yacuta ch'imbashun nigrichij” nircami.
12Josueca Rubenpaj aillutapish, Gadpaj aillutapish, Manasespaj chaupi aillutapish cashnami nirca:
13–Mandaj Diospajta ruraj Moisés nishcata yuyarichij. Paica cashnami nirca: “Cancunata Mandaj Diosca cancuna samarichunca cai allpatami curca. 14Cancunapaj huarmicuna, cancunapaj uchilla huahuacuna, cancunapaj animalcunaca Jordán yacumanta inti llujshin ladoman Moisés cushca allpapi saquirichun. Ashtahuanpish macanacuipaj caj tucui c'ari c'aricunaca macanacunacunata apashpa, cancunapaj huauquicunata ayudanaman ch'imbanguichij. 15Samarichun cancunaman cushca shinallataj paicunamanpish allpacunata Mandaj Dios cungacama ayudanguichij. Mandaj Dios cusha nishca allpata japingacama ayudashpaca, Jordán yacumanta inti llujshin ladoman Taita Diospajta ruraj Moisés cancunaman cushca cancunapaj allpallamantaj tigranguichijllami”– nircami.
16Josué shina nijpimi, paicunaca cashna nircacuna:
–Can tucui imalla nishcataca rurashunllami. Can maiman ri nijpipish rishunllami. 17Moisesta ima shinami tucuipi cazuj carcanchij, chashnallatajmi cantapish cazushun. Mandaj Diosca Moiseshuan cashca shinallataj, canhuanpish cachunmi munanchij. 18Can imalla mandashcacunata maijanpish mana cazushpa mana rurajtaca, huañuchishca cachun. Chaimanta canca imapipish ama manchashpa, c'ari c'ari cailla– nircacunami.
Currently Selected:
JOSUÉ 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.