JUAN 9
9
Mana ricuj huacharishca runata Jesús alliyachishcami
1Jesús chaimanta rishpaca, mana ricuj huacharishca shuj runatami ricurca. 2Paipaj yachacujcunaca:
–Yachachij, cai runa chashna huacharichunca ¿paillatajchu, mana cashpaca paipaj yaya mamachu juchallishca canga?– nircacunami.
3Shina nijpi Jesusca:
–Paipish, paipaj yaya mamapish mana juchallircachu. Ashtahuanpish Taita Diosca pai rurai tucushca cai runapi ricurichunmi chashnaca huacharirca. 4Ñucata cachaj Yaya imallata rurai nishcataca punllaraj cajpimi, rurana cani. Ña tutayajpica pi mana imata rurai tucunchu. 5Ñuca cai pachapi cashparajca, cai pachapi causajcunata achijyachij luzmi cani– nircami.
6Chashna nishpaca, allpata ch'ucahuan chapushpami mana ricujpaj ñahuita llihuishpa, 7cashna nirca:
–Ri, Siloé tanque yacupi maillarigri– nircami. Siloé shimica: “Cachashca” nisha ninmi.
Pai maillarigrishpaca, ricucujmi tigrarca. 8Alliyashcata ricushpami c'uchullapi causajcunapish, mana ricuj cashcata ñaupaman ricujcunapish:
–Caica ¿manachu caridadta mañashpa tiyacuj runa?– nircacuna.
9Shujcunaca: “Paitajmari” nircacunami. Cutin caishujcunaca: “Paitajmari yuyachin” nircacunami. Chaimi paica: “Ñucatajmari cani” nijpi,
10–¿Ima shinataj cambaj ñahuica ricucuj tucurcari?– nircacuna.
11Chaimi paica:
–Jesús shuti runamari allpata ch'ucahuan chapushpa, ñuca ñahuipi llihuishpaca: “Ri, Siloé tanque yacupi maillarigri” nijpi, rishpa maillarishpaca, ñapish ricurcanillami– nircami.
12Shina nijpica:
–¿Maipitaj chai runaca?– nijpi chai runaca:
–Imatajshiyari. Mana yachanichu– nirca.
Ñahuita alliyachishca runata fariseocuna tapushcami
13Mana ricuj cashca runataca, fariseocunapajmanmi pusharcacuna. 14Ch'ucahuan allpata chapushpa ñahuipi llihuishpa Jesús alliyachi punllaca, samana punllami carca. 15Chaimantami fariseocunapish ima shina ñahui ricuj tucushcata tapurcacuna. Chaimi paica:
–Allpata ch'ucahuan chapushpa ñuca ñahuipi llihuijpi maillarigrishpaca ñapish ricurcanillami– nijpimi,
16maijan fariseocunaca:
–Samana punllata mana huaquichij runaca, maitataj Taita Dios cachashca cangari– nircacuna.
Maijancunaca:
–Chai runaca juchayuj cashpaca ¿ima shinataj pi mana rurai tucuipajtaca rurangari?– nircacunami. Chashnami paicunapurallataj caita chaita yuyashpa ch'ican ch'ican yuyai tucurcacuna. 17Chaimi mana ricuj cashca runataca:
–Cambaj ñahuita alliyachij runataca ¿ima cashcatataj yuyangui?– nishpa cutin tapujpica:
–Ñucaca paitaca Taita Dios huillachijpi huillaj cashcatami yuyani– nirca.
18Ashtahuanpish judiocunaca, chai runa mana ricuj cashcata alliyachishca cashcataca mana crircacunachu. Chaimantami chai runapaj yaya mamata cayashpa, 19cashna tapurcacuna:
–¿Caica ñahui mana ricuj huacharishca nicushca cancunapaj churichu? ¿Ima shinataj cunanca ricuj tucurca?– nircacunami.
20Chaimi paipaj yaya mamaca:
–Caica mana ricuj huacharishca ñucanchij churitajmari. 21Ima shina ricuj tucushcataca mana yachanchijchu. Pi paipaj ñahuita alliyachishcatapish mana yachanchijchu. Paica juilluyujmi, paillatataj tapuichij huillangallami– nircacuna.
22“Judiocunaca ñaupamanmi Jesusca Mesiasmi nishpa maijanpish huillajpica, sinagogamanta llujshichishpa shitashcami canga” nishpa yuyarinacushca carca. Chaita manchashcamantami chai yaya mamaca chashna nircacuna. 23Chaimantami chai yaya mamaca: “Juilluyujmi, paillatataj tapuichij” nircacuna.
24Shina nijpimi mana ricuj cashca runata cutin cayashpaca:
–¡Taita Dios ricucunmi ama llullashpa ñucanchijman huillai! Ñucanchijca chai runataca juchayuj cashcatami yachanchij– nircacuna.
25Chashna nijpica:
–Paica juchayujchu, manachu juchayuj mana yachanichu. Ñucaca mana ricuj cashca cashpapish cunanca ricuj cashcallatami yachani– nircami.
26Shina nijpipish cutinmi:
–¿Imatataj cantaca rurarca? ¿Ima shinataj cambaj ñahuitaca alliyachirca?– nircacuna.
27Chaimi paica:
–Ñataj shina huillani. Manamari uyashcanguichijchu. ¿Ima nishpataj cutin huillachun ninguichij? ¿Cancunapishchu paipaj yachacujcuna tucushun ninguichij?– nirca.
28Chashna nijpica p'iñarishpami cashna nircacuna:
–Canmari paipaj yachacuj cangui. Ñucanchijca, Moisespaj yachacujcunami canchij. 29Ñucanchijca Moiseshuan Taita Dios rimashcatami yachanchij. Ashtahuanpish chai runataca, maimanta cashcatapish mana yachanchijchu– nircacunami.
30Chaimi chai runaca:
–Ñuca ñahuita alliyachijtaca cancunaca maimanta cashcata mana yachajpica chaica mancharinami. 31Taita Diosca juchayujcunataca mana uyaj cashcataca yachanchijmi. Pipish Taita Diosta manchaj, Taita Diospaj munaita rurajllatami uyan. 32Mana ricuj huacharishcata pi alliyachin nijtaca, manataj uyashcanchijchu. 33Taita Dios mana cachashca cashpaca, paica imata mana rurai tucunmanchu– nircami.
34Chashna nijpica:
–Canca juchapimi huacharishcangui. ¿Ñucanchijtachu yachachisha ningui?– nishpaca, caipica ña mana ashtahuan tandanacui tucunguichu nishpami llujshichishpa cacharcacuna.
Taita Diospajta entendinapajca yuyaicuna huichcashcami canguichij nishcami
35Chai runataca sinagogamanta llujshichishpa cachashca cashcata Jesús yachashpami paihuan cutin tupashpaca:
–Canca ¿Taita Diospaj Churitaca cringuichu?– nijpi,
36chai runaca:
–Amito ¿pitaj paica, ñuca paita cringapaj?– nirca.
37Chaimi Jesusca:
–Paitaca ricucunguillatajca, canhuan rimacujca paitajmari– nijpimi,
38–Amito, crinimi– nishpa paipaj ñaupajpi cungurishpa adorarca.
39Chaipimi Jesusca:
–Ñucaca cai pachamanca cai pachapi causajcuna imalla rurashcata ricuchingapajmi shamurcani. Mana ricucujcunataca ricujta rurangapaj, ricucujcunataca mana ricujta rurangapajmi shamurcani– nircami.
40Shina nijpi paihuan caj fariseocunaca:
–Shinashpaca ¿ñucanchijpish mana ricujcunachari canchigari?– nircacunami.
41Chaimi Jesusca:
–Mana ricujcuna cashpaca, jucha illajcunami canguichijman. Ashtahuanpish cunanca: “Ricujcunami canchij” nishcamantaca juchayujcunallatajmi saquiringuichij.
Currently Selected:
JUAN 9: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.