JUAN 18
18
Jesusta prezu japishcami
(Mt 26.47-56; Mr 14.43-50; Lc 22.47-53)
1Jesusca chashna mañashca q'uipaca paipaj yachacujcunandij chaimanta rishpami, Cedrón yacuta ch'imbashpa chaipi tiyaj huertaman paipaj yachacujcunandij yaicurca. 2Tauca cutinmi Jesusca paipaj yachacujcunandij chai huertapi tandanacuj carca. Chaimi Jesusta huañuchichun cuj Judaspish chaitaca rijsirca. 3Chaimi Judasca, curacunata mandajcuna, fariseocunapish cachashca achca soldadocunatapish, Taita Diospaj huasita cuidajcunatapish pushashpa shamurca. Paicunaca linternacunahuan, nina sindicunahuan, macanacunatapish apashcami shamurcacuna. 4Jesusca tucui imalla tucuna cashcata ña yachashcamantami, pairaj c'uchuyashpaca:
–¿Pitataj mashcacunguichij?– nijpi,
5paicunaca:
–Nazaretmanta Jesustami mashcacunchij– nijpi, Jesusca:
–Ñucami cani– nirca.
Paita japichij Judaspish paicunahuanmi carca. 6“Ñucami cani” nijpica, siquiman tigrashpami allajman urmarcacuna. 7Jesusca cutinmi:
–¿Pitataj mashcacunguichij?– nijpi paicunaca:
–Nazaretmanta Jesustami mashcacunchij– nircacuna.
8Chaimi Jesusca:
–Ñami cancunamanca ñucami cani nircani. Ñucata mashcacushpaca, ñucahuan cajcunataca richun saquichij– nirca.
9“Ñuca Yaya ñucaman cushcacunataca, shujllatapish mana chingachircanichu” nishpa ñaupaman nishca pajtachunmi, chashnaca nirca. 10Shina nicujpi Simón Pedroca, curacunata mandajpajta rurajtami, espadata huaquichinamanta surcushpa, alli lado rinrinta p'itirca. Chai servijca, Malco shutimi carca.
11Chashna rurajpimi Jesusca, Pedrotaca:
–Cambaj espadata huaquichinapi churai. Ñuca Yaya cushca copataca ¿manachari ubyachun ningui?– nirca.
Curacunata mandajpajman Jesusta pushashcami
(Mt 26.57-58; Mr 14.53-54; Lc 22.54)
12Chaipica, achca soldadocunapish, soldadocunata mandajpish, judiocuna cachashcacunapishmi Jesusta japishpa huatarcacuna. 13Ña huatashpaca Jesustaca Anaspajmanrajmi pusharcacuna. Anasca Caifaspaj suedromi carca. Caifasca chai huataca curacunata mandaj curami carca. 14Caifasmi judiocunamanca, cai llajtapi causajcunamantaca, shuj runalla huañunami alli canga nishca carca.
Pedroca Jesusta mana rijsinichu nishcami
(Mt 26.69-70; Mr 14.66-68; Lc 22.55-57)
15Simón Pedroca, shuj yachacujndijmi, Jesusta catishpa rirca. Pedrohuan rij yachacujca, curacunata mandajpaj rijsishcami carca. Chashna cashpami curacunata mandajpaj huasi canllaman Jesusta catishpa yaicurcalla. 16Pedroca huasi canllaman yaicuna pungu huashallapimi saquirirca. Chaipi cajpimi, curacunata mandajpaj rijsishca yachacujca cutin llujshishpa pungupi cuidacuj huarmihuan rimashpa Pedrotaca yaicuchirca. 17Pedro yaicujpica pungupi cuidacuj huarmica:
–¿Manachu canpish chai runapaj yachacuj cangui?– nijpi Pedroca:
–¡Mana chaichu cani!– nirca.
18Servijcunapish, Taita Diospaj huasita cuidajcunapish chiri cajpimi ninata japichishpa, cunushpa shayacurcacuna. Pedropish paicunahuanmi cunushpa shayacurca.
Jesusta Anás tapushcami
(Mt 26.59-66; Mr 14.55-64; Lc 22.66-71)
19Curacunata mandajmi Jesustaca, paipaj yachacujcunamantapish, pai imata yachachicushcamantapish tapurca. 20Chaimi Jesusca:
–Ñucaca cai pachapi causajcunamanca tucuicunapaj ñaupajpimi yachachircani. Sinagogapi, Taita Diospaj huasipi, maipi tucui judiocuna tandanacunpimi punllanta yachachircani. Pacallaca imata mana yachachircanichu. 21¿Ima nishpataj ñucataca tapungui? ñuca yachachishcacunataca uyajcunata tapui. Paicunami ñuca imata nishcataca yachancuna– nircami.
22Jesús chashna nijpica, Taita Diospaj huasita cuidajcunamanta shujmi:
–¿Curacunata mandaj cura tapujpichu chashna cutichingui?– nishpa shujta ch'ajyachirca.
23Chaimi Jesusca:
–Ima mana allita rimashca cajpica, chaita ricuchi. Allillatataj rimashca cajpica ¿imamantataj ñucataca huajtangui?– nirca.
24Chai q'uipami Anasca Jesustaca huatashcallatataj, curacunata mandaj Caifaspajman cacharca.
Pedroca cutinllataj Jesustaca mana rijsinichu nishcami
(Mt 26.71-75; Mr 14.69-72; Lc 22.58-62)
25Chaicamaca Pedroca chaillapitaj cunushpa shayacujpimi:
–Canpish ¿manachu chai runapaj yachacujcunapuramanta cangui?– nishpa tapujpi Pedroca:
–¡Ñucaca mana chaichu cani!– nirca.
26Chashna nishca q'uipaca curacunata mandajpajta rurajcunamanta shujmi cutin Pedrotaca:
–Cantaca ñucaca chai runahuan huertapi cajtamari ricurcani– nirca. Chai runaca rinrinta Pedro p'itishcapaj familiami carca.
27Chaimi Pedroca: Mana ñucachu cashca casha nicujpica ñapish galloca cantarcallami.
Jesusca Pilatopaj ñaupajpi cashcami
(Mt 27.1-2, 11-31; Mr 15.1-20; Lc 23.1-5, 13-25)
28Tutamanta utcatami Jesustaca Caifaspaj huasimanta, Pilato mandashpa tiyana ucuman pushashpa rircacuna. Pascua micuita micunapaj, mana mapayashun nishpami, paicunaca, chai ucumanca mana yaicurcacuna. 29Chaimantami Pilatoca canllaman llujshishpa:
–Cai runataca ¿imata juchachishpataj apamunguichij?– nijpi,
30paicunaca:
–Ima millaita mana ruraj cajpica, cambajmanca mana pushamunchijmanchu carca– nircacuna.
31Chaimi Pilatoca:
–Shinashpaca, cancunallataj paita pushashpa, cancunapaj Mandashcapi nishca shina tapushpa imatapish nichijlla– nirca.
Chashna nijpi judiocunaca:
–Ñucanchijca maijanta huañuchinapaj mandashcatamari mana charinchij– nircacuna.
32Paicuna chashna nishpaca, Jesús ima shina pai huañuna cashcata ñaupaman huillashca pajtachunmi chashna nircacuna.
33Pilatoca pai mandashpa tiyana ucuman cutin yaicushpami, Jesusta cayashpaca:
–¿Canca judiocunata jatun Mandajchu cangui?– nijpi,
34Jesusca:
–¿Canca cambaj yuyaillamantachu chashna ningui, mana cashpaca shujtajcunachu canmanca chashna huillarca?– nirca.
35Chaimi Pilatoca:
–¿Ñucaca judiochari caniyari? Cambaj llajta runacuna, curacunata mandajcunami ñucapajmanca pushamuncuna. ¿Imatataj rurarcanguiyari?– nircami.
36Chaimi Jesusca:
–Ñuca mandaj canaca mana cai pachamantachu. Ñuca mandana cai pachamanta cajpica, judiocunapaj maquipi ama entregachun, ñucapajta rurajcunaca macanacunmanmi. Ñuca mandanaca, mana cai pachamantachu– nirca.
37Chaimi Pilatoca:
–Shinashpaca canca ¿jatun Mandajchu cangui?– nijpi, Jesusca:
–Canllatajmari ñucataca jatun Mandaj ningui. Ñucaca chaipajllatajmi cai pachaman shamushpa huacharircani. Mana llullata huillangapajmi shamurcani. Ñuca huillashcataca mana llullapaj cajcunallami uyancuna– nirca.
38Chaimi Pilatoca:
–¿Mana llullaca imatagari?– nirca.
Jesusta chashna tapushca q'uipami, Pilatoca canllaman cutin llujshishpa judiocunataca cashna nirca:
–Ñucaca cai runapica imamanta jatunta llaquichinataca mana japinichu. 39Shina cajpipish cancunaca, Pascuapica prezumanta shujta cacharichun nijcunami canguichij. Cunanca ¿judiocunapaj jatun Mandajtachu cacharichun ninguichij?– nircami.
40Chashna nijpica:
–¡Jesustaca mana cacharichun ninchijchu! ¡Barrabastami cacharichun ninchij!– nishpami tucuicuna caparircacuna. (Barrabasca shuhuami carca).
Currently Selected:
JUAN 18: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.