YouVersion Logo
Search Icon

JUAN 10

10
Corralmanta yuyachishpa Jesús parlashcami
1Maijanpish ovejacunapaj corralman punguta mana yaicushpa, shujtajta yaicujca shuhuami, chapashpa huañuchijmi. Chaica chashnatajmi. 2Ashtahuanpish ovejacunata michijca pungutami yaicun. 3Chai michijmanmi punguta cuidajca, punguta pascashpa ricuchin. Ovejacunaca michijpaj rimaitami uyan. Michijca paipaj ovejacunataca, shutipi cayashpami llujshichin. 4Paipaj ovejacunata canllaman tucuicunata llujshichishpaca, paicunata ñaupashpami rin. Ovejacunaca michijpaj rimaita rijsishcamantami paita catinllacuna. 5Mana rijsishcataca mana catincunachu. Mana rijsishcacunapaj rimaitaca mana rijsishcamanta manchashpa maitapish rinllacunami– nircami. 6Cai shina parlota Jesús ch'imbapurashpa parlajpica, fariseocunaca imata nisha nishcata mana entendircacunachu.
Jesusca alli michijmi cani nishcami
7Jesusca entendichingapajmi cutin cashna parlarca:
–Ñucaca ovejacunapaj pungumi cani. Chaica chashnatajmi. 8Ñucapaj ñaupa shamujcunaca tucuicunami shuhuacuna, chapashpa huañuchijcuna carca. Paicunataca ovejacunaca mana uyarcacunachu. 9Ñucaca pungumi cani: Maijanpish ñucamanta yaicujca quishpichishcami canga. Paica yaicui tucunmi, llujshi tucunmi, micunatapish charingami. 10Shuhuaca, shuhuangapaj, huañuchingapaj, tucuchingapajllami shamun. Ñucaca causaita charichun, yallitaj charichunmi shamurcani.
11Ñucaca alli michijmi cani. Alli michij cashcamanta ñuca ovejacunamantaca huañushami. 12Cullqui raiculla michijca, ovejacuna mana paipaj cajpimi, atuj shamujta ricushpa shitashpa rinlla. Shuj ovejata atuj japijpica, caishujcunaca caita chaitami rin. 13Cullqui raiculla michicushcamantaca ovejacuna imapish tucuchun saquishpa rinllami.
14Ñucaca alli michijmi cani. Ñuca ovejacunataca rijsinimi, paicunapish ñucataca rijsinmi. 15Ima shinami ñuca Yaya ñucata rijsin, shinallatajmi ñucapish ñuca Yayataca rijsini. Ñuca ovejacunamantaca ñuca causaitami cuni. 16Mana cai corralpi caj shujtaj ovejacunatapish charinimi. Paicunatapish pushamunami cani. Paicunapish ñuca rimaitami uyangacuna. Shuj canllallami tucunga, shuj michijllami tiyanga. 17Ñucallataj huañuchijcunaman entregarishpa huañushpa cutin causarina cajpimi, ñuca Yayaca ñucataca c'uyan. 18Pi mana ñucataca huañuchi tucunchu, ashtahuanpish ñuca huañusha nijpimi huañuchingacuna. Ñucallataj huañui tucunimi, ñucallataj causari tucunimi. Chashna tucuchunmi ñucataca ñuca Yayaca mandarca nircami.
19Chaita uyashpami judiocunaca cutinllataj paicunapura caita chaita yuyashpa ch'ican ch'ican yuyai tucushpa rimanacurcacuna. 20Paicunapuramanta achcacunami:
–Paica supai japishca, juillu illajmari. ¿Ima nishpataj paitaca uyacunguichij?– nircacuna.
21Shina nijpipish maijancunaca:
–Chai shimicunataca supai japishca cashpaca mana rimai tucunmanchu. Supaica mana ricujcunapaj ñahuitaca ¿ima shinataj alliyachi tucungari?– nircacuna.
Judiocuna Jesusta mana ricunachishcami
22Jerusalenpica, Taita Diospaj huasita Taita Diosman mingashcata yuyarishpami fiestata ruracurcacuna. Chai punllacunaca tamya punllacunami carca. 23Taita Diospaj huasipimi Jesusca, Salomonpaj cashca corredorpi puricurca. 24Chaipimi judiocuna muyujta shayarishpa Jesustaca:
–¿Maicamataj ñucanchijtaca muspachicunguilla? Canllataj Cristo cashpaca, alli huillaiyari– nircacuna.
25Chaimi Jesusca:
–Ñami cancunamanca huillarcani. Mana cringuichijca. Ñuca Yaya rurai nishcacunata ñuca rurashcacunallatajmi ñuca pi cashcataca huillacun. 26Ashtahuanpish ña nishca shinallataj mana ñuca ovejacuna cashpami, cancunaca mana cringuichij. 27Ñuca ovejacunaca ñuca rimaitaca rijsinmi. Ñucapish paicunataca rijsinimi. Paicunaca ñucata catinllacunami. 28Ñucaca paicunamanca huiñai causaitami cuni, manataj chingaringacunachu. Ñuca maquimantaca, pi mana quichungachu. 29Paicunata ñucaman cuj ñuca Yayaca tucuita rurai tucujmi. Ñuca Yayapaj maquimantaca, pi mana quichui tucunchu. 30Ñuca Yayapish, ñucapish shujllami canchij– nijpimi,
31judiocunaca Jesusta huañuchishun nishpa cutin rumicunata japircacuna. 32Chashna shitashun nijpimi Jesusca:
–Ñuca Yaya mandajpi cancunapaj ñaupajpica cai tucui allicunatami rurarcani ¿maijan chaicunamantataj rumihuan shitashun ninguichij?– nirca.
33Chaimi judiocunaca:
–Allita rurashcacunamantaca mana rumicunahuan shitashun ninchijchu. Ashtahuanpish runa cashca jahua, Taita Dios tucushpa, Taita Diosta p'iñachishcamantami rumicunahuan shitashun ninchij– nircacuna.
34Shina nijpi Jesusca:
–Cancunata Mandashcapica: “Ñucaca cancunataca dioscunami canguichij” nishpami Taita Diosca quillcachishca. 35Maijancunapajman Taita Diospaj Shimi shamushca cajpica, chaicunataca dioscunami canguichij nishpaca, pai Quillcachishcataca maita mana p'aquipajmari. 36Ashtahuanpish cancunaca: Ñuca Yaya pai munashcata rurachun ch'icanchishpa cai pachaman cachashca cajtaca ¿maitataj Taita Diosta c'amijmi ninguichigari? Ñucaca pai cachashca cashpamari “Taita Diospaj Churimi cani” nircami. 37Ñuca Yaya rurashca shina mana rurajpica, ñucataca ama crichijchu. 38Ñuca Yaya rurashca shinallatajmi ruracuni. Chashna cajpica ¿ima nishpataj mana cringuichij? ñucata mana crishpapish, chai ñuca rurashcacunata ricushpallapish crichigari. Chashna crishpami Yayaca ñucahuan, ñucaca Yayahuan shujlla cashcataca yachanguichij– nircami.
39Chaimi cutinllataj ima shinapish paita japinata yuyarishpa japigrijpica, paicunapaj maquimanta llushpirishpa rircalla.
40Chaimanta rishpaca Jordán yacu ch'imbanijpi, ñaupaman Juan bautizacushcamanmi Jesusca tigrashpa rirca. Chaipimi saquirirca. 41Chaipi cajpi achcacuna paipajman rishpaca:
–Juanca ima milagrota mana rurashca cashpapish cai runamanta tucui pai huillashcaca, mana llullachu cashca– nircacunami.
42Chashna nishpaca achcacunami chaipica Jesusta crircacuna.

Currently Selected:

JUAN 10: QCHI04

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy