ISAÍAS 1
1
Yallitaj juchayuj llajtata llaquichinata huillachishcami
1Judapish Jerusalenpish imalla tucunata Amozpaj churi Isaías muscuipi shina ricushcami. Uzías, Jotam, Acaz, Ezequías shuti jatun mandajcuna Judá llajtata mandacui punllacunapimi chashna muscurca.
2Chaimi paica uyaiyari jahua pacha.
Uyaiyari cai pacha.
Mandaj Diosca cashnami nin:
“Cai huahuacunataca huiñachircanimi.
Jatunyachircanimi. Ashtahuanpish paicunaca ñucata p'iñashpami c'ariyancuna.
3Huagrapish paipaj dueñota rijsinmi, burropish paipaj dueño rurashca corralta rijsinmi.
Ashtahuanpish israelcunaca ñucapaj cashcataca mana entendincunachu.
Ñuca agllashca israelcunaca ñuca paicunapaj dueño cashcataca mana rijsincunachu” ninmi.
4¡Aij, juchasapa gentecunalla.
Yallitaj millaita aparishcacunalla.
Millaicunapaj huahua huahuacuna.
Yallitaj millaita rurana yuyailla cajcuna!
Mandaj Diostamari saquircacuna.
Huashamanmari tigrarishcacuna.
Israelpaj jucha illaj Diostamari jatunta p'iñachishcanguichij.
5¿Ima nishpataj ashtahuan llaquichishca cashun ninguichij? ¿Ashtahuan c'ariyashpachu caticushunlla ninguichij?
Umacamamari chugri canguichij.
Shungupish nanaihuan chaupiricujmari canguichij.
6Chaqui plantamanta umacama maipi mana sanochu.
Ashtahuanpish chugri, p'unguishca, carachayashpa ismucunguichijmi.
Pi mana jambishca, pi mana pilluchishpa huatashca, aceitehuan churashpa pi mana nuyuchishcami canguichij.
7Cancunapaj allpapish tucuchishca ima illajmari saquirishca.
Pueblocunapish ninahuan rupachishcamari.
Cancunapaj allpapi p'ucushcacunatapish caru llajtamanta cajcunamari micushcacuna.
Cancunapaj ñaupajllapitajmi micushcacuna.
Mana rijsishcacunamari shitashca pambata saquishcacuna.
8Sionpaj ushushillamari saquirishca.
Uva chagra chaupipi chuglla shina paillamari saquirishca.
Melón chaupipi chuglla shina paillamari saquirishca.
Chai pueblollamari p'iñajcuna muyunchishca saquirishca.
9Tucuita Mandaj Dios ñucanchijta ashallatapish mana saquishca cajpica, p'ichillatapish mana puchuchishca cajpica, Sodoma pueblo shina illanchijmanmi.
Gomorra pueblo shina mana tiyanchijmanchu.
Mandaj Diosca mana nij tucushpalla cutiringapajca ñucapajman shamuichij nishcami
10Sodoma pueblota mandajcuna Mandaj Dios rimashcata uyaichigari.
Gomorra pueblo, ñucanchij Taita Diospaj mandashcata uyaichigari.
11Mandaj Diosca cashnami nin: “Cancuna ñucaman cushpa rupachishca achcacunaca ñucapajca ¿imapajtaj valishcari?
Carnerocunata cushpa tucui rupachishcacunatapish, huirayashca animalcunapaj huirata cushpa rupachishcatapish ñamari amini.
Huagracunapaj yahuartapish ña mana ninichu.
Ovejacunapaj yahuartapish ña mana ninichu.
Chivocunapaj yahuartapish ña mana ninichu.
12Chaicunata ñucaman cungapaj shamushpa ñuca huasi canllacunata yangata rurashpa saruchunca ¿pi mañajpitaj shamurcanguichij?
13Cancunaca ñucaman cuna cashcataca yangallamari apamunguichij.
Inciensota rupachishcapish ñucapajca millananami.
Mushuj lunapi, samana punllapi tandanacuita cancuna rurashcaca ñucapajca millanayajmi.
Cancunapaj jatun fiestacunapish millaita ruranapajllami.
14Cancunapaj mushuj luna punllacunapi tandanacuicunapish, cancunapaj jatun fiestacunapish ñucataca yallitajmi p'iñachin.
Chaicunaca ñucataca yallitajmi llashan.
Chai tandanacuicunataca shaicunimi ña mana ahuantanichu.
15Cancunapaj maquicunaca yahuarhuan jundamari.
Chashna cashca cashpa ñucaman maquicunata chutajpipish ñuca ñahuitaca shujmanmi churani.
Cancuna achcata mañacujpipish, manataj uyanichu.
16Maillarichij, chuyayaichij.
Ñuca ñaupajpi cancuna millaita rurashcata anchuchichij.
Millaita ruranata saquichij.
17Allita ruranata yachaichij.
Cashcata ruranata mashcaichij.
Llaquichishpa quichushcacunata tigrachichichij.
Yaya mama illaj huahuacunata llaquichicujpi mitsaichij.
Viuda huarmicunata pi llaquichicujpi mitsaichij.
18Tucui caicunata ch'imbapura parlanacungapaj shamuichij ninmi Mandaj Diosca.
Cancunapaj juchacuna amsa puca cajpipish, rasu shina yurajllata yurajyachishcami canga.
Cancunapaj juchacuna pucanicuj cashpapish, yurajlla millmata shina rurashcami canga.
19Ñuca nishcacunata cazunata munashcamanta cazushpaca, allpapi p'ucushcacunamantaca tucuimanta yalli alli p'ucushcatani micunguichij.
20Ñuca nishcacunata mana munashpa mana cazushpaca, espadahuan tucuchishcami canguichij” ninmi Mandaj Diosca.
Mandaj Diosca Jerusalenta llaquichishpa paipajlla cachun quishpichishcami
21Imatapish chaitataj pajtachij pueblolla, cunanca huainayaj huarmi canamanmari tigrarishcangui.
Canpica cashcata rurajcunami junda carca.
Canpica allita rurajcunallami causarca.
Ashtahuanpish cunanca huañuchijcunallami causacuncuna.
22Cambaj cullquipish fierro ñucumanmi tigrashca.
Cambaj vinopish yacuhuan chagrushcami tucushca.
23Cancunata mandajcunaca c'ariyajcunami tucushca.
Shuhuajcunapurami tucushca.
Tucuicunami camarita japinallata munancuna.
Tucuicunami imata cujcunapuralla tucunata munancuna.
Yaya mama illaj huahuacunata llaquichicujpipish mana mitsancunachu.
Viuda huarmicunata pi llaquichicujpipish paicunaca ricucunllacunami.
24Chaimanta Jatun Diosca, tucuita Mandaj Diosca, israelcunapaj tucuita rurai tucuj Diosca cashnami nin: “Aij, cunantajca ñucata p'iñajcunataca llaquichishpatajmi cushicugrini.
Paicunatapish tigra llaquichishpatajmi alli cagrini.
25Ñuca maquihuanmi cutinllataj llaquichigrini.
Fierro ishpashcata tucui anchuchij shinami p'ichagrini.
Canpi tiyaj mapataca tucuitami anchuchigrini.
26Canpica callaripi shinallataj cashcata ruraj juezcunatami churagrini.
Cunaj yuyajcunatapish ñaupaman caj shinallatatajmi churagrini.
Chashna rurajpica, cantaca cutinllatajmi: Cashcata ruraj llajtami ningacuna.
Chaitataj pajtachij llajtami ningacunami.
27Siontaca paicuna ima shinalla rurashcata ricuchishpami quishpichisha.
Quishpichishcacunaca cashcata rurashpa quishpichishcami cangacuna.
28C'ariyajcunata, juchasapacunataca shuj cutin ñutushcami cangacuna.
Mandaj Diosmanta caruyashcacunataca chingachishcami cangacuna.
29Encina yuracunapi adoranata munashcamanta adorajcunaca pingachishcami canguichij.
Huertapi adoranata munashcamanta adorajcunapish pingachishcami canguichij.
30Cancunaca encina yura p'anga illaj tucuj shinami tucunguichij.
Yacu illajlla huerta shinami tucunguichij.
31C'ari c'aricunaca caspita cuchushca jantsi shinami saquiringa.
Paicuna rurashcacunaca nina chispa shinami canga.
Ishquindij tandallami lunyashpa rupanga.
Chai ninataca, pi mana huañuchi tucungachu” ninmi.
Currently Selected:
ISAÍAS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.