ECLESIASTÉS 1
1
Tucui imapish yangallami nishcamanta
1Davidpaj churi huillajca, Jerusalenpi jatun mandajmi carca. Cai shimicunaca pai huillashca sumaj shimicunami. 2Chai huillajca cashnami nirca: Tucui imapish yangallami, ima cashpapish yangataj yangami. 3Inti achijyachicun pachapi causajcunaca, mana samashpa imatapish rurashcahuanca ima allita mana japincunachu. 4Shujcunaca huacharincuna, shujcunaca huañuncunami. Ashtahuanpish cai pachaca manataj shujtajyanchu. 5Intipish llujshishpaca, cutin huashicugrinllami. Pai llujshimushcallamantaj utca muyushpa tigranllami. 6Huairapish uriman huichiman muyucunllami, pai purinallatataj cutin cutin tigrashpa muyucunllami. 7Tucui jatun yacucunami mama cuchaman chayan. Chashna cajpipish yacuca manataj jundanchu. Yacucunaca llujshimushca ñanllatataj tigrashpa muyucunllami. 8Tucui imapish shaicuchinmi. Tucui chaicunamantaca pipish mana alli huillai tucunchu. Ñahuica ashtahuan ashtahuan ricunachicunllami. Rinrinpish ashtahuan ashtahuan uyanachicunllami. 9Cai pachapica ima mana mushuj tiyanchu. Imami ñaupaman tiyarca, chaillatajmi q'uipatapish tiyanga. Imami ñaupaman rurarishca, chaillatajmi q'uipatapish ruraringa.
10¿Imapish: “Caitajca mushujmari” ningapaj tiyanchu imatagari? Tucui imapish ñucanchij manaraj tiyajpi, mashna huata ñaupaman ña tiyashcallatajmi. 11Ñaupaman ima tiyashcataca cungarishpami saquishcacuna. Q'uipa punllacuna ima tiyajpipish, ashtahuan q'uipata tiyaj shujtajcunaca cungaringallacunami.
Huillajca tucuita alli ricushcamanta
12Huillaj ñucaca, Israel llajtata jatun mandajmi carcani. Jerusalenpimi causarcani. 13Ñucaca cai pachapi causajcuna imallata rurashcatami yachangapaj alli yuyaihuan tucuita callarishpa ricurcani. Cai pachapi causajcunaman Taita Dios cushca ruranacunaca, yallitaj llashaj shinami.
14Tucui chaicunata callarishpa yachashpami, inti achijyachicun pachapi imata rurashcapish yuyaita yanga shaicuchinalla cashcata ricurcani.
15Huishtutaca mana allichi tucuipajchu, ima illashcatapish mana tiyashcahuanca mana yupai tucuipajchu.
16Chashna cajta ricushpami, ñucallataj cashna nirircani: “Ñucaca Jerusalenpi ñuca ñaupa causaj tucui mandajcunata yalli yachaj cashcamantaca, tucuicuna alli nishpa jatunyachishcami cani. Ñucaca achcata yachajtaj, alli yuyaiyujtajmi cani”. 17Ñucaca yachaj canatapish, ch'ahuanyashca canatapish, manapish cana ima yangacunata munaj canamantapishmi tucui yuyaita churashpa, callarishpa yuyaita japircani. Tucui chaita yachanapish, yuyaita yanga shaicuchinalla cashcatami ricurcani. 18Yallitaj yachaj cajpica, imapish ashtahuanmi p'iñachin. Ashtahuan yachashpa catijpica, ashtahuan llaquirinami tiyan.
Currently Selected:
ECLESIASTÉS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.