2 SAMUEL 1
1
Saúl huañushcata David yachaj chayashcami
1Saúl huañushca q'uipaca cashnami tucurca. Davidca amalecitacunahuan macanacushpa mishashpa Siclagman tigrashpaca, ishqui punllacunatami chaipi carca. 2Quimsa punllapica, Saulpaj carpa huasicunamanta shujmi, churanacunapish lliqui lliqui, umapi allpahuan shitarishca chayamurca. Davidpaj ñaupajman c'uchuyashpaca, paita alli nishcata ricuchingapajmi pambaman tupajta cumurirca. 3Davidca paitaca:
–¿Maimantataj shamunguiyari?– nijpi paica:
–Ñucaca israelcunapaj carpa huasicunamantami miticushpa shamuni– nirca.
4Chaimi Davidca:
–¿Imataj tucurcari? Ñucaman huillapayari– nijpi, paica:
–Israelcunami macanacuimanta miticushpa callpancuna. Achca israelcunami huañuncuna, Saulpish paipaj churi Jonatanpish huañunmi– nirca.
5Davidca huillaj mosotaca:
–Saulpish, paipaj churi Jonatanpish huañushcataca ¿ima shinataj yachangui?– nircami.
6Chaimi huillaj mosoca:
–Ñucapish chai punllatajmari Gilboa urcuman rishca carcani. Saulca paipaj lanzahuan taunarishcalla cajta, paita p'iñajcunaca carrocunahuan, caballopi tiyarishcacuna caticujtami ricurcani. 7Saulca tigralla huashaman ricushpaca ñucatami ricurca. Chaimi ñucataca: Caiman shamui nijpi caipimi cani nircani. 8Chaipimi ñucataca: ¿Canca pitaj cangui? nijpi: Ñucaca amalecita runami cani nircani. 9Chashna nijpimi paica ñucataca: Ñucataca yallitaj llaquimari japin. Chashna cashpapish causajrajmari cani. Ñucapajman c'uchuyashpa ñucata huañuchichunmi rogani nirca. 10Shina nijpimi pai ña mana causana cashcata yachashpa huañuchircani. Paipaj umapi churarishca coronatapish, paipaj rigrapi aparishca brazaletetapish surcushpami can ñuca amopajman apamurcani– nircami.
11Chaimi Davidca pai churashca churanata chutashpa lliquirirca. Paihuan caj runacunapish chashnallatajmi rurarcacuna. 12Saulpish paipaj churi Jonatanpish, Mandaj Diospaj gentecunapish, Israelpaj aillucunapish espadapi huañushcamantaca, achcata llaquirishpa huacashpami, chishiyangacama ayunarcacuna. 13Chai q'uipami Davidca huillanaman shamuj mosotaca:
–Canca ¿maimantataj cangui?– nishpa tapujpi paica:
–Ñucaca caru Amalec llajtamanta runapaj churimi cani– nirca.
14Chaimi Davidca:
–Mandaj Dios churashca jatun mandajta cambaj maquihuan huañuchinataca ¿ima nishpataj mana mancharcanguiyari?– nishpa, 15Davidca paipaj runacunapuramanta shujta cayashpaca:
–Ri, chai runata huañuchigri– nijpi pai chugrichijpica huañurcallami. 16–Mandaj Dios churashca jatun mandajta ñucami huañuchircani nishpa cambaj shimillahuantaj huillashcamantaca cambaj yahuarmantaca cambaj jahuallatajmi canga– nircami.
Saulpish Jonatanpish huañujpi David llaquirishpa huacashcami
17Saúl paipaj churi Jonatandij huañushcamantami, Davidca tononchishpa huacarca. 18Judá aillucunapish chashnallataj huacachunmi yachachichun mandarca. Jaser libropica cashnami quillcashca tiyacun:
19“¡Aij, Israelpaj sumaj canaca, cancunapaj jahua urcucunapimari chingarishca!
C'ari c'ari cajcunaca
¡Ima shinataj urmarcari!
20Circuncisionta mana rurashcacunapaj ushushicuna cushicushpa ama tushuchun, filisteocunapaj ushushicunapish ama cushicuchun, Gat pueblopica ama huillanguichijchu.
Ascalón plazacunapipish ama parlanguichijchu.
21Gilboa urcucunalla, c'ari c'ari cajcunapaj escudocunaca chaipimari shitashca saquirishca.
Saulpaj escudopish aceitehuan mana churashcapaj shinamari shitashca saquirishca.
Chaimanta cancunapica, amataj tamyachun, shullallapish amataj urmachun.
Chai allpapica ofrendata cunapajca amataj p'ucuchun.
22Jonatanpaj arcopish, Saulpaj espadapish huañushcacunapaj yahuar illajlla, c'ari c'aricunapaj huira illajllaca mana tigrajchu carca.
Jonatanpaj arcoca manataj huashaman tigrajchu carca.
Saulpaj espadapish chushajllaca manataj tigrajchu carca.
23Saulhuan Jonatanhuanca, alli c'uyanacujmi carca.
Alli apanacujmi carca.
Paicunapaj causaipipish manataj ch'icanyajcunachu carca.
Huañuipipish manataj ch'icanyancunachu.
Aguilacunata yalli callpajcunami carca.
Leoncunata yalli fuerzayujcunami carca.
24Israel huarmicunalla, Saulmantaca huacaichigari.
Paimari cancunamanca amsa puca churanata churachij carca.
Paimari curihuan allichishca sumaj churanata churachij carca.
25¡C'ari c'aricunaca ima shinataj macanacuipica urmarcacunari!
¡Jonatanca cancunapaj urcucunapimari huañushca!
26Ñuca huauqui Jonatanlla, canmantaca llaquihuan huañucunimi.
Ñucataca yallitaj c'uyajmi carcangui.
Cambaj c'uyaica yallitaj mancharinami ñucapajca carca.
Cambaj c'uyaica huarmicunapaj c'uyaitapish yallimi carca.
27¡C'ari c'aricunaca ima shinataj urmarcacunari!
¡Macanacunacunapish ima shinataj chingarircari!” nircami.
Currently Selected:
2 SAMUEL 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.