ABDÍAS 1
1
Edom llactapi causaccuna pingai tucunamanta
1Mandac Diosmi Abdiasman muscuipi shina ricurishpa, Edom llactapi causaccuna ima tucunamanta huillashpaca:
«Mandac Dios ñuca shuc
huillac tucui llactacunaman
cachashpaca:
“¡Edom llactapi causaccunahuan
macanacungapac jatarichic,
tucui jatarishunchic!”
ningui nircani.
2Tucui cai pacha llactamanta
ashtahuan uchilla, tucuipac
piñana llactatami ruhuasha.
3Cambac shungupi jatun tucuna
yuyaillami cantaca pandachirca.
Canca jatun urcu
chaupipimi cangui.
Chaipi causashpami
cambac shungupica:
“¿Pitac caimantaca pambaman
urmachingayari?” yuyangui.
4Anga shina jahuaman vola rishpa,
lucerocuna chaupipi
cuzhata ruhuacpipish,
chaimantami urmachisha.
Chaitaca Mandac Dios ñucami nini.
5Shuhuaccuna tuta cambacman
shamushpaca, ¿manachu apana
pactallata shuhuanga?
Uvasta pallaccuna pallashpapish,
¿manachu chalanata saquinga?
¡Canca llaquinayaitami
tucuchishca cangui!
6¡Esaupac imalla charishcataca
tucui chalashpami aparca!
¡Tucui imapish valishcacunatami
shuhuashpa rirca!
7Canhuan alli apanacuccunallatacmi
cantaca shuctac llacta
linderocunaman apashpa shitarca.
Canhuan sumacta causacllatacmi
cantaca piñachirca.
Canhuan micuccunallatacmi
tucllata churashpa urmachirca.
¡Edom llactapica alli yuyaita
charicca mana tiyanchu!
8Chai punzhapica, ¿manachu
Edom llactapi causac jatun
yachac runacunata chingachisha?
¿Manachu Esaupac urcupi causac
alli yuyaiyuc runata huañuchisha?
9Temán llactalla, cambac sinchi
soldadocunapish chucchungami.
Esaupac urcupi causaccunapish
yallita llaqui tucushpami huañunga.
10Cambac huauqui Jacobota
ñacachishcamantami pingaichishpa,
huiñaita chingachishca cangui.
11Cambac huauquipac soldadocunata
shuctac llactaman prezu apacucpi,
Jerusalén punguta shuhuangapac
yaicucpica canca ricucurcanguimi.
Chai shuhuashcata suerteta
ruhuashpa chaupicucpica, canpish
chai llaquichic
shinami tucurcangui.
12Cambac huauqui llaquihuan
cai punzhapica,
mana cushicunachu carcangui.
Judá llactapi causaccuna
chingaricui punzhapica,
mana asinachu carcangui.
Paicuna jatun llaquita
apacui punzhapica,
mana jatun tucunachu carcangui.
13Pai llaquita apacui punzhapica,
mana ñuca llacta punguta
yaicunachu carcangui.
Pai llaquita apacui punzhapica,
mana ricucunallachu carcangui.
Paita yallita llaquichicui
punzhapica, pai imata
charishcatapish,
mana japinachu carcangui.
14Huañuimanta miticushpa
riccunataca mana quichqui
ñanpi chapashpa,
huañuchinachu carcangui.
Chai jatun llaqui punzhapica,
miticushpa saquirishcacunata
mana llaquichiccunaman
cunachu carcangui.
Israelcuna quipa
punzhacuna ima tucunamanta
15Tucui llactacunata
yallita llaquichina
punzhaca ñami chayamucun.
Ima shinami shuccunata
yallita llaquichircangui,
chashnallatacmi cantapish
llaquichinga.
Chashna llaquichishcamantaca
canpish llaquichishcami
cana cangui.
16Ima shinami, canca ñucapaclla
urcupi jayacta ubiarcangui,
chashnallatacmi shuctac
llactapi causaccunapish,
mana samarishpa jayacta ubiana can.
Shina ubiashpaca mana tiyashca
shinallatacmi tucunga.
17Ashtahuanpish Sión urcupica,
maijan quishpirishcacuna
tiyangaracmi.
Chai urcuca Diospaclla
chicanyachishcami canga.
Jacobopac huahua huahuacunapish
paicunapac allpataca
cutinmi japinga.
18Jacobopac huahua huahuacunaca
nina shinami canga.
Josepac huahua huahuacunaca
rupacuc nina shinami canga.
Esaupac huahua huahuacunaca
ucsha shinami canga.
Shina rupachicpica,
shucllapish mana saquiringachu.
Chaitaca Mandac Dios ñucami
nini» ninmi.
19Neguev llactapi causaccunaca Esaupac huahua huahuacunapac urcucunatami japinga. Sefela pambapi causaccunaca filisteocunapac llactatami japinga. Efraín llactatapish, Samaria llactatapish japingami. Benjaminpac huahuacunaca Galaad llactatami japinga. 20Prezumanta cutimuc Israel soldadocunaca cananeocunapac llactamantaca Sarepta llactacamanmi japinga. Jerusalenmanta prezu rishpa, Sefarad llactapi causaccunaca Neguev pambapi tiyac llactacunatami japinga. 21Esaupac urcupi quishpirishca runacunaca mandangapacmi Sión urcuman huichai ringa. ¡Chashnami mandanaca Mandac Diospaclla canga!
Currently Selected:
ABDÍAS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.