JOSUÉ 24
24
Josué tucuri shimicunata rimashcamanta
1Josueca tucui Israel aillucunata Siquem pueblopi tandachishpami, israelcunata pushac yuyaccunata, juezcunata, quipa mandaccunatapish Diospac ñaupapi tandachirca. 2Chashna tucui israelcuna tandanacucpimi Josueca:
—Israelcunata Mandac Diosca: “Ñaupa huatacunaca cancunapac ñaupa taita Abrahampac Nacorpac taita Tareca jatun yacu chimba ladopimi causarca. Paicunaca shuctac dioscunata servishpami causarca. 3Shina cacpipish, ñucami cancunapac taita Abrahamtaca jatun yacu chimba ladomanta tucui Canaán llactata muyushpa, pai achca huahuacunata charichun Isaac churita curcani. 4Cutin Isaacmanca Jacobo, Esaú churicunatami curcani. Esaumanca Seir llactapi urcucunatami curcani. Ashtahuanpish Jacoboca paipac churicunandimi Egiptoman urai rirca. 5Ñucaca Moisesta, Aaronta cachashpami, Egiptopi causaccunata yallita llaquichishca quipa cancunataca llucchircani. 6Cancunapac taitacunata Egiptomanta llucchimucpimi, cancunaca llucshishpa mama cuchaman chayarcanguichic. Chaiman chayacpimi, Egipto runacunaca cancunapac taitacunataca carretacunahuan, caballocunahuan Puca Cuchaman catimurca. 7Paicuna, Mandac Dios ñucata caparishpa mañacpimi, ñucaca cancunahuan Egipto runacunahuan chaupipi amsa puyuta churarcani. Chashna churashpa, paicunapac jahuapi mama cucha yacuta cachacpimi, paicunataca tucui ucuyachirca. Chashna ruhuashcataca cancunapac ñahuihuantacmi ricurcanguichic. Chai quipaca tauca huatacunatami shitashca pambapi carcanguichic. 8Chaimantaca ñucami Jordán yacu chimba ladopi cac amorreocunapac llactaman yaicuchircani. Amorreocunaca cancunahuan macanacurcami, ashtahuanpish paicunata ñuca cancunapac maquipi churacpimi, paicunapac allpataca cancuna japircanguichic. Shinallatac paicunataca cancunapac ñaupapimi tucuchircani. 9Chai quipaca Ziporpac churi moabitacunata mandac Balacmi cancunata piñashpa jatarirca. Chaimantami Beorpac churi Balaamta cancunata maldiciachun cayachun cacharca. 10Shina cacpipish, Balaam mañashcataca mana uyasha nircanichu. Chaipac randica cancunata bendiciashpami paicunapac maquimanta quishpichircani. 11Chai quipaca Jordán yacuta pasashpami Jericó puebloman chayamurcanguichic. Chaipimi Jericó pueblopi causaccunaca cancunahuan macanacungapac shayarirca. Shinallatac amorreocunapish, ferezeocunapish, cananeocunapish, heteocunapish, gergeseocunapish, heveocunapish, jebuseocunapish macanacungapac shayarircami. Paicunatapish ñucaca cancunapac maquipimi churarcani. 12Amorreocunata ishcai jatun mandaccunataca mana cancunapac espadahuan, flechahuanchu llucchishpa cacharcanguichic. Ashtahuanpish ñuca avispacunata cachacpimi, paicunaca cancunapac ñaupamanta rircacuna. 13Shinami cancuna mana tarpushca allpata, cancuna mana shayachishca pueblocunata curcani. Chai pueblocunapimi causanguichic. Cancuna mana tarpushca uvas chagrata, olivos chagratami micunguichic” ninmi— nirca.
14Shinallatac Josueca: «Cancunaca Mandac Diosta manchaichic, ima mana allitapish ama ruhuanguichicchu. Tucui munaihuan paita servishpa causanguichic. Cancunapac chaupimanta, cancunapac ñaupa taitacuna jatun yacu chimba ladopi causashpa servishca dioscunata, Egiptopi causashpa servishca dioscunata anchuchinguichic. Shina anchuchishpami, Mandac Diosta servishpa causana canguichic. 15Mandac Diosta servina mana alli cacpica, maijan diosta servingapac acllaichiclla. Cancunapac ñaupa taitacuna jatun yacu chimba ladopi causashpa servishca dioscunata, mana cashpaca cunan cancuna causacuc llactapi causac amorreocuna servishca dioscunata servichiclla. Shina cacpipish, ñuca familiahuanca Mandac Diostami servishpa causasha» nirca.
16Shina nicpimi israelcunaca:
—¡Mandac Diosta saquishpa, shuc dioscunata servishpa causachunca Dios ama munachun! 17Ñucanchicta Mandac Diosmi ñucanchictapish, ñucanchic taitacunatapish Egipto llactapi huatashca shina servishpa causacucpi llucchimurca. Chashnami jatun ricuchinacunata ñucanchic ricuipi ruhuashpa llucchimurca. Paimi ñucanchictaca tucui ñancunata tucui llactacunapac chaupita pasacpipish cuidarca. 18Mandac Diosmi ñucanchic ñaupamanta mai llactapi causaccunatapish, chai llactapi causac amorreocunatapish llucchishpa cacharca. Chaimanta ñucanchicpish, Mandac Diostami servishun, paica ñucanchic Diosmi— nircacuna.
19Shina nicpimi, Josueca israelcunataca:
—Cancunaca Mandac Diosta mana servi pudinguichicchu. Paica jucha illac Diosmi, paipaclla causachun munac Diosmi. Cancuna paita mana cazushpa causacucta, cancuna juchata ruhuashpa causacuctaca mana ricucungallachu. 20Cancuna Mandac Diosta saquishpa, shuctac dioscunata servishpa causacpica, piñarishpa cancunamanta anchurishpa llaquichishpami tucuchinga. Cancunaman allita ruhuashca cashpapish tucuchingami— nirca.
21Shina nicpimi, israelcunaca Josuetaca:
—¡Mana, can nishca shinaca mana cangachu, ashtahuanpish Mandac Diostami servishun!— nirca.
22Shina nicpimi, Josueca israelcunataca:
—Mandac Diosta servinataca cancunallatacmi acllarcanguichic. Chaita mana pactachishpa, llaqui tucunatapish cancunallatacmi yachanguichic— nirca.
Shina nicpimi israelcunaca:
—¡Ari, ñucanchicllatac yachanchicmi!— nircacuna.
23Shina nicpimi Josueca:
—Shina cashpaca cunanca, cancunapac chaupimanta shuctac dioscunata anchuchishpa, israelcunata Mandac Diosllata tucui shunguhuan manchashpa causaichic— nirca.
24Shina nicpimi, israelcunaca Josuetaca:
—Ñucanchicta Mandac Diostami servishun, pai ima nishcatami cazushun— nirca.
25Shina nicpica, Josueca chai punzhallatami israelcunahuan pactachingapac shuc ari ninacuita ruhuarca. Shinallatac mandashcacunata pactachichun cushca rimashcacunatapish Siquem pueblopi curca. 26Josueca cai rimashcacunatami Dios mandashcata quillcana libropi quillcarca. Chai quipaca jatun rumita japishpami, Mandac Diospac carpa ladopi tiyac encina yura ucupi shayachirca. 27Chai quipaca tucui israelcunatami Josueca:
—Riquichic, ñucanchic mana allita ruhuashcataca cai rumimi ricuchinga. Cai rumimi Mandac Dios ñucanchicta tucui mandashcataca uyarca. Mandac Diosta cungarishpa ama saquinguichicchu. Cai rumica cancunata llaquichina cashcata ricuchicmi— nirca.
28Chai quipaca tucui israelcunatami cada paicunapac llactacunaman cacharca.
Josué huañushcamanta
(Jue 2.6-10)
29Chashna tucushca quipaca Mandac Diosta servic Nunpac churi Josueca huañurcami. Paica patsac chunga huatayuc cashpami huañurca. 30Josuetaca Efraín urcupi Timnat-sera allpapimi enterrarca. Chai allpaca Gaas urcumantaca jahua ladomanmi carca.
31Israelcunaca Josué causacuc tucui huatacunami Mandac Diosta servishpa causarca. Shinallatac Josué huañushca quipapish israelcunata pushac yuyaccunapac tucui causaipimi Diosta servishpa causarca. Israelcunaca Mandac Dios tucui paicunaman imata ruhuashcatami yacharca.
Josepac tullucunata Siquem pueblopi enterrashcamanta
32Israelcuna Egiptomanta apamushca Josepac tullucunataca Siquem pueblopimi enterrarca. Chai allpataca Jacobomi Siquempac taita Hamorman patsac cullquipi randishca carca. Chai allpatami Josepac churicunaca japirca.
Eleazar cura huañushcamanta
33Shinallatac Aaronpac churi Eleazar curapish huañurcami. Paitaca paipac churi Fineespac allpa lomapimi enterrarca. Chai allpaca Efraín urcupimi carca.
Currently Selected:
JOSUÉ 24: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.