JOB 9
9
Job imata mana ni pudishcamanta
1Shina nicpimi Jobca:
2«Ari, chashnatacmi.
Chaitaca ñucallatac yachanimi.
¿Ima shinatac runaca Diospac
ñaupapica cashcata ruhuacmi
cani ningayari?
3Dios-huan rimanacushpaca
huaranga shimicunamanta
shucllatapish mana
cutichi pudingachu.
4Paipac shungupica tucuita
yachanmi.
Tucui imatapish ruhuacmi.
¿Pitac paita mana cazushpaca
alli llucshingayari?
5Pai yallita piñarishpaca
urcucunatapish cuyuchinmi,
maipi cashcamanta
tuñishpa shitanmi,
chaitaca pipish mana yachanchu.
6Paimi allpatapish maipi
cashca pushtumanta cuyuchin.
Allpata charicuc pilarcunatapish
Paimi chucchuchin.
7Intita ama llucshichun nicpica,
mana llucshinchu.
Lucerocunapish sellashca shinami
mana achicyachin.
8Paillami jahua pachatapish
telata chutac shina churarca.
Paica caiman chaiman cuyucuc
mama cucha jahuatami purin.
9Paimi Osa, Orión, Pléyades
shuti lucerocunatapish,
ura ladoman cac
lucerocunatapish ruhuarca.
10Paimi pipish mana yachai pudipac
mancharinacunata,
mana yupaipac sumaimanacunata ruhuan.
11Pai ñuca ñaupata pasacucpipish
paitaca mana ricunichu.
Caruta ricpipish
mana yachai pudinichu.
12Pai imata quichucpipish,
¿Pitac cutin chasqui pudingayari?
Pitac: “¿Imatatac ruhuangui?”
ningayari.
13Diosca yallita piñarishcataca
mana cungaringachu.
Jatun tucushcacunata ayudaccunapish,
paipac chaqui ucupimi cumurincuna.
14¿Ñucaca imatatac
cutichishpa rimashayari?
¿Ima shimicunahuantac pihuan
parlai pudishayari?
15Ñucaca cashcata ruhuac cashpapish,
imata mana cutichi pudinichu.
Chaipac randica ñucapac juez
cashcamantami, ñucata
llaquiyari niman.
16Ñuca mañashcata pai uyacpipish,
chai mañashcata pai uyashcataca
mana crimanchu.
17Paica yallita huaira tamyahuanmi
llaquichirca.
Ñuca mana faltayuc cacpipish,
ñuca chugritaca
ashtahuan anchayachirca.
18Ñucataca samaita aisachunllapish
mana saquinchu.
Chaipac randica jatun
llaquicunahuanmi llaquichin.
19Sinchimanta rimashpaca,
¡Paica tucui imatapish
ruhuai pudinmi!
Ñucata taripangapac apacpica,
¿Pitac ñucapac randi
shayaringayari?
20Ñuca cashcata ruhuacmi
cani nicpipish, ñuca shimillatacmi
llaquipi churanga.
Ñuca: “mana juchayucchu cani”
nicucpipish, paica
juchanchingallatacmi.
21Ñuca mana juchayuc cashpapish
mana yuyarinmanchu.
¡Ñucaca mana ashtahuan
causasha ninichu!
22Ñucaca: “Paica mana
juchayuctapish, mana
manchactapish tucuchinllami.
23Shuc azotillami huañuchin.
Jatun llaquihuan
gentecuna huañucushpa,
mancharicucpica paica asinmi.
24Cai pachataca paita mana
manchaccunapac maquipimi churashca.
Paica juezcunapac
ñahuitapish tapanmi.
Mana pai ruhuacpica,
¿pitac ruhuangayari?
25Ñuca causaica callpac
runacunatapish ashtahuan
yallimi callpashpa rin.
Ima allitapish mana
ricushpami callpashca.
26Callpac barco shinami rishca.
Anga aichata micungapac
ric shinami callpashca” nini.
27Ñucaca: “Nanaihuan
aij ninata saquishpa,
cushilla ñahuimi tucusha” nini.
28Shina cacpipish,
nanaicunaca manchachinmi.
Ñucataca ima allita mana ruhuac
cashcata yuyac cashcatami yuyani.
29Ñucaca Diosta mana
cazuc nishcami cani.
¿Imapactac yanga
imatapish ruhuashayari?
30Jabonhuan jahuarishca cacpipish,
maquita lejía yacuhuan
jahuashca cacpipish,
31ñucataca jutcupimi shitangui.
Churanacunapish ñuca aichataca
millanayachingami.
32Diosca mana ñuca shina runachu.
Paihuanca mana juezpacman rishpa,
ñahuinchinacui pudinichu.
33Ñucanchic ishcaipac jahuapi
maquita churashpa,
allichic juezca mana pi tiyanchu.
34Paipac manchai ñucata
ama manchachichun paipac
varata ñuca jahuamanta
anchuchishpachari alli canman.
35Shina cashpapish, imata
mana manchashpa rimashallami.
Ima mana allitapish
mana ruhuashcanichu.
Currently Selected:
JOB 9: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.