JOB 4
4
Jobta Elifaz rimashcamanta
1Chashna nicucpimi, temanitapuramanta Elifazca:
2«Maijan imata rimaricpica,
mana upalla saquiringuimanchu.
Ashtahuanpish ¿pitac upalla
saquiringayari?
3Canca achcacunatami
yachachic carcangui.
Ima ruhuanata mana pudictaca
sinchiyachicmi carcangui.
4Pandaric runatapish
sumacta rimashpami allichic carcangui.
Changa mucucuna quihuiricucpipish,
sinchiyachicmi carcangui.
5Cunan canta llaqui japicpica,
yallitami llaquiringui,
yallitami nanaringui.
6¿Manachu canca Diosta manchashpa,
causac carcangui?
¿Manachu canca imatapish
cashcata ruhuashpa,
causac carcangui?
7Cunanca alli yuyariyari.
¿Mana faltayuc runa huañushcachu?
Cashcata ruhuac runacunataca,
¿maipitac tucuchishca?
8Mana allita tarpuccunaca
mana allillatatac cosechactami
ricushcani.
9Diospac samaillahuanmi huañuncuna.
Pai yallita piñarishpa,
pucucllapimi tucurincuna.
10Piñarishpa huacac leonpac,
huahua leonpac quirucunapish paquirishcami.
11Leonca micuna aicha
illacpica huañunmi.
Micuna illacpica,
mama leonpac huahuacunapish,
caita chaitami rincuna.
12Pacallami ñucamanca huillarca.
Ñucaca paicuna rimanacushcallatami
uyarcani.
13Tuta ima yuyaicunapish
yallita shamucpi,
tuta runacuna yallita
sueñunayachishpa sueñucucpi,
shinami uyarcani.
14Ñucataca manchai, chucchuimi japirca,
tucui ñuca tullucunacamanmi cuyurirca.
15Ñuca ñaupata huaira shina
alma pasacpimi, ñuca cuerpo
millmacunapish shayarirca.
16Ñuca ñaupapimi almaca shayarirca.
Paipac ñahuitaca mana ricurcanichu.
Ñuca ñaupapi upalla shayarishpaca:
17“¿Runaca Diosta atishpa
cashcata ruhuacchu canga?
¿Runaca paita ruhuac Diostapish
yalli ima mapa illacchu canga?
18Diosca paita serviccunapipish,
mana shunguta churanchu.
Paipac angelcunapipish,
mana alli tiyashcatami ricun.
19Ñuto allpa jahuapi
allpamanta huasichishca shina,
runacunatacarin,
¡maitatac alli ningayari!
¡Paicunaca polilla micucpi
tucurinallami cancuna!
20Paicunaca tutamanta
alli cashpapish,
chishipacca tucurincunallami.
Chashna cashcamantami
pipish mana yuyarishca
huiñaita tucuringalla.
21Paicuna sumac cashcapish,
paicunallahuantacmi chingarin.
Yachaitapish mana yachashpami
huañun” nictami uyarcani» nirca.
Currently Selected:
JOB 4: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.