JOB 35
35
Eliú Jobta rimashpa catishcamanta
1Eliú ashtahuan rimashpaca:
2«Can: “ñucaca Diostapish yalli
cashcata ruhuacmi cani” nishpaca,
¿allitami nicuni yuyanguichu?
3Ashtahuanpish canca:
“¿Ñuca mana juchallishpaca imatatac
japishayari?” nircanguimi.
4Chaimantami cantapish,
cambac ricsishcacunatapish
ñucaca caita nisha nini:
5Jahua pachata huichailla ricushpa,
chaipi tiyac puyuta allita ricuiyari.
Chaicunaca cantapish
yalli jahuamanmi tiyacun.
6Can juchallishpaca,
¿imatatac Diostaca ruhuanguiyari?
Can yallita mana cazushpaca,
¿paitaca imatatac ruhuai pudingui?
7Cashcata ruhuac cashpapish,
¿imatatac paimanca cunguiyari?
¿Paica imatatac cambac maquimantaca
japingayari?
8Cambac juchacunaca
can shina runatami llaquichinga.
Cashcata can ruhuashcaca
can shina runapacmi alli canga.
9Runacunallatac huatashca shina
charicucpimi caparincuna.
Sinchi runacuna llaquichicpimi,
caparishpa huacancuna.
10Ashtahuanpish paicunaca:
“¿Ñucata ruhuac Diosca
maipitacyari?
Paica tutapish cantachunmi cushichirca.
11Ñucanchictaca cai pachapi
tiyac animalcunata ricuchishpa
ashtahuan alli yachacta,
jahuata volac animalcunatapish
ricuchishpa yalli yuyaita
charictami ruhuarca”
nicca, shucllapish mana tiyanchu.
12Paicuna jatun tucushpa
millaita ruhuashcamantami
paicuna caparishpa mañacpipish
Diosca mana uyan.
13Yanga rimashcacunataca
Diosca mana uyanchu.
Tucui poderta charic Diosca
ricunallatapish mana ricunchu.
14Can Paita mana
cazunichu nicucpipish,
¡can imata ruhuashcacunaca
paipac ñaupapimi!
¡Paitaca shuyailla!
15Ashtahuanpish canca Diosca
manarac piñarinchu,
manarac llaquichinchu.
Paita mana cazushcataca
manarac ricuchinchu ninguimi.
16Chaimantami canca yangamanta
imatapish rimaricungui.
Ima nicushcatapish
mana entendishpami
yallita rimaricunguilla» nirca.
Currently Selected:
JOB 35: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.