JOB 27
27
Jobca millaicunataca llaquichingami nishcamanta
1Job rimashpa catishpaca:
2«Ñuca japina cashcata
quichuc Diosca causacunmi.
Ñuca almata llaquichic
tucuita ruhuac Diosca ricucunmi.
3¡Ñucapi causaita cuc samaipish,
Diospac samaipish tiyashcacamanca,
4ñuca shimica mana ima millaita
rimangachu!
¡Ñuca callupish mana llullangachu!
5Cancunataca allitami nicunguichic
ninaca ama chayashca cachun.
Huañungacamanmi ima
pandata mana rimasha.
6Ñucaca cashcata ruhuanataca
charirac shina manatac saquishachu.
Ñuca causashcacamanca ñuca
shungupica manatac cungarishachu.
7Ñucata piñacca Diosta mana manchac
runa shina, ñucata llaquichicca
mana allita ruhuac runa shina cachun.
8Chaica, ¿millaita ruhuac runa
mashnata shuhuashca cacpipish
Dios paipac causaita quichucpica,
ima shuyanata charingachu?
9¿Paita jatun llaqui japicpi,
Diosta mañashpa
caparicpica uyangachu?
10¿Tucuita ruhuac Diosmantaca
cushicuita charingachu?
¿Punzhanta Diosta mañai pudingachu?
11Diospac podermantaca
ñucami cancunaman yachachisha.
Tucuita ruhuac Dios imata
ruhuagricushcataca
mana pacashpami huillasha.
12Tucui cancunami chaitaca
ricurcanguichic, ¿ima nishpatac
yangata rimaricunguichic?
13Diosta mana manchac runaca
cai llaquicunatami
Diosmantaca chasquinga.
Millaita ruhuac runaca
cai llaquicunatami
tucuita ruhuac Diosmantaca japinga.
14Paicunapac huahuacunaca
espadapi huañungapacllami
achcata miraringacuna.
Chuchucuc huahuacunapish
mana huicsa pactata micungachu.
15Causaihuan saquiriccunataca
huañuchic ungüimi tucuchinga.
Viudacuna saquirishpapish
paicunamantaca mana huacangachu.
16Allpata shinami cullquita montonanga.
Turuta shinami achca
churanata ruhuanga.
17Chashna tucuita allichicpipish,
cashcata ruhuac runami
chai churanataca churaringa.
Mana juchayuc runami
cullquitaca chaupinga.
18Paipac huasica polilla
huasichishca shinallami.
Cuidac runa cuidangapac
ruhuashca huasi shinallami.
19Chayuc runaca sueñungapacmi siririn,
riccharishpa ñahuita pascacpica
imapish mana ricuringachu.
20Manchana yacu shinami
jatun manchaica japinga.
Manchaipac tamya huaira tuta
shamushpami tucuchinga.
21Jatun acapana huaira shamushpami
pai tiyacushcamanta apanga.
Inti llucshina ladomanta
huaira shamushpami,
jatarichishpa apanga.
22Diospac podermanta
pai miticusha nicucpipish,
Diosca mana llaquishpami
yalli llaquihuan paitaca llaquichinga.
23Maquita huactashpa cushicuc shinami
huairaca llaquichinga.
Silbashpa burlac shinami
pai tiyacushcamanta apanga.
Currently Selected:
JOB 27: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.