JOB 23
23
Job Diosman imata ruhuashcata huillashcamanta
1Jobca:
2«Cunanpish llaquihuanmi rimasha,
ñuca llagacunaca,
ñuca huacaitapish yallimi nanacun.
3¡Dios maipi cashcata yachashpaca
pai maipi tiyacuc pushtumanmi riman!
4Paipac ñaupapimi ñuca
ima tucushcata huillaiman.
Ñuca shimihuanmi imatapish niman.
5Pai imata nishcatami uyaiman,
Pai imata nishcatami entendiman.
6¿Ñucahuanca sinchitachu rimanman?
Mana, chaipac randica uyanmanllami.
7Cashcata ruhuac runaca
chaipimi paiman parlanga.
Ñucaca, ñuca juezpac ñaupamantaca
mana juchanchishcachu llucshiman.
8Inti llucshina ladoman rishpapish,
paitaca mana tarishachu.
Inti tigrana ladoman rishpapish,
paihuanca mana tupashachu.
9Pai imata ruhuac cashcata
jahuaman ricuchicpipish
mana ricushachu.
Ura ladoman ricpipish,
mana yachashachu.
10Ashtahuanpish paica,
ñuca maita puricpipish
tucuimi ricun.
Pai ñucata ima shina
cashcata ricushpa llaquichicpica,
curi shinami ricurisha.
11Ñuca chaquicunaca,
pai sarushcatami catirca.
Paipac ñanmanta mana
anchurishpami paillatac catircani.
12Paipac shimihuan mandashcamantaca
mana anchurircanichu.
Paipac rimashca shimicunataca
micunata yallimi
huacaichishpa causarcani.
13Ashtahuanpish pai imata
ruhuasha nishcataca,
¿pitac shuctacyachingayari?
Paillami imatapish ruhuan.
14Pai ñucata imata ruhuasha
nishcataca ruhuangatacmi.
Tucui pai imata ruhuasha
nicushcatami pactachinga.
15Chaimantami paipac ñaupapica
ñucaca yallita mancharini.
Pai ima shina cacta yuyarishpaca
yallitami chucchuni.
16Diosmi ñuca shungupica
manchaita churarca.
Tucuita ruhuac Diosmi ñucataca
manchachishpa charicun.
17¿Ima nishpatac manchana
amsallapitac mana huañurcani?
¿Ima nishpatac chai manchana amsaca
ñuca ñahuita mana quillparcayari?
Currently Selected:
JOB 23: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.