JUECES 9
9
Abimelec Siquem pueblopi mandac tucushcamanta
1Jerobaalpac churi Abimelecca paipac mamapac turicunahuan parlangapacmi Siquem puebloman rirca. Chaipi paicunahuan parlashpami paipac mamapac taitamanta familiacunataca:
2«Siquem pueblopi causaccunataca: “¿Jerobaalpac tucui canchis chunga churicuna mandashpachu alli canga? ¿Mana cashpaca shuclla jatun mandac tiyanachu alli canga?” nishpa paicunata cunaichic. Ñuca cancunapac aillupura cashcataca yachanguichicmi» nirca.
3Mamapac turicuna Siquem pueblopi caicunamanta tucui huillacpimi, chai pueblopi causaccunaca tucuilla Abimelecman tucushpa: “Paica ñucanchic huauquillatacmi” nirca. 4Paicunaca Baal-berit diosta yuyarina huasi ucumantami canchis chunga cullquita japishpa curca. Chai cullquihuanmi Abimelecca imatapish mana ruhuashpa causac quilla gentecunata pusharca.
5Chai gentecunahuan paipac taita Jerobaal causana Ofra puebloman rishpami, paipac canchis chunga huauquicunata shuc rumi jahuapi tucui huañuchirca. Chaicunamantaca paicunapac tucuipac quipa huauqui Gerobaalpac churi Jotamllami miticushpa atirca.
6Chai quipaca, tucui Siquem pueblopi causaccunaca Bet-milopi causaccunandi tandarishpami encina yura cuchupi Diosman cuna rumi cuchupi Abimelectaca mandac cachun acllarca.
Abimelecta llaquichishpa Jotam rimashcamanta
7Jotam chaita yachac chayashpaca Gerizim urcumanmi huichai rirca. Chaimanta tucui mashna uyachun sinchita caparishpaca:
«¡Siquempi causaccuna
ñuca nishcata uyaichic!
¡Ñuca nishcata uyacpica,
Taita Diospish
cancunataca uyangami!
8Shuc punzhami yuracunaca
paicunata mandachun
shuc jatun mandacta
charishun nishpa
olivos yurataca:
“Ñucanchicta jatun mandac
tucui” nirca.
9Shina nicpi, olivos yuraca:
“¿Ñucaca cancunata
mandac tucungaraicullachu
Diosmanpish, runacunamanpish
aceiteta cunataca
saquisha?” nirca.
10Shina nicpimi,
yuracunaca higo yurataca:
“Ñucanchicta jatun mandac
tucui” nirca.
11Shina nicpi, higo yuraca:
“¿Ñucaca cancunata
mandac tucungaraicullachu
sumac mishqui higocunata
pucunata saquisha?” nirca.
12Shina nicpimi,
yuracunaca uvas yurataca:
“Ñucanchicta jatun mandac
tucui” nirca.
13Shina nicpimi, uvas yuraca:
“¿Ñucaca cancunata mandac
tucungaraicullachu Diostapish,
runacunatapish cushichic
llullu vino llucshina
uvas pucunata saquisha?” nirca.
14Shina nicpimi,
yuracunaca zarza yurataca:
“¡Can ñucanchicta jatun mandac
tucui!” nirca.
15Shina nicpimi, zarza yuraca:
“Cancuna ñucata jatun mandac cachun
nicushpaca, ñuca cuchupi
llanduringapac shamuichic.
Mana ñucata mandac
cachun nicpica,
ñucamanta nina llucshishpami
Líbano urcucunapi tiyac
tucui cedro yuracunata
rupachinga” nirca.
16Cunan caita huillaichic. ¿Abimelectaca tucui munaihuan alli shunguhuanchu, jatun mandac cachun churanguichic? ¿Jerobaaltapish, paipac huasi familiatapish cuyashca shinallatacchu mandacta churanguichic? 17Ñuca taitami cancunataca madianitacunapac maquimanta cacharichingapac huañuna manchai macanacurca. 18Cunan cancunaca ñuca taitapac aillucunata piñashcanguichicmi. Chaimantami ñucapac canchis chunga huauquicunata shuc rumi jahuapi huañuchircanguichic. Chaimantaca ñuca taitapac huashalla charina huarmipac huahua Abimelectami cancunapac huasi ucu cashcallamanta mandac cachun churashcanguichic. 19Cunanca, cancuna ñuca taita Jerobaaltapish, ñuca huauquicunatapish ima llaquita mana ruhuashpa allita ruhuashca yuyachicpica, cancunapish cancunata mandac Abimelec-huan, paipish cancunahuan alli cachun. 20Mana chashna cacpica, Abimelecmanta nina llucshishpa Siquem pueblopi causaccunatapish, Milo pueblopi causaccunatapish tucui rupachichun, shinallatac cancunamanta nina llucshishpa Abimelecta tucuchichun» nirca.
21Chashna nishca quipaca Jotamca paipac huauqui Abimelecta manchashcamanta Beer pueblopi causagrirca.
Siquempi causaccuna Abimelecta llaquichingapacjatarishcamanta
22Abimelecca quimsa huatatami israelcunata mandashpa causarca. 23Chai quipaca Mandac Diosca Siquem pueblopi causaccunahuan, Abimelec-huan piñanacuipi churachunmi, millai espirituta cacharca. 24Jerobaalpac canchis chunga huahuacunata huañuchishpa yahuarta jichashcamantami Abimelecpac jahuapi llaqui urmachun, shinallatac Siquem pueblopi causaccunapish huañuchinata ayudashcamanta paicunapac jahuapi llaqui urmachun chashnaca ruhuarca.
25Siquem pueblopi causaccunaca urcupi miticushpa, ñanta riccunata chapashpa huañuchic gentecunatami churarca. Abimelecca chaitaca chayac chayarcami.
26Shuc punzhami Ebedpac churi Gaalca huauquicunata pushashpa Siquem puebloman chayarca. Chaipi causaccunaca paicuna atingallami yuyarcacuna. 27Paicunaca chai pueblopi causaccunahuanmi uvas chagraman rishpa uvasta pallashpa sarushpa capirca. Chai quipaca jatun fiestata ruhuashpami ruhuashcalla dioscunata yuyarina huasiman yaicushpa, ubiashpa, micushpa Abimelectaca imapish tucushca canman nircacuna. 28Chaipimi Ebedpac churi Gaalca:
«¿Ñucanchic servingapacca Abimelecca pitacyari? ¿Siquem puebloca imatacyari? Abimelecca Jerobaalpac churillami. Cutin Zebulca paita servicllami. Abimelecta servinapac randica Siquempac taita Hamorpac huahuacunata servishpa causashunchic. 29¡Cai pueblota ñuca mandacushpaca! ¡Abimelectaca llucchishpami cachaiman! Chashna llucchishpa cachashpaca: “¡Cambac soldadocunata tandachishpa, macanacungapac llucshi!” nimanmi» nirca.
30Ebedpac churi Gaal chashna nicucta chai pueblota mandac Zebul uyashpaca nina japiric shina piñarishpami, 31Abimelecman maijan huillaccunata cachashpaca: «Ebedpac churi Gaalmi huauquicunandi cai Siquem puebloman shamushpa gentecunata canta mana cazuchun yuyaita cucun. 32Chaimanta cunanca cambac soldadocunahuan tuta llucshishpa pambacunapi miticushpa pacalla chapagri. 33Tutamanta inti ña llucshicucpica, macanacungapac puebloman llucshingui. Gaal paipac soldadocunahuan llucshishpa canhuan macanacugricpica, can munashcata imatapish ruhuai» nichunmi cacharca.
34Abimelecca paipac soldadocunahuan tuta rishpa Siquem pueblo muyundi pambacunapi chuscupi chaupirishpami pacalla chaparca. 35Gaal ña pueblo punguman llucshicpica, Abimelecca paipac soldadocunandimi miticushcamanta llucshirca.
36Gaal chai gentecunata ricushpa Zebultaca:
—¡Riqui, urcucunamantaca achca soldadocunami shamucun!— nirca.
Shina nicpi, Zebulca:
—Mana, urcu llandumi canmanca achca gentecunalaya ricuricun— nirca.
37Shina nicpimi, cutinllatac Gaalca:
—Urcumantapish soldadocunami chaupi uraita shamucun. Adivinocunapac encina yura tiyac ñantapish caishuc chaupi soldadocunami shamucun— nirca.
38Shina nicpimi Zebulca:
—¡Cunan sarun cari tucushpa nicushcataca niyari! Sarunca: “¿Ñucanchic servingapac Abimelecca pitacyari?” nircanguimi. ¿Manachu: “Cai gentecuna mana imachu” nicurcangui? ¡Cunanca chai soldadocunahuan macanacungapac llucshiyari!— nirca.
39Shina nicpimi, Gaalca Siquem pueblopi causaccunata pushashpa Abimelec-huan macanacurca. 40Ashtahuanpish Abimelec llaquichic callaricpimi Gaalca miticushpa callparca. Chai pueblopi causaccunataca pueblo pungucaman catishpa rishpami achcata huañuchirca. 41Abimelecca Aruma pueblopimi saquirirca. Cutin Zebulca Siquem puebloman yaicushpami Gaaltapish, paipac huauquicunatapish llucchishpa cacharca.
Siquempi causaccunata Abimelec llaquichishcamanta
42Cayandi punzhami Siquem pueblopi causaccunaca pambaman llucshircami. Chaitami Abimelecman huillarcacuna. 43Abimelec chaita uyashpaca soldadocunata quimsapi chaupishpami pambacunapi pacalla chapachun churarca. Ña gentecuna Siquem pueblomanta llucshicpica, miticushcamanta llucshishpami macanacui callarirca. 44Abimelecca paihuan cac soldadocunahuan rishpami yallita macanacushpa pueblo punguman chayarca. Cutin caishuc soldadocunaca pambacunapi causaccunatami huañuchicurca. 45Abimelecca tucui punzha macanacushpami chai pueblota quichurca. Chashna quichushpa tucui chaipi causaccunata huañuchishpami chai pueblota yallita llaquichishpa cachita shic-huarca.
46Caita yachac chayashpami torre jahuapi cac gentecunaca Berit diosta yuyarina jatun pircahuan muyundita pircashca huasipi miticugrirca. 47Siquempac torrepi cac gentecuna chaipi miticushpa tandanacushcatami Abimelecman huillarca. 48Chaimantami Abimelecca paihuan cac soldadocunahuan Salmón urcuman rirca. Pai chaiman chayashpaca hachahuan sacha ramata pitishpami hombrospi churarca. Shina ruhuashpami paihuan cac gentecunataca:
—¡Ñuca ruhuashca shinallatac cancunapish utca ruhuaichic!— nirca.
49Chaita ricushpami tucui gentecuna cada shuc sacha ramata pitishpa Abimelec-huan rirca. Chashna rishpami jatun pircahuan muyundita pircashca huasiman chayashpa sacha ramata montonashpa ninata japichishpa Siquem pueblo torrepi cac gentecunataca rupachirca. Chaipica caricunapish, huarmicunapish shuc huaranga shinami carca.
Abimelec huañushcamanta
50Chai quipaca Abimelecca Tebes puebloman rishpami chaipi causaccunata muyunacushpa huañuchishpa chai pueblota quichurca. 51Chai pueblo chaupipica, muyundita pircashca shuc torremi tiyarca. Chaimanmi caricunapish, huarmicunapish, pueblota mandaccunapish miticungapac rirca. Shina rishpami pungucunata alli huichcashpa, torre catashcaman huichicurca.
52Abimelecca chai torre punguman chayashpa macanacushpami ninata japichirca. 53Ashtahuanpish shuc huarmimi jahuamanta cutana rumita Abimelecpac umapi shitashpa, umata paquirca. 54Chaimantami Abimelecca paipac escudota apac soldadota utca cayashpaca:
«Ñucataca: “Shuc huarmillami huañuchirca” ama nichuncuna, cambac espadata llucchi ñucata huañuchi» nirca.
Shina nicpimi, escudota apac soldado huashaman pasacta espadata saticpi paica huañurca. 55Abimelec huañushcata israelcuna ricushpaca paicunapac quiquin huasicunaman cutircacunallami.
56Chashnami Mandac Diosca Abimelectaca pai canchis chunga huauquicunata huañuchishpa, paipac taitata llaquichishcamantaca paitapish huañuchirca. 57Siquem pueblopi causaccunapish chashnallatac jatun millaita ruhuashcamantami paicunatapish Mandac Dios llaquichirca. Chashnami Jerobaalpac churi Jotam nishcaca pactarca.
Currently Selected:
JUECES 9: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.