YouVersion Logo
Search Icon

JUECES 8

8
Madianitacunata mandaccunata huañuchishcamanta
1Efraín aillucuna Gedeonta rimarishpaca:
—¿Ima nishpatac madianitacunahuan macanacungapac rishpaca ñucanchicman mana huillac cacharcangui?— nirca.
Shina nishpami sinchita rimarirca. 2Chaimantami Gedeonca:
—¿Ñuca ruhuashcaca cancuna ruhuashcahuan ricucpica, imatacyari? ¿Manachu Abiezer uvasta pallashca quipa Efraín cutin mashcashpa pallacpi, ashtahuan alli pallaringa? 3Diosmi madianitacunata mandac Orebtapish, Zeebtapish cancunapac maquipi churashca. ¿Shina cacpica, cancuna ruhuashcahuan ricucpica, ñucaca imatac ruhuashcaniyari?— nirca.
Chaita nishca quipami paicunaca Gedeonhuan piñarinataca saquirca.
4Gedeonpish, quimsa patsac gentecunapish, madianitacunata catishpami, Jordán yacuta pasangapac shaicushca chayarca. 5Shina chayashpami, Sucot pueblopi causaccunataca:
—Ñucahuan cac gentecunaca shaicushcami. Chaimanta asha tandata caraichic. Ñucanchicca madianitacunata mandac Zeba, Zalmunatami caticunchic— nirca.
6Shina nicpimi, chai pueblopi mandaccunaca:
—¿Ñucanchic cambac gentecunaman carangapacca mandac Zebapish, Zalmunapish ñachu cancunapac maquipi?— nirca.
7Shina nicpimi Gedeonca:
—Shinaca allimi, Mandac Dios Zebatapish, Zalmunatapish ñuca maquipi churacpica, cancunataca shitashca pambacunapi tiyac cashahuan, cardos-huanmi cuerpota chugrichishpa macasha— nirca.
8Chaimantaca Peniel pueblomanmi huichai rirca. Chaiman chayashpapish, Sucot pueblopi nishca shinallatacmi nirca. Shina nicpica, Penielpi causaccunaca Sucot pueblopi causaccuna nishca shinallatacmi nirca. 9Shina nicpimi, Gedeonca chaipi causaccunataca:
—Ñuca macanacuita atishpa cutishpaca, cai torretami tigrachisha— nirca.
Madianitacunapac soldadocunata Gedeón prezushcamanta
10Mandac Zebapish, Zalmunapish Carcor pambapimi paicunapac chunga pichca huaranga soldadocunahuan carca. Chai soldadocunallami inti llucshina ladomanta shamuc soldadocunamanta puchurca. Ashtahuanpish patsac ishcai chunga huaranga soldadocunami huañushca carca. 11Gedeón chaimanta rishpaca, Noba pueblomanta, Jogbeha pueblomanta inti llucshina ladota huichai rishpami, paicuna tiyacuc carpa huasicunaman cungailla yaicushpa macarca. Chai horasca mana paicunapac soldadocunaca cuidacurcachu. 12Zebapish, Zalmunapish miticushpami callparca. Shina callpacpipish, cati rishpami madianitacunata mandac Zebatapish, Zalmunatapish japishpa tucui madianitacunapac carpacunapi mai manchaita churarca.
Socottapish, Penieltapish llaquichishcamanta
13Joaspac churi Gedeón macanacushpaca Heres huichaitami cutirca. 14Shina cuticushpami, Sucot pueblomanta shuc mosota japishpa, tucuita tapurca. Paimi chai pueblopi mandaccunapac pushac yuyaccunapac shuticunata quillcashpa curca. Chai quillcashcapica canchis chunga canchis caricunami carca. 15Chai quipaca Sucot pueblopi causaccunapacman rishpaca:
«Riquichic, Zebapish, Zalmunapish caipimi. Paicunamantami ñucanchic-huanca: “¿Ñucanchic cambac shaicushca gentecunaman tandata carangapacca ñachu mandac Zebapish, Zalmunapish cancunapac maquipi?” nishpami burlarcanguichic» nirca.
16Shina nishpami, chai pueblota pushac yuyaccunatapish, Sucot pueblopi causaccunatapish shitashca pambapi tiyac cashahuan, cardos-huan macashpa chugrichirca. 17Shinallatac Peniel pueblopica jatun torreta urmachishpami, chai pueblopi causaccunatapish huañuchirca.
18Chai quipaca Zebatapish, Zalmunatapish tapushpaca:
—¿Cancuna Tabor urcupi, huañuchishca runacunaca, imalayatac carca?— nirca.
Shina tapucpi paicunaca:
—Paicunaca can shinami carca. Shinallatac tucui paicunami jatun mandacpac churicuna shina carca— nirca.
19Shina nicpimi Gedeonca:
—¡Paicunaca ñuca mamamanta huauquicunami! ¡Mandac Diospac shutipimi nini: Paicunata mana huañuchishca cacpica, ñucapish mana huañuchimanchu!— nirca.
20Shina nishpa paipac punta churi Jeterta cayashpaca:
—Jatari, cai runacunata huañuchi— nirca.
Shina nicpipish Jeterca mana huañuchircachu. Chaica huambrarac cashcamantami mancharca. 21Chaimantami Zebapish, Zalmunapish rimashpaca:
—Canllatac jatarishpa, huañuchilla. Sinchi runa cashcataca huañuchicpimi, sinchi cashcata yachanchic— nirca.
Shina nicpimi, Gedeón jatarishpa espadahuan Zebatapish, Zalmunatapish huañuchishpa, camellocunapac cungapi tiyac sumac lunetacunatapish japirca.
Israelcuna pandarishcamanta
22Israelcuna Gedeonta rimashpaca:
—Can, ñucanchicta madianitacunapac maquimanta quishpichishcamantaca canllatac ñucanchicta mandac tucui. Quipamanca cambac churicuna, cambac nietocuna mandac cachun— nircacuna.
23Shina nicpipish Gedeonca:
—Ñucapish, ñuca churipish mana mandashunchu. Ashtahuanpish Mandac Diosllami mandanga— nirca.
24Cutin Gedeón rimashpaca:
—Cancunamanca caillatami mañagrini: Tucui mashna macanacuipi japishca zarcillocunata ñucaman cuichic— nirca.
(Paicunaca ismaelitacuna cashpami curi zarcillocunahuan carca). 25Chaimantami paicunaca:
—Ari, chaitaca cushicushpa cushunllami— nirca.
Shinami pañota tendishpa caishuc chaishuc macanacuipi japishca zarcillocunata shitarca. 26Chai tucui zarcillocunata tandachicpica, huaranga canchis patsac siclos llashacmi carca. Chaica sumac churanacunata, lunetacunata, sortejascunata, madianitacunata pushaccunapac churanacunata, camellocunapac cungapi apashca sumaccunata cushca jahuami chaita curca. 27Chai tandashcahuanca Gedeonca shuc efodta ruhuashpami paipac causana Ofra pueblopi churarca. Chai puebloman rishpa, chai Ofra diosta mañashpami israelcunaca huainayarcacuna. Shinami Gedeontapish, paipac familiatapish tucllapi urmachic shina pandachirca.
Gedeón huañushcamanta
28Shinami madianitacunaca israelcunapac maquipi urmashpa mana ashtahuan jatarirca. Shina cacpimi chai llactapica chuscu chunga huatata Gedeón causacui punzhacunapi cushi causai tiyarca.
29Joaspac churi Jerobaal nishca Gedeonca paipac huasiman rishpami causarca. 30Gedeonca achca huarmicunata charishcamantami canchis chunga churicunata charirca. 31Shinallatac Siquem pueblopi causac caishuc huarmipipish huahuata charircami. Chai huahuataca Abimelectami shutichirca.
32Joaspac churi Gedeonca sumacta yuyacyashpa huañucpimi, abiezeritacunapac pueblopi taita Joás enterrashcapi enterrarca.
33Gedeón huañushca quipapish israelcunaca cutinllatacmi Baal dioscunata adorashpa, huainayarcacuna. Chashnami Baal-birit diosta paicunapac dios cachun acllarca. 34Israelcunaca paicunapac muyundipi causac piñac gentecunapac maquimanta Mandac Dios quishpichishcataca mana yuyarircacunachu. 35Gerobaal nishca Gedeontapish huasi ucupura causaccunatapish, cai tucui allicunata ruhuashcamantapish mana pagui nircacunachu.

Currently Selected:

JUECES 8: QCA10

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy